Dŭm hrue akŏ thŭn 2026, hlăm anôk dôk rŭ mdơ̆ng sang hră knŭk kna čiêm rông Ƀuôn Đon, ti alŭ Thống Nhất, ƀuôn hgŭm Buôn Đon, čar Daklak), dŭm pluh čô mnuih mă bruă, mbĭt hŏng lu kdrăp mă bruă mơ̆ng phung rŭ mdơ̆ng, mbha mă bruă hlăm lu êpul, dôk bi khăt msei, dôk lŭk bê tông tuh kmeh, klia mtih, đa đa dôk să kuăt msei, mprăp tuh bê tông tur tal 1 hlăm sang dlông 3 tal. Trần Văn Long, Pô kiă kriê bruă rŭ mdơ̆ng brei thâo, phung rŭ mdơ̆ng brei thâo, mâo tiŏ nao lehanăn mbha leh mnuih mă bruă, kdrăp mă bruă čiăng kơ jih jang bruă rŭ mdơ̆ng mâo ngă hŏng klei pral. Ară anei bruă ngă jing êgao kơ hdră kčah leh:

“Ară anei, ti anôk dôk rŭ mdơ̆ng, mâo leh 5 êpul phung tŭ mă ngă pô kiă kriê bruă rŭ mdơ̆ng bi hgŭm mbĭt, grăp čô kiă kriê bruă rŭ mdơ̆ng păn ngă sa mta bruă, mâo 5 kỹ sư mbĭt hŏng 40–50 čô mnuih mă bruă bi rtŭ mdơ̆ng sang hră. Jih jang bruă dôk ngă ară anei djŏ hŏng hdră kčah. Dôk gĭr hlăm klei mă bruă krah adiê mđiă hlơr, bi mbha lu êpul mă bruă hrue mlam kñăm čiăng pral bi leh ba jao sang hră djŏ wưng kčah.”

          Tui si pô bi ala kơ phung klam kiă kriê bruă rŭ mdơ̆ng, Võ Văn Lợi, K’iăng khua kiă kriê bruă rŭ mdơ̆ng čar Daklak (Êpul bruă B), truh kơ ară anei jih jang bruă dôk rŭ mdơ̆ng sang hră knŭk kna čiêm rông ti knông lăn hlăm čar mâo bi leh sơăi kdrêč atur, mprăp tuh betong tur tal 1. Ênoh mâo bi liê ngăn prăk hlăm bruă rŭ mdơ̆ng truh leh 32%, jing hlăm brô 120 êklai prăk, rơ̆ng djŏ hŏng hdră kčah. Čhunag nao hlăm yan bhang không, Anôk bruă rŭ mdơ̆ng mâo leh hdră đru kơ phung rŭ mdơ̆ng mđing mă bruă bi pral kñăm čiăng bi leh ti mlan 8, wăt tơdah mâo hjan dưn, Võ Văn Lợi lač.  

“Truh ară anei, truh ară anei bruă rŭ mdơ̆ng djŏ hlăm hdră kčah. Khădah yan adiê tinei mdê, hlăm thŭn 2026 dleh thâo tĭng mkă, snăn hmei mâo leh hdră mprăp jih jang kdrăp mă bruă, mnuih mă bruă, lehanăn mă bruă mbha mtam jih hrue mlam. Mơ̆ng anăn, hnêč êjai adiê jăk siam hlăm yan không ară anei, bi rŭ mdơ̆ng mă bruă hŏng klei pral.”

           Tui si Nguyễn Thiên Văn, K’iăng khua knơ̆ng bruă sang čư̆ êa čar daklak, leh mâo klei kiă kriê mơ̆ng pô duh bi liê, djăp alŭ wăl lehanăn phung ngă bruă rŭ mdơ̆ng ngă mtam bruă hŏng klei pral, kñăm čiăgn bi leh sang hră êlân kơ hrue phung hđeh nao sang hră, lehanăn bruă rŭ mdơ̆ng ăt jih ai tiê kñăm kkuh mơak klei bi kƀĭn prŏng  14 mơ̆ng Đảng nao hlăm klei hdĭp. Nguyễn Thiên Văn lač. 

“Hlue ngă hdră mtrŭn klei bi kƀĭn prŏng XIV mơ̆ng Đảng leh êgao, alŭ wăl srăng dưn yua boi djŏ hŏng bruă knuă hlăm čar, mkŏ mjing dŭm hdră êlan mă bruă klă mngač , jăk găl kơ phung nai lehanăn hđeh hriăm hră mtô lehanăn hriăm. Mơ̆ng anăn, mjing klei tŭ dưn hlăm bruă mjuăt bi hriăm hlăm dŭm boh ƀuôn hgŭm ti knông lăn kluôm čar Daklak.”

Dŭm ƀĕ kmeh kjăp leh mâo mđĭ, anăp dơ̆ng êdah dŭm boh sang hră kjăp siam ti knông lăn čar Daklak. Mơ̆ng thŭn 2026 – 2027, tinei srăng jing mjut bi hriăm klei thâo săng kơ êbeh 3.000 čô hđeh hriăm hră hlăm krĭng knông lăn. Phung hđeh mâo mjut bi hriăm hlăk gĭr ktĭr hriăm mjuăt, anăp truh kơ mgi dih hŏng ai tiê mda asei pô, lehanăn hŏng klei thâo săng pô diñu srăng rŭ mdơ̆ng krĭng knông lăn Daklak knư̆ hrue knư̆ hơĭt kjăp, đĭ kyar, jiă knhuah gru dhar kreh./.