Hlăm sang kyâo, khuăt siam, Kơ Să Ha El pioh ti êtung krah jing anôk yuôm bhăn pioh yuôl rup awa Hồ lehanăn lu hră bi mni mkăn, hlăm anăn mâo hră mêđai 30 thŭn  Đảng. Ñu tuôm ngă leh lu bruă yuôm bhăn mdê mdê ti alŭ wăl, jing khua bruă Đảng ƀuôn hgŭm să Dă Chais, leh kơ anăn ngă khua êpul hgŭm bruă lŏ hma kdriêk Lạc Dương. Păn ngă k’iăng khua anôk bruă mtô bi hriăm mơ̆ng bruă Đảng kdriêk Lạc Dương, čar  Lâm Đồng hđăp, lehanăn wĭt mdei bruă mơ̆ng thŭn 2022.

Hŏng klei mbruă lehanăn kơhưm mơ̆ng pô, leh wĭt hŏng ƀuôn sang, Kơ Să Ha El lŏ dơ̆ng djŏ ruah ngă khua bruă Đảng ƀuôn Dă Blah, ƀuôn hgŭm Lạc Dương. Ñu hơ̆k mơak yăl kơ jih jang klei bi mlih hlăm ƀuôn sang.

 “Êlâo dih mnuih ƀuôn sang kơ anei ƀun ƀin snăk, mơ̆ng êlan klông dleh dlan, klei duah ƀơ̆ng dleh dlan... Truh thŭn 1992, mâo klei bruă sang čư̆ êa đru mjeh kphê mnuih ƀuôn sang gĭr ktỉ duh ƀơ̆ng. Hmei mtrŭt mjhar mnuih ƀuôn sang amâo mâo bi rai dliê ôh, bi pla kphê, pla boh saboce, rông êmô kbao ba wĭt klei tuư dưn hĭn...”

Mơ̆ng leh hlue ngă hdră ala čar kñăm, mkŏ mkra krĭng ƀuôn sang mrâo, gŏ sang  đảng viên Kơ Să Ha El mâo nanao klei bi hmô ba êlan êlâo. Ñu mbĭt hŏng êpul mtrŭtr mjhar mnuih ƀuôn sang myơr lăn mkra êlan klông, ruư mkra lu bruă kơ mnuih ƀuôn sang hdĭp mda. Msĕ si ñu pô myơr tal êlâo êbeh 20 m lăn ti anăp êlan dah tĭng ênoh dŭm êklai prăk, čiăng kơ knŭk kna mkra mđĭ êlan dơ̆ng prŏng mrô 27C. Ară anei knŭk kna lŏ ngă bruă pŏk phai ênao mgơ̆ng êa Rơhoa, gŏ sang ñu srăng lŏ jao 2,5 sào lăn dôk pla kphê.

Hŏng ai tiê thâo ba anăp, lehanăn mâo duưm klei duh myơr mơ̆ng gŏ sang đảng viên Kơ Să Ha El mâo bi lar leh hlăm ƀuôn sang, mđrăm mbĭt bi mkŏ mkra krĭng ƀuôn sang mrâo, lehanăn jih ai tiê duh ƀơ̆ng mđĭ kyar klei hdĭp. Thŭn dih  ênoh mâo ba wĭt mơ̆ng grăp čô mnuih ƀuôn sang ƀuôn Dă Blah djăp 45 êklăk prăk/čô mnuih. Ƀuôn amâo mâo ôh gŏ sang ƀun ƀin, knŏng ƀiă đuič gŏ sang dôk găn klei dleh dlan. Čil Pam K’Quyên, khua bruă Đảng ƀuôn Dă Blah, ƀuôn hgŭm Lạc Dương, brei thâo.

“Hŏng hmei Kơ Să Ha El mâo nanao klei bi hmô mngač kơ klei thâo ba anăp. Ñu jing leh kdrông mkŏ klei bi jưh knang plah wah Đảng hŏng mnuih ƀuôn sang, klei ñu mtă mâo nanao mnuih ƀuôn sang hmư̆ lehanăn tui gưt.”

Ƀuôn hgŭm Lạc Dương mâo mkŏ mjing mơ̆ng klei bi mŭt 3 boh să Dă Sar, Dă Nhim, Dă Chais mơ̆ng kdriêk Lạc Dương hđăp. Hŏng ênhă jih jang giăm 830 km2, Lạc Dương jing leh ƀuôn hgŭm prŏng hĭn čar Lâm Đồng, hŏng ênoh mnuih djuê ƀiă truh êbeh 82%. Ya Tiong - Khua bruă Đảng ƀuôn hgŭm Lạc Dương, brei thâo, wưng thŭn 2025 – 2030, ƀuôn hgŭm lŏ dơ̆ng mâo klei đĭ kyar mơ̆ng bruă lŏ hma jing phŭn, mbĭt anăn bruă hiu čhưn ênguê lŏ bi kjăp. Čiăng dưi ngă tŭ ư jing dŭm hdră mtrŭn mơ̆ng Đảng čiăng mđĭ kyar klei hdĭp mda mnuih ƀuôn sang, ƀuôn hgŭm mđĭ leh bruă klam mơ̆ng dŭm gưl bruă Đảng, mâo nanao klei ba anăp mơ̆ng mnuih đảng viên hlăm krĭng djuê ƀiă.

 “Alŭ wăl anei mâo lu mnuih jing đảng viên sui thŭn msĕ si Kơ Să Ha El, khădah leh wĭt mdei bruă, ƀiădah ară anei, kyua klei thâo bi khăp thâo bi đru hlăm ƀuôn sang, ñu lŏ dơ̆ng duh myơr mđrăm mbĭt hŏng bruă sang čư̆ êa lŏ dơ̆ng mđĭ kyar klei hdĭp mda ala ƀuôn ti Lạc Dương anei.

Hŏng ai tiê thâo uêñ, jih ai tiê hur har đảng viên Kơ Să Ha El dưi lŏ bi kjăp leh klei đăo knang mơ̆ng mnuih ƀuôn sang hŏng Đảng, bi lar klei thâo gĭr, sa ai tiê rŭ mdơ̆ng ƀuôn sang Lạc Dương, čar Lâm Đồng ƀrư̆ hrue mâo klei bi mlih./.