Hnêč êjai mdei yang hrue dơ̆ng, nao čuă dlăng kêbưn mtah siam, lehanăn ksul mbư̆ dŭm mbuôn trŏng boh dlông awan bi kyut boh, čiăng bi hmao hŏng hrue kčah hŏng phung ghan mnia hriê blei, đảng viên Ya Dũng, khua buôn Labouye A, să Lạc Xuân, kdriêk Đơn Dương, čar Lâm Đồng yăl dliê, dŭm hrue anei, grăp čô mnuih dôk gun kpăk hŏng bruă knuă sơăi, kâo hnêč yang hrue dơ̆ng, čiăng truh tlam mkŏ mjing klei bi kƀĭn ƀuôn, trông čhai mkŏ mkra krĭng ƀuôn sang mrâo mđĭ hnơ̆ng tŭ hĭn.

Ya Dũng brei thâo, kyuadah ƀuh bruă pla mjing djam mtam, hlue hŏng knhuah hđăp, lehanăn klei mưng mơ̆ng ƀuôn sang pô êlâo amâo lŏ mâo klei tŭ dưn ôh, hrui wĭt amâo mâo hơĭt, snăn ñu kut kat tui hlue hdră pla mjing mrâo. Kyuanăn, hlăm 4 sào lăn pla djam mtam mơ̆ng gŏ sang ñu mâo leh ênoh hrui wĭt hơĭt, kah knar hlăm grăp yan mâo prăk mnga êbeh 100 êklăk prăk. Tui si Ya Dũng, mơ̆ng boh tŭ dưn anei, kâo mâo klei hâo hưn mtă mtăn, mtrŭt mnuih ƀuôn sang tui ngă:

 “Asei kâo pô mtam gĭr tui hriăm mơ̆ng lu anôk, amâo mâo djŏ knŏng tinei, ƀiădah lŏ tui nao hriăm hlăm alŭ wăl mkăn. Čiăng ksiêm êmuh si arăng dê duh ƀơ̆ng, pla mjing ana anei, ana adih. Hŏng bruă klam jing pô bi ala jing pô bi ala êpul gơ̆ng bruă ƀuôn sang snăn brei mâo klei thâo gĭr bi hriăm êmuh, tui hriăm kơ dŭm hdră pla mjing mrâo, ba yua mjeh mrâo. Kyuadah mnuih ƀuôn sang čiăng hrăm mbĭt rŭ mdơ̆ng alŭ wăl pô mâo klei đĭ kyar hĭn”.

Buôn Labouye A, să Lạc Xuân, kdriêk Đơn Dương, čar Lâm Đồng mâo êbeh 130 gŏ sang, hlăm anăn jing êbeh 70% jing mnuih djuê ana K’ho. Mơ̆ng hdră bi hmô pla mjing ba wĭt leh klei tŭ dưn mơ̆ng Ya Dũng, mnuih ƀuôn sang hlăm ƀuôn bi tui hriăm, lehanăn hlue ngă. Truh ară anei, mâo leh ênŭm 100% ênhă pla mjing mơ̆ng ƀuôn bi nao pla mjing djam mtam sơăi. Ênoh mâo ba wĭt đĭ nanao hŏng lu gŏ sang, mâo tlaih leh mơh mơ̆ng klei dleh dlan, lehanăn kpưn đĭ mkŏ mjing klei hdĭp mrâo.

Ya Dũng brei thâo, truh ară anei, klei mĭn lehanăn hdră mă bruă hlăm mnuih ƀuôn sang ti ƀuôn Labouye A mâo leh klei tŭ dưn hĭn êdi. Mnuih ƀuôn sang čŏng dơ̆ng tui tiŏ hdră kreh knhâo, ba yua klă mngač hlăm klei hdĭp. Anăp anei, Ya Dũng ktrâo atăt mnuih ƀuôn sang pla mjing tui si ya mta mnơ̆ng mơ̆ng phung blei čiăng, ngă bruă mâo klei bi mguôp hŏng phung duh mkra, hŏng êpul hgŭm bruă, čiăng bi mâo anôk čhĭ mnia hơĭt:

 “Asei kâo pô mtam yơh, anăp anei srăng lŏ tui duah, lehanăn nao hgŭm hŏng êpul hgŭm bruă čiăng kơ jih jang boh mnga mnơ̆ng pô pla mjing mâo anôk čhĭ, leh kơ anăn mtrŭt lu gŏ sang mkăn nao mŭt hlăm êpul hgŭm msĕ hŏng pô mơh. Mâo êpul hgŭm bruă mbĭt leh, mâo klei bi hgŭm hlăm klei duh mkra pla mjing leh snăn jih jang mnuih srăng mđrăm mbĭt mâo klei đĭ kyar”.

Tui si đảng viên Cruyang Cơi Long, K’iăng khua bruă Đảng să Lạc Xuân, kdriêk Đơn Dương (Lâm Đồng) êlâo dih, amâo mâo djŏ knŏng tui duah anôk kăp blei boh mnga pô pla mjing, ƀiădah Ya Dũng lŏ jing mnuih mâo k’hưm êdi hŏng mnuih ƀuôn sang hlăm ƀuôn, lehanăn jing mnuih ba êlan êlâo nanao, bi đru hdơ̆ng găp msĭr klei ư̆ êpa bi hrŏ klei ƀun knap, hrăm mbĭt mkŏ mkra krĭng ƀuôn sang mrâo.

 “Kâo ƀuh Ya Dũng jing sa čô đảng viên thâo bi hmô êdi, ba akŏ nanao hlăm klei mă bruă, lehanăn jing pô mtrŭt mjhar mnuih ƀuôn sang hlue ngă djăp mta bruă mơ̆ng ƀuôn sang. Boh nik, Ya Dũng jing mnuih thâo gĭr tui duah, hriăm êmuh djăp mta klei mrâo mrang hlăm bruă knuă, leh kơ anăn mtrŭt lu mnuih bi tui ngă msĕ snăn mơh, lehanăn ară anei mâo ba wĭt leh lu boh tŭ dưn jăk, đru leh mđrăm mbĭt hŏng alŭ wăl mkŏ mkra ƀuôn sang pô knư̆ hrue knư̆ mâo klei đĭ kyar”.

          Hŏng boh tŭ dưn mrâo, dŭm thŭn êgao, Ya Dũng mâo tŭ mă leh lu klei bi mni mơ̆ng anôk bruă Đảng, bruă sang čư̆ êa kdriêk, čar lehanăn dŭm klei pah mni mơ̆ng Êpul khua kiă kriê krĭng lăn dap kngư kyua mâo leh dŭm boh tŭ dưn jăk hlăm bruă mkŏ mkra krĭng ƀuôn sang mrâo kjăp ktang hĭn./.