Sui hŏng anei 4 thŭn, gŏ sang amai K’Thị Nam ti alŭ 2 mâo Êpul hgŭm bruă mniê să Đông Giang mjing klei găl čan 50 êklăk prăk mơ̆ng Knơ̆ng prăk đru ba yang ƀuôn Hàm Thuận Bắc čiăng duh bi liê mđĭ kyar ana boh durian leh anăn rông êmô. Truh kơ ară anei, gru hmô ngă bruă duh mkra mơ̆ng gŏ sang amai Nam dưi mđĭ lar boh tŭ dưn, hnư hrui wĭt ƀrư̆ ƀrư̆ mkra mđĭ, kyua anăn klei hdĭp gŏ sang ƀrư̆ hruê ƀrư̆ hơĭt kjăp hĭn.

"Gŏ sang kâo mâo čan mơ̆ng êpul hgŭm bruă mniê 50 êklăk čiăng mđĭ kyar ana boh durian, rông êmô. Ti sang ăt duh bi liê kdrăp krih êa kơ ana kyâo čiăng ana pral đĭ jing. Pô ƀuh arăng ngă ana boh durian mâo boh tŭ dưn snăn pô tui hriăm ngă msĕ. Kơ hdră mnêč snăn pô tui lŏ hriăm mơ̆ng dŭm đang war êlâo dih ngă boh durian mâo boh tŭ dưn, pô hluê ngă".

Mbĭt hŏng gŏ sang amai K’Thị Nam lŏ mâo gŏ sang amai K’Thị Ẩn, leh dưi čan prăk, amai Ẩn jhŏng koh giăm 2ha ana kñŭl khua mduôn amâo lŏ jing ba pla 1.000 phŭn ana kphê leh anăn 120 phŭn ana boh durian. Ară anei 2 mta ana pla mjing anei mâo gŏ sang amai Ẩn kriê dlăng, đĭ jing jăk siam, ƀuăn srăng ba wĭt hnư hrui wĭt hơĭt kjăp kơ gŏ sang hlăm dŭm thŭn kơ anăp.

Sang kâo êlâo adih lu jing pla kñŭl ƀiădah dŭm thŭn hŏng anei pla kñŭl ƀuh amâo mâo tŭ dưn ôh anăn mrâo bi mlih pla kphê, pla durian hlăm brô êbeh 1,5ha, ăt kyua čan prăk thiăm mơ̆ng knơ̆ng prăk đru ba bruă yang ƀuôn čiăng duh bi liê kơ mjeh, hbâo pruê, êa krih,… ară anei ana hlăk đĭ jing jăk, pô ăt gĭr kriê dlăng dua mta ana anei čiăng kơ êdei anăp ba wĭt klei tŭ dưn kơ gŏ sang).

Hŏng êbeh 800 čô hgŭm mniê nao hgŭm hlăm 5 êpul hgŭm bruă ƀuôn, dŭm thŭn êgao, čiăng đru kơ phung hgŭm mâo klei găl dưi čan prăk knŭk kna mđĭ kyar bruă duh mkra, Êpul hgŭm bruă mniê să Đông Giang, čar Lâm Đồng bi hgŭm leh kjăp hŏng Knơ̆ng prăk đru ba yang ƀuôn Hàm Thuận Bắc, čar Lâm Đồng brei čan prăk hŏng ênoh prăk mnga hdjul, mjing klei găl kơ phung hgŭm mđĭ kyar bruă duh mkra gŏ sang, ƀrư̆ ƀrư̆ mkra mđĭ klei hdĭp.

Amai K’Thị Châu ti să Đông Giang, čar Lâm Đồng yăl dliê, ăt mơ̆ng prăk čan mơ̆ng Knơ̆ng prăk đru ba yang ƀuôn, gŏ sang ñu duh bi liê pla ana boh durian leh anăn ana kphê hlăm ênhă 1,5ha. Khădah snăn, wưng hrui pĕ boh kphê leh anăn boh durian sui snăn čiăng mă ƀiă rông lu, amai Châu rông thiăm êmô, ŭn, pla dŭm mta ana ƀiă hruê čiăng mâo hnư hrui wĭt nanao kơ gŏ sang.

Amai K'Thị Châu brei thâo, čiăng kơ ana pla mjing đĭ jing jăk hlăm yan adiê mđiă hlơr msĕ si thŭn anei, ñu jhŏng duh bi liê kdrăp krih êa, dưi mkiêt mkriêm êa krih kơ mnơ̆ng pla, bi hrŏ ƀiă bruă knuă mă, rơ̆ng kơ mnơ̆ng pla dưi mkăp djăp êa čiăng đĭ jing pral, ba wĭt boh tŭ bruă duh mkra lu.

“Kâo mâo čan prăk Knơ̆ng prăk đru ba bruă yang ƀuôn duh bi liê pla kphê leh anăn durian. Čiăng mâo êa krih, sang kâo duh bi liê êbeh 200 êklăk prăk, wăt klei ƀăng ƀlŭng wăt mă đĭng, mă ƀrĭk, leh anăn trŭn hlăm ana. Dŭm ana anei sui mâo hrui pĕ, snăn pô ngă hbei, ngă ktơr, rông ŭn, rông êmô čiăng mâo prăk yua hlăm grăp hruê, prăk blei hbâo pruê, êa drao gŭn duh bi liê kơ dŭm ana kphê, ana durian)

Boh sĭt brei ƀuh, dŭm thŭn êgao, ênoh prăk brei čan hdră bruă đru leh kơ lu gŏ êsei mnuih ƀuôn sang djuê ana ƀiă să krĭng čư̆ čhiăng Đông Giang mâo klei găl duh bi liê mđĭ kyar bruă duh mkra, mđĭ hnư hrui wĭt leh anăn mjing bruă mă hơĭt kjăp. Boh nik dŭm gŏ êsei ƀun, giăm ƀun leh anăn dŭm gŏ êsei knŭk kna dlăng ba kyua dưi čan prăk brei čan hdră bruă ƀrư̆ ƀrư̆ bi hơĭt klei hdĭp, kpưn đĭ tlaih kơ ƀun hơĭt kjăp.

 K’Thị MHảo, Khua êpul hgŭm bruă mniê să Đông Giang, čar Lâm Đồng brei thâo, truh kơ ară anei, ênoh prăk mâo Êpul hgŭm dôk kriê dlăng hlăm brô êbeh 12 êklai prăk, hŏng 350 čô hgŭm dưi čan. Leh phung hgŭm dưi čan prăk, Êpul hgŭm gĭt gai leh dŭm êpul hgŭm bi hgŭm hŏng dŭm alŭ mtrŭt mđĭ hdră mtô mblang, ktrâo lač kơ phung hgŭm ba yua prăk tŭ dưn, djŏ hdră kñăm.

"Hlăm wưng leh êgao, đa đa phung hgŭm čŏng čan prăk leh anăn bi mlih mnơ̆ng pla. Êngao kơ ana phŭn jing ana kñŭl, phung hgŭm ăt čŏng bi mlih mơ̆ng ana kñŭl ba pla ana kphê, ana boh durian leh anăn ară anei gru hmô anei đĭ kyar jăk, ba klei tŭ dưn bi mlih bruă duh mkra kơ gŏ sang. Đa đa phung hgŭm thâo ba yua klei kreh knhâo hlăm bruă pla mjing, dŭm gŏ sang jhŏng duh bi liê kdrăp krih êa mrâo mrang čiăng bi hrŏ klei ktrŏ leh anăn mmông krih êa mrâo mrang snăn mnơ̆ng pla đĭ jing pral hĭn."

Truh kơ ară anei, klei hdĭp mda lu phung mniê hgŭm hlăm êpul mâo čan prăk hŏng ênoh prăk mnga hdjul mơ̆ng Knơ̆ng prăk đru ba yang ƀuôn Hàm Thuận Bắc, čar Lâm Đồng ƀrư̆ hruê ƀrư̆ đĭ kyar. Mơ̆ng ênoh prăk čan anei amâo djŏ knŏng đru kơ phung amai adei mjing bruă mă, mđĭ hnư hrui wĭt kơ gŏ sang ƀiădah lŏ đru mguôp bi mlih klei thâo săng mơ̆ng phung mniê mnuih djuê ƀiă krĭng čư̆ čhiăng să Đông Giang, čar Lâm Đồng hlăm hdră mđĭ kyar bruă duh mkra, mkŏ mkra krĭng ƀuôn sang mrâo./.