Truh kơ ƀuôn Akŏ Dhông, amai Freya, tue hriê mơ̆ng Mi brei thâo, tinei mâo klei jăk siam mtah mda, adiê êđăp, mbĭt hŏng mnuih ƀuôn sang thâo jĕ giăm, dôk djă pioh knhuah gru dhar kreh djuê ana pô, ñu lač:

“mâo klei drông hmei hŏng klei jăk jĭn, mơak êdi leh truh tinei, ƀuh klei h’uh mđao. Tinei, msĕ si dôk hlăm sa boh gŏ sang hĭn mah jiăng, amâodah tue êgar.”

Ti krah ƀuôn prŏng Buôn Ama Thuôt, Buôn Akŏ Dhông dưi yap jing ƀuôn mdrŏng hĭn hlăm čar Daklak, ƀiădah bruă dưi păn kjăp mnhuah gru pô đuĕ nao mbĭt hŏng ƀuôn sang, anăn jing dhar kreh anak Ê Đê dôk ênŭm. Dŭm kdrêč êlan mnga mâo khăt mkra jăk siam, mtah mda, dŭm boh sang đun dôk kjăp hlue thŭn mlan, ênai čing čhar ăt kwang nanao hlăm grăp wưng knăm mơak, hrue yuôm bhăn mơ̆ng alŭ wăl, mơ̆ng lăn čar, lehanăn grăp blư̆ mâo tue yuôm bhăn truh. Mơ̆ng sa boh ƀuôn Ê Đê dôk knhuah đưm, Akŏ Dhông jing leh anôk hiu čhưn ênguê yang ƀuôn kdlưn hĭn hlăm čar Daklak anôk jing dhar kreh êdah ênŭm hĭn hlăm klei hdĭp aguah tlam mlam hrue. Khua mduôn Y Nuel Niê brei thâo mơ̆ng klei dôk djă pioh knhuah gru dhar kreh Ê Đê mjing atur đru leh ƀuôn mâo klei đĭ kyar, êđăp ênang lehanăn jăk mơak.

“Hlăm buôn, grăp mlan mâo nanao hdră kưt muiñ amâo mâo mă prăk ôh pioh kơ tue hiu hčưn. Dŭm mta mnơ̆ng, hlăm anăn mnơ̆ng ƀơ̆ng djuê ana pô, klei kưt muiñ bi mlih nanao čiăng kơ jăk hĭn.”

Mbĭt hŏng ƀuôn Akŏ Dhông, lu boh ƀuôn mkăn hlăm čar Daklak ăt dôk bi lar knhuah gru dhar kreh pô. Ti ƀuôn Chuah, ƀuôn hgŭm Krông Ana, kreh ƀuh lu boh êdeh kai mdiăng tue hiu čhưn jing mnuih ala tač êngao đuĕ nao hlăm hma. Anak Ê Đê lŏ mâo klei pia mơak “êdeh amâo mâo mŭr Ê Đê” – jing msĕ si sa klei blŭ bi hriêng, ƀiădah jing klei sĭt, ƀuôn sang amâo mâo klei duah hưn mdah ôh, ƀiădah drông tue tui si klei hdĭp pô aguah tlam mlam hrue.

H’Đor Ênuôl, mnuih buôn Chuah, dôk mñam hlăm sang đun pô, ăt kreh ƀă anak nao kơ hma, ăt mkra djam hla hbei ƀlang – trŏng phĭ drông tue, hŏng klei mtluk mtlak mơak mñai, kyuuadah dhả kreh pô amâo mâo lui  hĕ ôh.

“Drông tue mnuih ala tač êngao snăn kâo ƀuh jing amâo mâo dleh ôh, hdĭp sĭt hŏng klei hdĭp pô yơh, ngă jih ai tiê čiăng kơ tue ƀuh si jing dhar kreh lehanăn klei pô duh ƀơ̆ng. Pô ƀuh jing mơak mâo hdĭp lehanăn mă bruă snăn.”

 Ti lu boh ƀuôn hlăm čar Daklak, khădah klei hdĭp mâo klei bi mlih, gŏ sang lehanăn yang ƀuôn ăt jing pô phŭn kơ klei jăk yâo. Ama mtô anak thâo tông čing, amâo mâo djŏ knŏng lŏ bi kriê pioh, ƀiădah jing msĕ si klei mrai lŏ mčuê plah wah dŭm gưl ênuk. Y Duyệt Niê, ti buôn Phơng, ƀuôn hgŭm Ea Tul, lač, klei yuôm bhăn hĭn jing hdră gŏ sang lehanăn ƀuôn lŏ bi kriê pioh mtô mtă, djă pioh dŭm klei yuôm bhăn mơ̆ng knhuah gru dhar kreh djuê ana.

“Gŏ sang bi mđĭ ai klei jăk mơak, ba klei jăk yâo kơ anak čô. Tơdah mâo mmông wăn, kâo lŏ mtô anak čô tông čing knah, čing kram, čiăng kơ phung hđeh thâo, lehanăn mpŭ kơ klei tŭ dưn dhar kreh djuê ana Ê Đê”

Tơdah dhar kreh jing tur kơ klei hdĭp, klei pia alê khua êbŭng mda čăt, jing leh klei bhiăn gơ̆. Hlăm lu boh ƀuôn čar Daklak, hđeh gưl mrâo lŏ dơ̆ng čuê aê ama pô bŏ hŏng klei đăo knang lehanăn mơak mñai. Y Krông Hin Niê, ti buôn Tơng Jú, ƀuôn hgŭm Ea Kao, čar Daklak hlăk dôk tui hriăm adŭ tông čing, lač;

 “hmei mâo hriăm dŭm klei tông čing mrâo, lehanăn mbĭt hŏng klei kdŏ. Kâo čang hmăng hriăm thâo ênhiang tông anei, lehanăn dŭm klei kdŏ, pioh lŏ bi lar hĭn, lehanăn mâo lu mnuih thâo mơh.”

Klei sĭt mơ̆ng dŭm boh ƀuôn dôk djă pioh, brei ƀuh tơdah knŏng tui tiŏ klei đĭ kyar bruă duh mkra, ƀiădah kƀah hĕ phŭn agha dhar kreh, klei đĭ kyar anăn msĕ si amâo mâo hơĭt ôh. Mklăk hŏng anăn, tơdah dhar kreh jing knơ̆ng, klei duh ƀơ̆ng srăng jing bruă pioh duh kơ ñu, mđĭ hĭn ai tiê mă bruă. Bruă hiu čhưn ênguê yang ƀuôn, kriê pioh čing čhar, kriê pioh djăp mta bruă djuê ana pô amâo mâo djŏ knŏng jign êlan kơ klei duah ƀơ̆ng, ƀiădah lŏ jing klei bi mguôp hlăm yang ƀuôn, mjut mjing klei jăk yâo kjăp hĭn. Mbĭt hŏng anăn hdră êlan đuĕ nao msĕ si ƀuôn hgŭm Hoà Phú, čar daklak dôk ngă ruah kơ wưng mđĭ kyar mrâo. Đỗ Xuân Hiếu, K’iăng khua knơ̆ng bruă sang čư̆ êa ƀuôn hgŭm Hoà Phú, brei thâo:

 “Ƀuôn hgŭm Hoà Phú mâo 6 boh ƀuôn anak Ê Đê hdĭp mda, adôk kriê pioh lu dhar kreh đưm. Anei amâo mâo knŏng jing ngăn dưn yuôm bhăn, ƀiădah lŏ jing boh kdrŭt yuôm bhăn pioh mđĭ kyar bruă hiu čhưn ênguê yang ƀuôn, lehanăn kriê pioh knhuah gru dhar kreh anak Ê Đê êjai hlăm klei ñŭ kma.”

Hlăm dŭm boh ƀuôn anak Ê Đê hlăm čar daklak ară anei, klei jăk yâo amâo mâo djŏ knŏng hlăm eneoh mâo hrui wĭt, amâodah mnơ̆ng dhơ̆ng mâo, ƀiădah klei mơak mơ̆ng ênai čing čhar kwang nanao, êjai dhar kreh dưi lŏ bi hdĭp, dưi lŏ čuê ngă hlăm grăp hrue. Ti krah liă lia lăn dap kngư, dŭm boh ƀuôn anăn hlăk lŏ bi mklă klei ênuah ênô, klei hdĭp kpă mtrŭn agha kjăp kyua dhar kreh, lehanăn klei jăk mơak mơ̆ng anak mnuih, anăn yơh jing giê mkă kơ keli tŭ dưn klei đĭ kyar./.