Điŏ brông, djam trŏng, mnŭ ăm, čĭm brông jing leh mnơ̆ng ƀơ̆ng huă juăt mơưng hŏng anak Ê Đê ti să Čư̆ Huê kdriêk Ea Kar mbĭt hŏng lu boh ƀuôn mkăn hlăm čar Daklak…  Knŏng hŏng dŭm mta mnơ̆ng ƀơ̆ng anei mâo kngan đảng viên H’Bút Bi Mlô, ti buôn M’oa, să Čư̆ Huê mkra, dŭm mta mnơ̆ng ƀơ̆ng anei bi êdah leh klei găl kơ bruă čhĭ mnia mnơ̆ng ƀơ̆ng huă, mâo ba wĭt dŭm êklai prăk hlăm grăp thŭn.

 H’Bút Bi brei thâo, ñu tuôm ngă leh bruă hlăm anôk bruă knŭk kna mâo 10 snăn thâo săng kơ klei čiăng tui duah mnơ̆ng ƀơ̆ng jăk đŏk kƀông, mơ̆ng lu hdră mkra mjing mdê mdê, mâo leh lu mnuih mơ̆ng dŭm anôk mă bruă, phung khua kiă kriê, phung duh mkra hlăm kdriêk tui duah. Mâo leh sang krum dlông, găp djuê pô, hŏng wăl sang lu ana boh siam mtah mda, snăn ñu jhŏng pŏk anôk čhĭ êsei huă hŏng dŭm mta djam mtam anak Êđê pô lehanăn lŏ čhĭ mnơ̆ng pioh bi hdơr kơ dhar kreh anak Ê Đê. Găn lu klei dleh dlan hlăm dua thŭn mơ̆ng klei ruă tưp Covid 19, sang čhĭ klei huă ƀơ̆ng mơ̆ng H’Bút Bi jing leh anôk hing ang, mâo mơ̆ng 200-300 čô mnuih nao huă hlăm grăp hrue. H’Bút Bi lač:

“Jing 1 čô đảng viên, kâo bi mguôp bruă Đảng hlăm ƀuôn, kâo khăp snăk kơ dhar kreh anak Êđê pô, kâo čhĭ mnia kphê, lehanăn mnơ̆ng ƀơ̆ng huă, lehanăn mnơ̆ng mnăm kơ tue blei lehanăn kâo hlak mblang kơ tue thâo kơ dhar kreh djuê ana pô. Leh mâo knŭk kna mtrŭt mjhar klei myơr lăn mkra êlan, gŏ sang kâo kah 1 mét mkrah hŏng boh taih 40 mét čiăng kơ mnuih ƀuôn sang pô găn êrô jăk hĭn”.

Tơdah msĕ hŏng đảng viên H’Bút Bi dưn yua jih ai ktang pioh mđĭ kyar klei duh mkra, snăn Y- Quă Mlô jing leh sa klei bi hmô mơ̆ng mnuih khua thŭn. Thŭn anei 68 thŭn, jing đảng viên mơ̆ng sui leh ti ƀuôn Tơng Kroa, dăl hlăm dŭm thŭn mlan dôk mda asei, ñu ngă bruă hlam să Čư̆ Huê. Hlŏng truh kơ jih thŭn ngă bruă, Y- Quă lŏ dơ̆ng trŭn kơ bruă lŏ hma. 8 thŭn dôk hlăm bruă pưk hma, ñu mâo rŭ mjing leh truh 2.000 phŭn kphê, 400 ƀĕ gơ̆ng tiu, êbeh 1 sào anôk pla rơ̆k pioh mčiêm êmô lehanăn bê. Ară anei grăp thŭn mơ̆ng bruă rông mnơ̆ng lehanăn pla mjing ñu mâo ba wĭt dŭm êtuh êklăk prăk. Klei hdĭp đĭ leh, ñu lŏ dơ̆ng đru kơ mnuih ƀuôn sang dôk hlăm klei dleh dlan, msĕ si ñu đru prăk, đru hdră dlăng kriê wiê ênăk mnơ̆ng pla mjing, đru mguôp hlăm bruă mkŏ mkra krĭng ƀuôn sang mrâo. Êngao anăn ñu lŏ myở dŭm êtuh met lăn pioh kơ anôk mkra êlan. Y- Quă Mlô yăl dliê, ngă djăp mta bruă yơh, kyua amâo mâo dưi wơr ôh pô jing đảng viên.

“Kâo đảng viên leh wĭt mdei, kâo ăt gĭr jih ai tiê mă bruă knuă, gŏ sang kâo pla mjing kphê, tiu, rông truh 10 drei êmô 20 drei bê. Hlăm bruă mkra knơ̆ng mbông êa, gŏ sang kâo myơr truh 2,5 ha lăn pioh ngă knơ̆ng knơ̆ng êa Ea Bư. Sa ai hŏng bruă mkŏ mkra krĭng ƀuôn sang mrâo gŏ sang hmei myơr truh 500 m2 lăn pioh mkra êlan.

Kluôm kdriêk Ea Kar ară anei mâo 7.000 čô đảng viên, hlăm anăn 1.250 čô đảng viên jing mnuih djuê ƀiă, mâo truh 18%. Tui si anôk bruă Đảng kdriêk  Ea Kar, lu phung đảng viên hlăm anôk bruă bi êdah leh bruă klam pô hlăm klei duh ƀơ̆ng, đru mguôp hlăm djăp mta bruă yang ƀuôn, bi đru duh myơr lăn ala kơ bruă mkŏ mkra krĭng ƀuôn sang mrâo ti alŭ wăl. Phung đảng viên msĕ si Y – Quă Mlô lehanăn H’Bút Bi Mlô jing phung đảng viên kdloh ƀrŏng, thâo mjing ai lar bra klei ktang mơ̆ng bruă mđĭ kyar klei duh mkra, đru mguôp hlăm bruă mkŏ mkra krĭng ƀuôn sang mrâo hlăm ƀuôn.

Y - Nhuân Byă, Khua bruă Đảng kdriêk Ea Kar brei thâo, bruă bi mŭt  đảng viên hlăm krĭng mnuih djuê ƀiă mâo nanao klei êpul bruă Đảng mđing. Wưng tinăp srăng lŏ mâo lu hĭn mnuih ngă klei thâo bi hmô mơ̆ng đảng viên, čiăng kơ mnuih ƀuôn sang hlăm ƀuôn tui hriăm, hlue ngă hlăm bruă duh ƀơ̆ng mđĭ kyar klei hdĭp mda. Y- Nhuân Byă lač:

“Kơ bruă bi mŭt Đảng viên hlăm mnuih djuê ƀiă mâo hmei dôk mđing êdi, anei jing bruă čiăng bi êngŭm phung đảng viên lŏ čuê bruă ti tluôn. Phung đảng viên ti să Čư̆ Huê krĭng mnuih djuê ƀiă jing leh phung thâo bi hmô jăk pioh kơ mnuih ƀuôn sang, lehanăn phung đảng viên tui hriăm. Hlăm dŭm anôk bi kƀĭn bruă Đảng kdriêk, hmei hưn mthâo čiăng mjing ai ktang mơ̆ng dŭm anôk bruă đảng.”

Klei bi mŭt đảng hlăm krĭng mnuih djuê ƀiă mơ̆ng dŭm êpul bruă Đảng hlăm kdriêk Ea Kar wưng leh êgao, ngă leh lehanăn hlăk lŏ mđĭ kyar kjăp hĭng anôk bruă đảng nah gŭ. Mđrĭng hŏng anăn, brei mâo nanao bruă klam, lehanăn klei ba êlan êlâo mơ̆ng phung  đảng viên hlăm djăp bruă bi ktưn duh mkra mnia mblei mbruă, đru mguôp, thâo bi đru, duh myơr lăn ala, mkra êlan klông ăt đru leh hlăm klei rŭ mdơ̆ng ƀuôn sang pô knư̆ hrue knư̆ jăk siam, kreh dhar, kriê pioh nanao dhar kreh djuê ana pô, hyuă kjăp nanao klei bi mguôp jih jang djuê ana./.