Ƀuôn K’La, să Drai Săp ăt msĕ hŏng dŭm ƀuôn mnuih Êđê mkăn ti čar Dak Lak, hŏng êlan krĭng ƀuôn sang mrâo leh anăn dŭm đang kphê ti djiêu dŭm sang krum. Ƀiădah hlăm lam ƀuôn K’la mâo klei mdê hŏng sa sang măi đeh kwă kphê hŏng mnâo ƀâo mgưi jih hruê. Anăn jing sang măi mơ̆ng knơ̆ng bruă Êđê Café.

           Y Pôt Niê – pô mkŏ mjing leh anăn khua kiă kriê knơ̆ng bruă ăt dôk tinei. Ñu bi êran mă đeh, kwă, mbĭt anăn kngan mă, kƀông blŭ, hưn mthâo kơ klei yăl dliê knơ̆ng bruă pô yua masin mrâo mrang čiăng mkra mjing dŭm mta kphê hnơ̆ng jăk.

Leh 4 thŭn čô kơ bruă, mơ̆ng sa čô nai mdrao wĭt ngă bruă kphê, Y-Pôt Niê găn lu klei dleh dlan mơ̆ng klei blŭ, kƀah ngăn prăk leh anăn klei thâo. Ñu brei thâo, ñu myun êdi êjai mơ̆ng phŭn kčưm dlăng yuôm klei ñŭ kma plah wah dhar kreh leh anăn mni mblei. Mnơ̆ng dhơ̆ng kphê đeh mbĭt hŏng klei yăl dliê kơ kpur pui, gŏ khang, êsŭng hlâo leh anăn kngan phung amĭ hlăm ƀuôn K’la êjai mkra mjing kphê anei, dưi đru leh kơ ñu duah lu phung tuê leh anăn phung ƀĭng hgŭm:

“Kâo myun êdi êjai mrâo čô̆ kơ bruă, mơ̆ng mta mnơ̆ng tal êlâo, dưi ba leh hŏng phung mâo klei khăp čiăng msĕ hŏng kâo. Diñu iêo đĭng blŭ čiăng ngă hrăm mbĭt. Leh anăn mơ̆ng anăn kâo pô dưi dăp mnuih mă bruă hlăm knơ̆ng bruă. Pô anei klam kơ krĭng pla mjing, pô dih klam bruă đeh kwă. Bi kâo pô ăt jing pô nao hriăm, mtrŭt mđĭ klei mnia mblei ti dŭm čar, nao hlăm dŭm anôk čhĭ mnia leh anăn nao mtrŭt mđĭ klei mnia mblei ti ala tač êngao”.

Klei blŭ dưi bi hluh hŏng klei hriăm amâo mâo mdei, arăng anei Y-Pôt Niê mâo leh klei jhŏng hlăm dŭm gưl nao ti Thailand, Japon, Alemang, Canada. Ƀuôn K’la ƀiă mnuih leh anăn kbưi hŏng ƀuôn prŏng Ƀuôn Ama Thuôt kăn dưi bi dleh lei Êđê Café, kyuadah mnơ̆ng dhơ̆ng mơ̆ng knơ̆ng bruă dôk dưi čhĭ hlăm dŭm mbah mnia mblei điện tử. Wăt phung mduôn ti ƀuôn K’la ară anei ăt thâo kơ hdră ngă mrâo mơ̆ng Êđê Café, ƀuh klei jăk, klei thâo mơ̆ng phung mda asei. Ama Băm, 64 thŭn, brei thâo:

Ñu thâo êdi. Kphê pĕ ksă ñu thao, pĕ ksă ñu thâo, mda ñu thâo. Tơdah pô pĕ ksă ñu blei ênoh yuôm. Pĕ mtah ênoh ênưih, ƀiădah kăn êlưih msĕ hŏng kơ tač lei. Tơdah ti tač blei 135.000 tinei ñu ăt blei mơ̆ng 136.000 – 137.000 êbâo prăk.”

Găn klei dleh dlan, hnư hrui wĭt dưi bi hơĭt grăp thŭn, Y-Pôt ƀuh hơ̆k mơak kyua dŭm klei gĭr pô dưi ba wĭt boh tŭ dưn kơ ƀuôn sang.

Dŭm hruê knhal jih thŭn 2024, Y-Pôt Niê nao hlăm klei kƀĭn trông hưn mdah online mơ̆ng bruă đoàn gưl dlông kơ klei thâo săng, bruă ngă mơ̆ng hlăk ai kơ ênuk mrâo leh anăn bruă klam mơ̆ng phung mda asei, ñu lŏ đăo knang hĭn kơ dŭm klei pô tui tiŏ srăng ba bruă kphê, ba ƀuôn êlan leh anăn phung mda asei truh kơ klei tŭ jing:

Kâo pô čiăng lŏ čuê kơ phung hđeh điêt leh anăn phung mă bruă mrâo kơ êdei anăp jing hdră mkra kphê mơ̆ng pô dưi ƀuh boh tŭ mơ̆ng bruă lŏ hma, klei yuôm bhăn mơ̆ng ƀuôn sang, čiăng kơ phung mda asei mnuih djuê ƀiă mâo klei mlih hlăm klei mĭn, ngă jăk hĭn, mđĭ kyar bruă lŏ hma ti ƀuôn sang ƀrư̆ hruê ƀrư̆ kjăp hĭn”./.