Truh kơ mlam, sa êpul ngă bruă jăk ti Gia Lai lŏ mtluk mtlak hŏng bruă msir êlan. Lê Tuấn Thành, khua êpul ngă bruă brei thâo, êlâo kơ msir dŭm bĭt êlan jhat, êpul nao ksiêm dlăng leh anăn akâo kơ bruă sang čư êa alŭ wăl, iêo mkrum ngă prăk mkra wĭt. Bruă mkra êlan ti mmăt mlam čiăng ñĕ kơ klei kpăk hlăm êlan klông.

 “Ngă sa mta bruă tŭ dưn kơ ala ƀuôn čiăng bi lar dŭm klei yuôm bhăn hŏng grăp čô, boh nik jing phung mda asei. Hlue ngă hdră “Êlan êrô êbat êđăp ênang” jing msir hĕ dŭm ƀăng blŭng, kdrêč êlan jhat čiăng đru kơ mnuih ƀuôn sang dưi êrô êbat jăk hĭn”.

Êjai êpul ngă bruă jăk kčưm ngă bruă, mnuih ƀuôn sang ăt hur har nao đru mbĭt hŏng bruă doh klei pui mtrang mngač, pom êa, đru lŭk simăng leh anăn brei êa mnăm, mnơ̆ng ƀơ̆ng kơ digơ̆ êjai mmông mdei. Nguyễn Văn Thuyết, khua êpul alŭ 10, ƀuôn hgŭm Ia Kring lač.

            “Mnuih ƀuôn sang ti alŭ wăl êlan klông lu ƀăng ƀlŭng, dleh êrô êbat, hruê anei phung êdam êra hriê đru kơ mnuih ƀuôn sang leh anăn msir hĕ dŭm bĭt ƀăng ƀlŭng, anôk jhat hmei ƀuh klei hơ̆k mơak êdi. Hmăng hmưi phung êdam êra lŏ dơ̆ng bi lar klei đru kơ mnuih ƀuôn sang dưi êrô êbăt êđăp ênang hĭn”.

            Amâo djŏ knŏng mkra êlan ti Pleiku, êpul ngă bruă jăk lŏ mkra bi jăk ti lu bĭt êlan ti dŭm kdriêk mơ̆ng čar Gia Lai. Hơ̆k mơak kyua mâo êlan dưi mkra wĭt kpă blua, ayŏng Trần Trọng Trung, ti să Ia Yok, kdriêk Ia Grai brei thâo.

        “Êlan klông jhat rai, êrô êbat dleh dlan, ăt mâo pô lĕ hlăm mnuôr êa. Êpul ngă bruă jăk hriê mkra brel êlan mnuih ƀuôn sang hơ̆k mơak êdi, leh anăn ăt kbiă đru hŏng diñu”.

Hdră “Êlan êrô êbat êđăp ênang” dưi hluê ngă mơ̆ng mlan 9/2023, truh kơ ară anei ngă leh 19 gưl msir êlan krĭng ƀuôn sang hŏng boh taih 30km ti dŭm kdriêk Ia Grai, Đak Đoa leh anăn ƀuôn prŏng Pleiku, čar Gia Lai. Hdră iêo jak dŭm êtuh čô ngă bruă jăk nao hgŭm. Aduôn Lê Kiều Thị Minh Thư, ti să Tân Sơn, ƀuôn prŏng Pleiku, sa čô hlăm êpul ngă bruă brei thâo:

 “Kâo mbĭt hŏng anak êkei nao hgŭm hŏng hdră Êlan êrô êbat êđăp ênang” đru bi msiam dŭm bĭt êlan čiăng kơ grăp čô êrô êbat găl hĭn, đru bi lar dŭm bruă ngă jăk hŏng ala ƀuôn, hŏng ai tiê duh myơr”.

Khădah bruă msir êlan bi leh ti čang rang aguah, phung hgŭm hlăm êpul ăt hơ̆k mơak. Hdră “Êlan êrô êbat êđăp ênang” amâodjŏ knŏng bi msiam êlan klông krĭng ƀuôn sang, rơ̆ng kơ klei êđăp ênang, ƀiădah lŏ čuê ai hdĭp hur har, đru rŭ mjing yang ƀuôn thâo bi mguôp./.