Djă êdeh kai mdiăng wăng kgă mơ̆ng hma wĭt kơ sang, Lương Văn Hợp, ti ƀuôn Ô Pêč, să Ia Pêč, kdriêk Ia Grai hơ̆k mơak brei thâo, êlan taih êbeh 10km nao ti să Ia Tô dôk rŭ mjing. Êlan ngă hmar msĕ sơnăn, sa kdrêč kyua 47 gŏ sang myơr lăn, ruh hĕ mnư̆, rŭ ana pla mjing čiăng pŏk phai êlan:

 “Kâo myơr leh 60 phŭn kphê, hlŏng rŭ wăt ana kphê, čăm hĕ mtih čiăng ngă êlan kơ mnuih ƀuôn sang êrô êbat, čhĭ mnia, kơ anak čô êdei anăp. Klă sĭt mâo boh tŭ dưn êdi”.

Ktuê êlan anei lu jing ana pla mjing sui thŭn mâo ênoh msĕ si kphê, ana ƀơ̆ng boh. Nguyễn Trọng Túc, ti ƀuôn O Pêč, să Ia Pêč brei thâo, êjai mâo klei mtrŭt mjhar myơr lăn, mnuih ƀuôn sang ăt hơưi mơh kyua luč sa kdrêč prăk. Ƀiădah hŏng klei hâo hưn, mtrŭt mhjar bruă mkra êlan jing boh tŭ dưn kơ mnuih ƀuôn sang dua să, đru kơ klei êrô êbat, dŭ mdiăng boh mnga, gŏ sang ñu ăt mâo klei sa ai:

 “Gŏ sang kâo ăt myơr lăn mâo boh prŏng jing 1,5m, taih 100m. Hlăm lăn anăn mâo klei ƀời lời leh anăn 60 phŭn kphê. Djiêo gŏ sang kâo, gŏ sang Nghiêm ăt myơr sa pruê̆ boh kneh hlăk mboh. Mnuih ƀuôn sang mâo sa êlan êrô găl hĭn”.

Ti să Ia Khai, kdriêk Ia Grai, êlan mkŏ nao ti să Ia Kriă ăt dôk pŏk ngă, hlăm anăn mnuih ƀuôn sang myơr lăn pŏk phai. Aduôn Nguyễn Mai Lương, khua bruă sang čư êa să Ia Khai brei thâo, mơ̆ng thŭn 2023 truh kơ ară anei, mâo êbeh 100 gŏ sang myơr lăn čiăng ngă giăm 20km êlan mlir alŭ, mlir să, êlan nao kơ anôk mkra mjing:

 “Lu gŏ sang ka thâo săng klă ăt dôk ngĭ ngơ̆. Dưn yua bruă hâo hưn, mtrŭt mjhar, bruă Đảng, bruă sang čư êa să bi kƀĭn, iêo jak phung khua mduôn, khua bruă Đảng, đa đa phung mâo kơhưm čiăng mkŏ mjing êpul hâo hưn hŏng dŭm gŏ sang anei. Hruê anei diñu ka săng, hruê êdei hmei lŏ nao”.

Ti kdriêk ƀun ƀin knông lăn Ia Grai êjai ngă dŭm bĭt êlan dơ̆ng, bruă sang čư̆ êa tuôm hŏng lu klei dleh dlan kơ ênoh prăk tla ruh mgaih anôk ala. Kyuanăn, bruă kđi čar mtrŭt mjhar, hâo hưn, iêo mthưr klei hrăm mbĭt mơ̆ng mnuih ƀuôn sang. Mơ̆ng thŭn 2022 truh kơ ară anei, dŭm êbâo gŏ sang mtơr dŭm pluh m2 lăn ngă giăm 60km êlan ti dŭm să Ia Pêč, Ia Yok, Ia O, Ia Krăi.

Nguyễn Văn Hà - Êpul čung ba mnuih ƀuôn sang bruă Đảng kdriêk Ia Grai brei thâo, mlan 10/2023, êpul khua bruă Đảng kdriêk Ia Grai ba mdah leh hdră mtrŭn mrô 15 kơ bruă mđĭ hĭn klei gĭt gai mơ̆ng gưl bruă Đảng nah gŭ hŏng bruă hâo hưn, mtrŭt mjhar mnuih ƀuôn sang myơr lăn ngă êlan ti alŭ wăl truh ti thŭn 2030. Mơ̆ng hruê mâo hdră mtrŭn, dŭm gưl bruă Đảng nah gŭ, bruă sang čư êa, êpul êya dŭm alŭ wăl mkŏ mjing êpul gĭt gai kơ bruă mtrŭt mjhar klei myơr lăn ngă êlan, mta kñăm truh ti thŭn 2030 pŏk phai êbah 600km êlan:

 “Gĭr ktưn truh ti thŭn 2025, kluôm kdriêk srăng mtrŭt mjhar mnuih ƀuôn sang myơr lăn pŏk phai êlan kdriêk, êlan să, êlan wăl krah. Mta kñăm mơ̆ng hdră mtrŭn mrô 15 jing mkŏ mjing klei mlih ktang kluôm kơ êlan klông krĭng ƀuôn sang ti alŭ wăl kdriêk truh ti thŭn 2030, rơ̆ng kơ klei êrô êbat mơ̆ng mnuih ƀuôn sang, mkŏ mjing tur knơ̆ng čiăng kơ truh ti thŭn 2030, kdriêk Ia Grai ênŭm hnơ̆ng čuăn krĭng ƀuôn sang mrâo”.

Hdră êlan kơ bruă mtrŭt mjhar mnuih ƀuôn sang myơr lăn mkra êlan ti kdriêk Ia Grai dưi ba hlăm hdră mtrŭn, hluê ngă truh kơ nah gŭ leh anăn mâo klei sa ai mơ̆ng mnuih ƀuôn sang. Anei jing tur knơ̆ng čiăng kơ kdriêk bi hmar ngă ênŭm bruă mkŏ mkra, mkŏ mjing klei kdlưn hĭn kơ bruă duh mkra – ala ƀuôn ti knông lăn Gia Lai.