Hlăm wăl prŏng truh 5 ha bruă dôk rŭ mdơ̆ng sang hră knŭk kna čiêm rông mlir gưl 1 lehanăn 2 Ia Púch, čar Gia Lai, phung lĭng kahan mbĭt hŏng phung kỹ sư, mnuih mă bruă, maoa mbha leh lu êpul ngă djăp mta bruă hlăm klei dôk rŭ mdơ̆ng msĕ si mkra adŭ hriăm, sang dlăng hră, sang pioh yua kơ lu mta bruă, sang kơ anôk phung hđeh dôk.

Dŭm kiê kngan mưng leh hŏng klei djă phao ktuang, hiu suang êwăng ti knông lăn, ảă anei jih ai tiê dôk bi đru hlăm bruă dŭ ba ƀrĭk, lŭk simăng, klia mtih, mă bruă amâo mâo mdei čiăgn pral dưi bi leh sang hră mrâo kơ phung hđeh hlăm alŭ wăl knông lăn. Sut êa hŏ ti ƀô̆ mta mđiă ƀơ̆ng, Trung úy Cao Kiến Giang, kahan kđông răng mgang knông lăn ti ƀăng jang knông lăn Lệ Thanh lač:

"Pai ngă bruă anei, phŭn tal êlâo dôk ka kjăp mơh, ƀiădah leh mâo klei ktrâo atăt mơ̆ng phung thâo leh hlăm bruă rŭ mdơ̆ng, snăn hmei dơ̆ng mghaih jih klei dleh dlan hlăm bruă knuă, lehanăn bi leh jăk bruă kčah jao. Grăp hrue nao mă bruă hŏng klei êmăn, hmei mâo klei mđing đru mơ̆ng knơ̆ng kiă kriê, mâo klei huă ƀơ̆ng djăp ênŭm, mdei msăn jăk, snăn kâo lehanăn ƀĭng kahan mă bruă mbĭt gĭr jih ai tiê hlăm bruă knuă grăp hruê.”

Trung tá Phạm Tiến Sỹ, K’iăng khua kđong răng mgang knông lăn Ia Pnôn- nao đru hlăm bruă rŭ mdơ̆ng brei thâo:  Êpul lĭng kahan nao đru, mâo mbha dŭm bruă djŏ guôp hŏng klei thâo lehanăn klei dưi mơ̆ng grăp čô mnuih. Mbĭt anăn mâo klei bi mguôp kjăp hŏng êpul êya kiă kriê bruă rŭ mdơ̆ng čiăng kơ bruă knuă mâo ngă hŏng klei jăk. Bruă nah tluôn ăt dưi mprăp bŏ hŏng klei jăk, mơ̆ng anôk huă ƀơ̆ng, mdei msăn, kñăm đru kơ phung lĭng kahan hơĭt ai tiê đru hlăm bruă rŭ mdơ̆ng sang hră:

"Hmei hgŭm hŏng êpul êya rŭ mdơ̆ng, tiŏ nao lĭng kahan đru hŏng klei djŏ guôp, mâo klei kreh knhâo, rơ̆ng kơ jih jang bruă dưi mbha ngă hŏng klei jăk, bi leh bruă kčah jao. Anei jing bruă čuăn kđi čar yuôm bhăn snăk, jing ai tiê klei khăp mơ̆ng phung lĭng kahan hŏng mnuih ƀuôn sang ti knông lăn. Hmei mâo nanao klei mjuăt bi hriăm phung lĭng kahankơ klei yuôm bhăn bruă kđi čar, klei đru ba yang ƀuôn lehanăn klei thâo khăp hlăm bruă knuă. Mơ̆ng anăn mjing kơ ayŏng adei klei thâo gĭr mghaih msir jih jang klei dleh dlan, bi leh jăk bruă kčah jao.”

Čiăng dưi đru dŭm alŭ wăl lehanăn êpul êya rŭ mdơ̆ng bi leh pral sang hră êlâo kơ hrue kčah, mơ̆ng krah mlan 5/2026 truh kơ ară anei, mbĭt hŏng êpul lĭng kahan răng mgang knông lăn, knơ̆ng bruă kiă kriê kahan čar Gia Lai, Quân đoàn 34 lehanăn kahan ksiêm čar Gia Lai mâo tiŏ nao leh êbeh 500 čô knuă druh lĭng kahan nao đru ti 7 boh sang hră dôk rŭ mdơ̆ng. amâo mâo knŏng nao đru hlăm bruă rŭ mdơ̆ng, dŭm êpul êya lŏ maoa klei mjuăt bi hriăm, bi kjăp phung knuă druh, lĭng kahan thâo săng klă klei yuôm bhăn mơ̆ng bruă rŭ mdơ̆ng sang hră, hlue gưt kjăp klei bhiăn mă bruă, mpŭ kơ klei bhiăn djuê ana tinăn. Mơ̆ng anăn lŏ mđĭ hĭn klei thâo bi mguôp lĭng kahan hŏng mnuih ƀuôn sang, păn kjăp klei êđăp ênang bruă kđi čar, lehanăn klei êdăp ênang yang ƀuôn ti knông lăn. Hạ sĩ Hà Minh Hùng, kahan răng mgang knông lăn ti kđông Ia Chía, brei thâo:

"Hlăm klei mă bruă, kâo bŏ hŏng klei gĭr hlăm klei êđăp ênang kơ mnuih lehanăn kơ mnơ̆ng mă bruă. Hŏng asei mlei kâo pô lehanăn ƀĭng kahan mbĭt hmei mâo leh klei mjuăt bi hriăm mơ̆ng gưl khua kiă kriê, kơ klei yuôm bhăn mơ̆ng bruă rŭ mdơ̆ng sang hră hlăm krĭng knông lăn čiăng đru kơ phung hđeh mâo anôk hriăm hră mơar jăk hĭn, gĭr mghaih msir klei dleh dlan pioh bi leh bruă kčah jao.”

Bruă rŭ mdơ̆ng 7 boh sang hră knŭk kna čiêm rông mlir gưl 1 lehanăn 2 ti dŭm boh ƀuôn hgŭm hlăm knông lăn čar Gia Lai mâo ênoh bi liê jih jang êbeh 1.500 êklai prăk. Truh ară anei, kluôm jih bruă rŭ mdơ̆ng mâo bi leh truh 47% hnơ̆ng bruă knuă. Khădah phung rŭ mdơ̆gn ktuh êyuh leh jih ai tiê, kdrăp mă bruă, lehanăn mnuih mă bruă hnơ̆ng klei rŭ mdơ̆ng ăt dôk êmưt mơ̆ng 15 truh 40 hrue mkă hŏng hdră kčah.

Klei mâo phung lĭng kahan nao dru hlăm bruă rŭ mdơ̆ng, kñăm čiăng bi leh bruă rŭ mdơ̆ng sang hră djŏ hŏng hrue kčah mơ̆ng čar. Nguyễn Trung Quyến, pô bi ala mơ̆ng êpul êya rŭ mdơ̆ng ti sang hră knŭk kna čiêm rông mlir gưl 1 lehanăn 2 Ia Púch, lač:

"Wưng bi kcah čiăng bi leh bruă rŭ mdơ̆ng giăm leh. Êlâo hĭn jing mŭt hlăm yan hjan leh, snăn klei mă bruă hŏng klei pral lehanăn mjêč jing yuôm bhăn, gĭrr yơh. Snaen ară anei hŏng hdră jing lŏ tiŏ hriê mnuih mă bruă. Klei mâo lĭng kahan hriê phung rŭ mdơ̆ng mă bruă jing đru mdul leh klei ktrŏ kơ phung rŭ mdơ̆ng, sĭt nik bruă knuă srăng pral hĭn dưi bi leh bruă knuă.”

Bruă mâo êpul kahan răng mgang knông lăn, lehanăn êpul kahan ksiêm čar Gialai nao đru hlăm klei rŭ mdơ̆ng sang hră, amâo mâo djŏ knŏng dưi ruh mgaih klei dleh kpăk kơ klei amâo mâo djăp mnuih rŭ mdơ̆ng, mđĭ bruă knuă pral hĭn, hlăm anăn lŏ mâo klei bi êdah bruă klam, klei sa ai mơ̆ng êpul lĭng kahan hŏng bruă sang hră mơar krĭng knông lăn tĭng nah yŭ čar Gia Lai.