Nao hlăm êlan betong giăm 1km, prŏng 4m, mkŏ mơ̆ng ƀuôn Myah truh kơ anôk duh mkra, Ksor Jinh (kkiêng thŭn 1950, ti să Ia Krai, kdriêk Ia Grai) brei thâo, mâo hŏng anei 1 thŭn, anei jing êlan lăn knŏng prŏng mă 2m, bŏ hŏng ƀhŭl hlăm yan không bhang, lehanăn êbhơr kdlŭt hlăm yan hjan êjai nao hlăm pưk hma.

Leh mâo bruă sang čư̆ êa să hưn mdah kơ bruă knŭk kna đru mnuih ƀuôn sang mkra êlan betong, Ksor Jinh jing pô ba êlan êlâo myơr truh 100m2, lu mnuih hlăm ƀuôn đăo knang, lehanăn čŏng myơr mơh truh dŭm êtuh met lăn pioh lŏ pŏk phai êlan: “Êlâo dih êlan klông bŏ hŏng klei dleh dlan, anak aneh nao sang hră suăi êmăn, mnuih prŏng nao sang mnia blei braih gui hŏng bŭng êbat jơ̆ng suăi êmăn. Mơ̆ng leh mâo gưl bi tuôm hŏng phung ƀuôn sang, să nao ksiêm dlăng êlan klông mnuih ƀuôn sang hdĭp, să mâo leh mơh hdră êlan čiăng mkra êlan, leh kơ anăn mtrŭt mjhar mnuih ƀuôn sang myơr lăn, rŭ hĕ phŭn kphê, kñŭl mâo anôk čiăng pŏk phai êlan, snăn lu mnuih hŏng klei mơak tui hlue. Truh kơ ară anei êlan mâo pŏk phai, dlăng kơ phung anak nao kơ sang hră mơak mñai, snăn hơĭt mơh ai tiê, lehanăn jing jăk găl kơ mnuih ƀuôn sang dŭ mdiăng boh mnga mơ̆ng pưk hma”.

Bi ti ƀuôn Nŭ, să Ia Khai, kdriêk Ia Grai, ăt mơ̆ng klei bi myơr lăn pioh mkra êlan snăn akŏ thŭn 2023, êlan bê tông boh taih 800 met, prŏng 4 met dưi bi leh êlâo kơ yan pĕ kñŭl. Rơ Châm H'Monh, mnuih mâo k'’ưm ti ƀuôn Nŭ brei thâo, leh bruă sang čư̆ êa alŭ wăl mtrŭt mnuih ƀuôn sang myơr lăn, pŏk phai êlan klông, snăn lu gŏ sang bi kdơ̆ng hŏng klei myơr lăn, kyuadah srăng rŭ hĕ dŭm êtuh phŭn kñŭl ngă luič leh ênoh pô srăng mâo ba wĭt êdei anăp. H'Monh ngă mtam klei bi hmô êlâo, rŭ hĕ truh 19 phŭn kñŭl gŏ sang ñu, lehanăn mtrŭt ayŏng adei ngă msĕ snăn mơh, boh nik hŏng amuôn adei hlăm găp djuê ngă êlâo. Mơ̆ng anăn, mbĭt hŏng klei êpul kiă kriê ƀuôn mtrŭt mjhar, 20 gŏ êsei mnuih ƀuôn sang rŭ leh giăm 300 phŭn kñul dua nah êlan, kñăm pŏk êlan bi prŏng hĭn. H'Monh brei thâo: “Mơ̆ng leh mkŏ mkra krĭng ƀuôn sang mrâo, hlăm ƀuôn mâo leh lu klei bi mlih, mâo klei đru mơ̆ng knŭk kna mâo mkra leh êlan klông prŏng lehanăn siam hĭn. Ară anei lu êlan klông hlăm ƀuôn mâo ngă hŏng betong leh sơăi. Bi gŏ sang kâo ăt myơr lăn hŏng arăng mơh, mâo rŭ leh dŭm phŭn kñul čiăng đru bi pŏk êlan. Bi dŭm gŏ sang mkăn tơdah mâo knŭk kna brei myơr lăn, rŭ mnơ̆ng pô pla snăn mnuih ƀuôn sang bi tui ngă mơh, kyuadah mnuih ƀuôn sang thâo săng, knŭk kna ăt čiăng mjing djăp klei găl kơ mnuih ƀuôn sang mâo êlan klông prŏng lehanăn siam. Kâo bŏ hŏng klei mơak, lehanăn lač jăk kơ bruă sang čư̆ êa mâo klei đru mơh”.

Kñăm bi leh hdră lăn čar kñăm kơ bruă mkŏ mkra krĭng ƀuôn sang mrâo lehanăn mđĭ kyar klei hdĭp mda krĭng mnuih djuê ƀiă lehanăn krĭng čư̆ chiăng, lu thŭn hŏng anei leh, dŭm gưl bruă Đảng, bruă sang čư̆ êa kdriêk Ia Grai, čar Gia Lai iêo mthưr leh klei bi mguôp mơ̆ng jih jang dơ̆ng mơ̆ng bruă kđi čar, mnuih ƀuôn sang lehanăn phung duh mkra. Hlăm anăn, mta kñăm phŭn mơ̆ng kdriêk jing duh mĭn kơ krĭng mnuih djuê ƀiă, krĭng dleh dlan jing tal êlâo, mkra mtam êlan klông, mjing knơ̆ng kơ klei mđĭ kyar klei hdĭp mda. Mơ̆ng klei anăn mơh, bruă bi myơr lăn pioh mkra êlan, lehanăn lu mta bruă mkăn mâo leh klei mnuih ƀuôn sang tŭ ư, sa ai mbĭt bi mă bruă. Hjăn mơ̆ng thŭn 2020 truh kơ ară anei kluôm kdriêk mâo mtrŭt mjhar leh dŭm êbâo gŏ sang mnuih ƀuôn sang myơr êbeh 20.000 m2 lăn. Hlăm ênoh anăn, mâo dŭm boh să mnuih djuê ƀiă msĕ si Ia Krai, Ia Khai, Ia Yok, Ia O... jing leh anôk mâo lu hdră êlan ngă bruă jăk hĭn, ba wĭt leh lu klei tŭ dưn. Hlue anăn, knuă druh, đảng viên, mnuih mâo k'hưm, khua mduôn jing phung kdlưn hĭn mâo nanao klei ba anăp hlăm bruă mtrŭt mjhar, mơ̆ng anăn mjing klei bi sa ai, klei mnuih ƀuôn sang đăo knang. Nguyễn Mai Lương- Khua să Ia Khai, kdriêk Ia Grai brei thâo:  “Să bi kƀĭn leh hŏng phung khua mduôn, khua bruă Đảng, boh nik hŏng phung mâo k’hư̆m hlăm ƀuôn sang. Êjai klei ngă bruă anăn jing tui tiŏ hdră êlan ngă ƀrư̆ ƀrư̆, kñăm kơ jih jang mnuih bi thâo săng, ară anei diñu ka thâo săng nik, mgi dih hmei lŏ hriê mđĭ ai mtô mblang, lehanăn tiŏ nao lu knuă druh mkăn htriê bi kčĕ đru. Tơdah mnuih hlăm gŏ sang anăn dôk hlăm êpul phung ngă lŏ hma, êpul hgŭm bruă mniê, snăn mâo khua kiă kriê êpul hgŭm mdê mdê anăn đru bi kčĕ brei klei, čiăng kơ jih jang mnuih thâo săng”.

Êlan klông knư̆ hrue knư̆ jăk siam, đru leh klei găl ênưih kơ klei bi êrô hiu, čhĭ mnia plah wah dŭm krĭng, boh nik ƀuôn sang krĭng taih kbưi, krĭng mnuih djuê ƀiă jăk găl hĭn, anăn yơh jing knơ̆ng pioh kơ êpul bruă Đảng, bruă sang čư̆ êa lehanăn mnuih ƀuôn sang krĭng knông lăn ƀun ƀin Ia Grai gĭr bi mkŏ mjing klei hdĭp mda knư̆ hrue knư̆ trei mđao jăk siam./.