Tĭng truh kơ akŏ thŭn 2025, dang mtei hlăm čar Gia Lai truh 7.300 ha,  mâo jih jang truh 237.000 tôn. Knơ̆ng bruă Hưng Sơn  hlăk dôk pla mjing 550 ha mtei ti dŭm kdriêk Đăk Đoa lehanăn Chư Prông, čar Gia Lai. Grăp thŭn, knơ̆ng bruă mâo čhĭ kơ ala tač êngao hlăm brô 20.000 tôn mtei kơ dŭm ala čar Japon, Dhŭng Korea. Tĭng hlăm thŭn anei, lehanăn thŭn tinăp srăng mâo truh 35.000 tôn. Nguyễn Quang Anh, Khua êpul gơ̆ng bruă kiă kriê mơ̆ng knơ̆ng bruă, brei thâo kyua leh ba yua hdră krih êa bi thư mơ̆ng Israel, ba yua drone gang mkhư̆ klei hluăt ƀơ̆ng mnơ̆ng ngă, snăn mtei mơ̆ng knơ̆ng bruă dưi čhĭ leh kơ dŭm ala čar mâo klei bhiăn kjăp.

 “Krĭng lăn hrah bazan jing găl guôp hŏng ana mtei, mtei ba wĭt boh tŭ dưn jăk, čiăng dưi mâo mtei lu lehanăn jăk, snăn bi mâo hdră mă bruă kjăp ksiêm dlăng klei hluăt ƀơ̆ng mnơ̆ng ngă bi ktang, lehanăn mjut mjing klei čăt đĭ mơ̆ng ana mtei. Ară anei hlăk mâo čhĭ leh kơ ala čar Dhŭng Korea, japon, China lehanăn Krĭng msăt boh lăn . Knŏng hlăm 4 ala čar anăn ăt ka djăp mơh mtei pioh čhĭ”.

Kluôm čar Gia Lai ara anei mâo leh êbeh 50 anôk bruă dôk mkŏ mjing lehanăn pla êbeh 8.500 ha, hŏng ênoh bi liê jih jang êbeh 10.000 êklai prăk. Hlăm anăn, Êpul grŭp Hoàng Anh Gia Lai pla mjing lu hĭn. Ară anei êpul grŭp hlăk dôk pla truh 7.000ha ti Gia Lai, Lào lehanăn Campuchia. Nguyễn Ngọc Mai, Khua knơ̆ng bruă rông mnơ̆ng Gia Lai (hlăm êpul grŭp Hoàng Anh Gia Lai), brei thâo, hŏng lăn jăk, mtei knơ̆ng bruă čăt đĭ siam.

“Krĭng pla mtei mjeh mơ̆ng dhŭng amrĭk mâo knơ̆ng bruă pla mjing hlăm lăn hrah bazan hlăm krĭng lăn mâo hnơ̆ng dlông kbưi hŏng êlah êa ksĭ jing 800m jing anôk jăk găl êdi kơ bruă pla mtei djuê mơ̆ng dhŭgn amrĭk . Kyua mâo hnơ̆ng boh dlông jăk, lăn čăt đĭ, snăn mtei jing mâo klei jăk hĭng mkă hŏng anôk pla mkăn”.

Ară anei, mtei mơ̆ng Gia Lai ară anei mâo čhĭ leh truh kơ Japon, Dhŭng Korea Krĭgn Msăt Boh Lăn… brei ƀuh klei bi ktưn lehanăn hnơng jăk mơ̆ngmtei djăp ênoh čuăn mơ̆ng ala tač êngao. Đào Thị Thu Nguyệt, K’iăng khua knơ̆ng bruă duh mkra mnia mblei čar Gia Lai, lač:

“Mtei ară anei hlăk jing mnơ̆ng čhĭ jăk mơ̆ng lăn dap kngư hlăm anăn mâo čar Gia Lai. Ară anei čar Gia Lai hlăk dôk lŏ tui duah anôk čhĭ kơ ala tač êngao lu hĭn .”

Hŏng klei jăk găl mơ̆ng lăn ala yan adiê, lehanăn hdră mă bruă hŏng kdrăp mrâo mrang mtei hlăk mjing klei găl kơ pô mâo čar Gia Lai ba čhĭ kơ ala tač êngao. Klei duh bi liê bruă nah gŭ, pŏk mlar klei bi hgŭm mă bruă, kñăm mđĭ hĭng klei tŭ dưn duh mkra mnia mblei, boh nik klei ba čhĭ kơ ala tač êngao, đru kơ klei mđĭ kyar bruă lŏ hma, bruă mkŏ mkra krĭng ƀuôn sang mrâo hlăm alŭ wăl./.