Êdah êdi jing H’Blim ti ƀuôn Mơ Nú, să Čư̆ Á. Jing gŏ sang ƀun klei hdĭp dleh dlan, thŭn 2023, gŏ sang ñu mâo bruă sang čư̆ êa alŭ wăl đru brei sa drei êmô ana mđai. Hŏng hdră dlăng kriê jăk, êmô anei mđai leh sa drei, srăng jing hnư hrui wĭt hơĭt kjăp kơ gŏ sang hlăm êdei anăp.

“Klei hdĭp gŏ sang êlâo adih dleh dlan, kyua amâo mâo lŏ hma snăn amâo dưi mđĭ kyar ôh bruă duh mkra. Giăm anei mâo klei đru mơ̆ng bruă sang čư̆ êa alŭ wăl đru leh kơ gŏ sang ñu êmô ana mđai, leh sa wưng rông snăn êmô anei đĭ prŏng, čang hmăng srăng truh mđai, čiăng kơ klei hdĭp gŏ sang dưi mkra mđĭ hĭn.

 Mâo hdră êlan đru, ƀuôn prŏng Pleiku mkăp leh Hră ênua mdrao mgŭn kơ 100% gŏ sang ƀun lehanăn giăm ƀun. Phung anak čô hlăm gŏ sang anei amâo tĭng tla ôh prăk tăk hriăm hră. Trần Thị Út, Kơiăng khua Anôk bruă sang čư̆ êa ƀuôn hgŭm Chi Lăng, ƀuôn prŏng Pleiku brei thâo, knuă druh ktrâo lač leh kơ mnuih ƀuôn sang bi mlih mnơ̆ng pla djŏ guôp, pŏk dŭm adŭ mjuăt bi hriăm lehanăn mjing klei găl čan prăk hŏng ênoh prăk mnga hdjul.

“Bruă sang čư̆ êa alŭ wăl hlăk lehanăn dôk mđing dŭm hdră đru mđĭ kyar bruă duh mkra, mđĭ hnơ̆ng tŭ jăk bruă dlăng kriê klei suaih pral lehanăn mkra mđĭ anôk bruă nah gŭ kơ 3 boh ƀuôn mnuih djuê ƀiă. Alŭ wăl iêu mthưr leh phung thâo bi đru 7 boh sang, mnuih ƀuôn sang mkra mđĭ hnơ̆ng tŭ jăk klei hdĭp. Đru kơ mnơ̆ng pla lehanăn mnơ̆ng rông djŏ guôp hŏng dŭm klei găl mơ̆ng 3 boh ƀuôn kñăm mđĭ hnư hrui wĭt lehanăn bi hơĭt klei hdĭp mnuih ƀuôn sang.

Ƀuôn prŏng Pleiku đru leh kơ dŭm phung knŭk kna dlăng ba čan prăk hŏng giăm 11 êklai hŏng ênoh prăk mnga hdjul. Keh kyua mnuih ƀun ăt đru rŭ mdơ̆ng lehanăn mkra 95 boh sang mâo ênoh êbeh 4,7 êklai prăk. Dŭm gru bi hmô duh ƀơ̆ng dưi pŏk ngă hŏng êbeh 770 êklăk prăk. Nguyễn Triều Quang, Kơiăng khua knơ̆ng prăk đru ba yang ƀuôn čar Gia Lai mñă srăng mđing duah djăp klei găl kơ anôk mkăp prăk čan, boh nik hdră duah bruă mă kơ mnuih ƀuôn sang.

“Êpul đru kčĕ hŏng bruă Đảng ƀuôn prŏng, Êpul gơ̆ng bruă ƀuôn sang, Anôk bruă sang čư̆ êa mkăp prăk kơ alŭ wăl čiăng brei mnuih ƀuôn sang hlăm alŭ wăl dưi dưn hdră čan anei. Tĭng truh kơ ară anei, ênoh prăk brei čan mơ̆ng bruă anei mâo 402 êklai prăk, hlăm anăn ngăn prăk mơ̆ng čar lehanăn ƀuôn prŏng mâo 51 êklai prăk, mđing kơ hdră brei čan prăk hŏng ênoh prăk mnga hdjul.

Pleiku mkŏ mkra leh sa hdră hjăn kñăm mđĭ hdră bi hrŏ ƀun hơĭt kjăp, mđĭ hnơ̆ng tŭ klei hdĭp mnuih ƀuôn sang, boh nik jing dŭm boh ƀuôn mnuih djuê ƀiă wưng thŭn 2021 - 2025. Bruă iêu mtrŭt jih anôk bruă kđi čar, pral čih mkra hdră kčah bi hrŏ ƀun wưn sui lehanăn ba yua tŭ dưn phŭn mkăp prăk čan mơ̆ng dŭm hdră ala čar kñăm jing mta phŭn kơ klei tŭ jing hlăm hdră bi hrŏ ƀun hơĭt kjăp mơ̆ng ƀuôn prŏng. Trịnh Duy Thuân, Khua bruă Đảng ƀuôn prŏng Pleiku, brei thâo:

“Mơ̆ng akŏ wưng păn bruă truh kơ ară anei, ƀuôn prŏng mđing gĭt gai, pŏk ngă kjăp hdră bi hrŏ ƀun hơĭt kjăp mguôp hŏng dŭm hdră ala čar kñăm dưi mâo leh dŭm boh tŭ klă sĭt. Ênoh gŏ êsei ƀun hlăm krĭng mnuih djuê ƀiă lehanăn gŏ sang ƀun hlăm kluôm alŭ wăl hrŏ pral. Anei jing klei gĭr ktưn prŏng mơ̆ng dŭm gưl mguôp hŏng bruă hluê ngă dŭm Hdră ala čar kñăm.

Hŏng dŭm klei gĭr amâo mdei, ƀuôn prŏng Pleiku dôk truh giăm leh hŏng mta kñăm bi hrŏ ƀun hơĭt kjăp. Dŭm hdră mtrŭn lehanăn hdră đru mđĭ lar leh boh tŭ dưn, đru mguôp mkra mđĭ klei hdĭp mnuih ƀuôn sang, boh nik hŏng mnuih ƀuôn sang djuê ƀiă./.