Hlăm 2 hruê kăm nao ti Čư̆ Pơ̆ng, kdriêk Krông Bŭk, čar Dak Lak, 15 čô êdam êra ngă bruă hlăm hdră bruă yan mdei prŏng mtah gưl čar mbĭt hŏng alŭ wăl dưi bi leh 4 hdră bruă êdam êra. Khădah yan adiê amâo mâo jăk, ƀiădah diñu ăt hur har đru ngă êlan nao ti pin êa leh anăn waih êmiêt, bi doh pin êa, mkra tač bê tông, tač pah boh kơ wăl sang dhar kreh. Truh kơ mlam, diñu lŏ mkăp mmông ksiêm wĭt klei hriăm kơ phung hđeh, mkŏ mjing 8 klei bi tuôm hlăp lêñ bi mguôp hŏng hâo hưn klei bhiăn lăn čar. Y-Hlý Niê Kdăm, Khua bruă êdam êra să Čư̆ Pơ̆ng, kdriêk Krông Ƀŭk brei thâo:

       “Thŭn anei să Čư̆ Pơ̆ng srăng truh hnơ̆ng krĭng ƀuôn sang mrâo, kyuanăn dŭm bruă mkŏ mkra, hdră bruă phung êdam êra đru hlăm să jing čiăng êdi čiăng hrăm mbĭt nao hgŭm bi leh jih jang dŭm klei găl truh hnơ̆ng hlăm thŭn anei. Êjai phung găp hriê ti alŭ wăl amâo djŏ knŏng bi lar rup siam kơ bruă răng mgang wăl hdĭp mda, mtô kơ phung hđeh ƀiădah lŏ bi êdah ai tiê hur har, bi râo klei đăo knang kơ phung mda asei, hrăm mbĭt đru mguôp kơ yang ƀuôn”.

Ti kdriêk Lăk, 15 čô êdam êra mơ̆ng čar wĭt đru leh kơ ƀuôn Dak Sa, să Dak Nuê. Anei jing ƀuôn mâo 100% mnuih Mông hriê dôk mơ̆ng krĭng Dưr, klei hdĭp mda adôk mâo lu klei dleh dlan, ka mâo pui kmlă leh anăn êlan klông. Phung êdam êra bi mbha êpul hâo hưn kơ klei bi dôk ung mô̆ mơ̆ng mda, gang mkhư̆ klei ruă tưp, đru kơ gŏ sang hrui êmiêt boh mnga, kriê dlăng đang kphê. Pok adŭ hriăm yan mdei prŏng kơ 40 čô hđeh hlăm ƀuôn, mbĭt hŏng mnuih ƀuôn sang mkra wĭt 5 km êlan ƀuôn, jah waih đa đa bĭt êlan mlir ƀuôn leh anăn pla 100 phŭn ana êgiêr ktuê êlan. H Me Tơr, ti să Dak Nuê, kdriêk Lak brei thâo:

   “Gru kruăk mơ̆ng diñu jing klei hur har. Ti alŭ wăl ka mâo pui kmlă, ka mâo êa, ka mâo êlan klông, diñu bi mđŭ êa hjan, guôn êa hjan čiăng mnei hgei, dŭ êa čiăng tŭk knă. Ƀiădah diñu mâo klei hơ̆k mơak, amâo mâo uêñ kơ hruê mlam hur har nao hgŭm hlăm dŭm hdră bruă amâo tuôm mâo klei hngah kyua anôk anei amâo mâo êa, amâo mâo pui kmlă”.

Hlăm hdră bruă êdam êra yan mdei prŏng thŭn anei, mbĭt hŏng êbeh 7.000 čô êdam êra ngă bruă ti alŭ wăl, bruă đoàn čar Dak Lak lŏ tiŏ nao 180 čô êdam êra nao đru kơ 6 să hlăm 6 kdriêk. Mbĭt hŏng anăn jing 6 êpul thơ̆ng kơ bruă hâo hưn, mlih mrô ala ƀuôn, kriê pioh knhuah gru dhar kreh djuê ana, ñŭ kma tar rŏng lăn, phung knhâo mda asei, kyua phung hđeh khăp hơiêng. Hluê anăn, ngă leh dŭm pluh hdră bruă, bruă knuă klă klơ̆ng. Ayŏng Lê Pas Tơr, k’iăng khua bruă đoàn čar, khua êpul gĭt gai hdră bruă bi klă:

        “Mâo leh lu bruă mkŏ mkra, hdră bruă, boh nik hlăm wưng dua hruê kăm trŭn kơ bruă yan adiê amâo mâo jăk, adiê hjan lu. Ƀiădah phung êdam êra ăt mâo klei mbruă hlăm bruă pô leh anăn mbha hruê čiăng ngă dŭm mta bruă djŏ hŏng mta phŭn hâo hưn klei bhiăn lăn čar kơ nah gŭ leh anăn klei bi kƀĭn phung êdam êra leh anăn lŏ mtô kơ phung hđeh”.

          Hŏng phung êdam êra, anei jing yan mdei prŏng yuôm bhăn, đru mkŏ mjing dŭm knhuah siam hlăm yang ƀuôn. Pô hriăm gưl prŏng Đặng Thị Phương Thảo (ti sang hră gưl prŏng Ngoại ngữ - Tin học ƀuôn prŏng Hồ Chí Minh brei thâo:

       “Yan mdei prŏng thŭn 2024 anei hŏng kâo amâo djŏ knŏng jing yan mdei prŏng čŏng nao ngă bruă ƀiădah lŏ jing klei găl čiăng đĭ hriê kơ prŏng, đĭ kyar hĭn, brei kơ pô sa klei hdĭp tŭ dưn leh anăn klei tŭ yuôm hlăm yang ƀuôn. Kâo dôk mă bruă online kơ hdră bruă yan mdei mtah ƀuôn prŏng Hồ Chí Minh leh anăn mă bruă tinei, duh myơr kơ yan mdei prŏng ƀuôn sang. Hlăm klei mă bruă hŏng êpul, grăp mmông ngă bruă kâo dưi hriăm sa mta mrâo”.

Hdră bruă yan mdei prŏng thŭn anei ti čar Dak Lak mjưh ruĕ mâo lu gru kruăk knăl jăk siam hlăm ai tiê bruă sang čư êa leh anăn mnuih ƀuôn sang ti dŭm alŭ wăl. Dŭm hdră bruă mơ̆ng phung êdam êra amâo djŏ knŏng đru mguôp hluê ngă dŭm mta bruă bi hơĭt klei hdĭp yang ƀuôn, ƀiădah lŏ bi lar klei siam kơ ênuk mda asei, klei duh myơr mơ̆ng phung mda asei čar Dak Lak kyua klei hdĭp yang ƀuôn.