Hŏng êbeh 10 êklai prăk mơ̆ng Hdră ala čar knăm mâo mkăp leh pioh mđĭ kyar bruă duh mkra – ala ƀuôn krĭng mnuih djuê ƀiă, să krĭng 3 Êa Hiu, kdriêk Krông Pač, čar Dak Lak mkra leh 9 bĭt êlan hŏng bêtông ti krĭng ƀuôn sang mâo boh tiah giăm 5,4 km. Bruă mkra mđĭ dŭm kdrêč êlan anei amâo djŏ knŏng mprăp jăk kơ klei găn êrô, dŭ mdiăng mnơ̆ng lŏ hma ƀiădah lŏ đru bi mkŏ êlan klông plah wah dŭm alŭ, ƀuôn. H’Ninh Êban, mnuih ƀuôn sang ti să Êa Hiu brei thâo:

 “Êlâo adih êlan kdlŭt kdlăt, mâo mkra êlan anei hmei m’ak êdi, anak čô nao sang hră, êrô êbat găl ênưih mơh lehanăn hlăm yan puôt wiă mnuih ƀuôn sang mdiăng mdiê amâo dah mdiăng mnơ̆ng lŏ hma jăk găl mơh”.

Hdră mkra êlan klông ti Êlan dơ̆ng prŏng mrô 27 truh kơ ênao êa ƀuôn Biăp, să Yang Tao, kdriêk Lăk, čar Dak Lak ăt dưi duh bi liê mơ̆ng Hdră ala čar kñăm pioh mđĭ kyar bruă duh mkra – ala ƀuôn krĭng mnuih djuê ƀiă mkăp brei. Hdră anei mâo boh tiah giăm 3 km nao mŭt truh kơ drai êa Bìm Bịp, sa hlăm dŭm anôk lăn mnga êa m’ak hing ang êdi ti kdriêk Lăk. Hdră anei dưi ngă leh hlăm thŭn 2023. Mra Liêng, mnuih ƀuôn sang hlăm să brei thâo, leh kdrêč êlan anei dưi ngă, êdeh êdâo dưi nao truh ti gŭ jơ̆ng drai êa, găn êrô jăk găl snăn hnơ̆ng tuê hiu čhưn hlăm drai êa đĭ hĭn mkă hŏng êlâo, đru mguôp kơ hdră mđĭ kyar bruă duh mkra alŭ wăl.

 “Mâo êlan klei găn êrô jăk găl. Ƀuôn sang ară anei siam leh, kâo ƀuh m’ak êdi.

Mơ̆ng thŭn 2022 truh kơ ară anei, prăk mơ̆ng Hdră ala čar kñăm pioh mđĭ kyar bruă duh mkra – ala ƀuôn krĭng mnuih djuê ƀiă, kdriêk Lăk, čar Dak Lak dưi mkra leh 37 mta bruă kơ klei duh mkra pla mjing, klei hdĭp hlăm krĭng mnuih djuê ƀiă, hŏng ênoh êbeh 75 êklai prăk. Dŭm hdră anei mjing leh anôk bruă nah gŭ bi knar, mđrăm mbĭt, mjing klei găl ba yua jih klei mâo ti alŭ wăl hlăm hdră mđĭ kyar bruă lŏ hma lehanăn hiu čhưn ênguê. Nguyễn Anh Tú, K’iăng khua bruă sang čư̆ êa kdriêk Lăk, čar Dak Lak lač:

 “Êlan klông jăk găl đru mjing leh klei găl kơ bruă dŭ mdiăng mnơ̆ng dhơ̆ng. Tal dua jing bi hrŏ ênoh prăk bi liê hlăm bruă dŭ mdiăng. Snăn, boh tŭ mơ̆ng klei duh bi liê kơ bruă êlan klông ba wĭt leh hnư hrui wĭt kjăp. Wăl hdĭp mda jăk siam hĭn.

 Hdră ala čar kñăm mđĭ kyar bruă duh mkra – ala ƀuôn krĭng mnuih djuê ƀiă đru mđĭ leh hnơ̆ng tŭ kơ klei hdĭp krĭng mnuih djuê ƀiă lehanăn krĭng čư̆ čhiăng čar Dak Lak. Thŭn 2023, ênoh gŏ êsei ƀun hrŏ mơ̆ng 26,7% trŭn adôk 19,7%, hrŏ 7% mkă hŏng knhal jih thŭn 2021. Boh nik, dŭm bruă mkra êlan klông mâo duh ti krĭng mnuih djuê ƀiă, krĭng dleh dlan hlăm čar dôk mjing boh kdrŭt čiăng kơ mnuih ƀuôn sang mđĭ kyar bruă duh mkra, ala ƀuôn, đru bi hrŏ ênoh gŏ êsei ƀun hlăm krĭng mnuih djuê ƀiă mơ̆ng 3 – 4%/thŭn.

Akŏ mlan 8 leh êgao, ti ƀuôn prŏng Ƀuôn Ama Thuôt, čar Dak Lak, Anôk gĭt gai gưl dlông Hdră kñăm ala čar mkŏ mjing leh Klei bi kƀĭn online hŏng dŭm čar krĭng Lăn dap kngư kơ bruă hluê ngă dŭm Hdră ala čar kñăm; mñă klă: Knơ̆ng prăk gưl dlông thŭn 2024 đru ngă 3 Hdră ala čar kñăm (Jing mđĭ kyar bruă duh mkra – ala ƀuôn krĭng mnuih djuê ƀiă lehanăn krĭng čư̆ čhiăng; bruă bi hrŏ ƀun h’ĭt kjăp lehanăn Bruă mkŏ mkra krĭng ƀuôn sang mrâo) krĭng Lăn dap kngư êbeh 5.500 êklai prăk. Truh ară anei, krĭng Lăn dap kngư mâo hlăm brô 373 boh să mâo tŭ yap djăp hnơ̆ng čuăn krĭng ƀuôn sang mrâo. K’iăng khua knŭk kna Trần Lưu Quang mñă, čiăng pŏk ngă tŭ dưn dŭm Hdră ala čar kñăm, dŭm čar brei dlăng anei jing sa bruă ngă jăk, đru kơ mnuih ƀuôn sang krĭng dleh dlan mâo klei hdĭp jăk hĭn, kyua anăn brei ngă mâo klei đua klam, ngă kjăp hĭn hlăm wưng ti anăp. K’iăng khua knŭk kna mtă kơ dŭm alŭ wăl brei tui ksiêm hriăm hdơ̆ng găp, alŭ wăl ka dưi ngă brei hriăm kơ alŭ wăl mkăn čiăng hrăm mbĭt hluê ngă tŭ jing bruă klam mâo kčah jao.

 “Mtă brei ngă mtam dŭm bruă dưi ngă. Prăk duh anei kơ 5 čar krĭng lăn dap kngư khădah amâo lu ôh mkă hŏng prăk duh bi liê mơ̆ng knŭk kna, ƀiădah bŏ hŏng klei yuôm bhăn kyua hdră anei dưi truh kơ grăp krĭng ƀuôn sang. Diih lač kơ 1 êbâo klei dleh, hmei čih pioh jih, ƀiădah ăt brei diih lŏ gĭr hĭn, dŭm bruă drei dưi ngă ƀiădah ka bi leh ôh, hlei srăng đua klam? Klah čŭn tơdah êgao mlan 9, diih amâo ngă srăng tuôm hŏng klei ƀuah mkra mtam lehanăn hlăm wưng êdei srăng mkăp prăk duh bi liê hluê hdră mkă tĭng hnơ̆ng tŭ hdră mă bruă 3 hdră mơ̆ng bruă anei, wưng êdei hmei srăng jao lu hĭn kơ mnuih ngă lehanăn thâo ngă./.