Ti Sang dhar kreh buôn Mdŭk, ƀuôn hgŭm Ea Kao, čar Dak Lak, dŭm pluh čô djăp ênŭk thŭn dôk bi dlăng kơ đĭng blŭ, mâo phung êdam êra, êpul bruă klei mrâo mrang mrô yang ƀuôn mtô bruă kơ klei čih anăn account VNEID. Leh dưm hlăm đĭng blŭ, grăp čô čŏng bi ngă, čih klei hưn pô hlăm kdrăp dưn yua. H’Mai Mlô, sa čô mnuih ƀuôn sang hlăm ƀuôn brei thâo:

“Êlâo dih ka mâo phung êdam êra mtô pô ăt hŭi mơh, pô amâo mâo klei thâo ôh, djăl wơr mơh. Ară anei thâo čih ƀơ ƀiă. Ka mưng mơh, pô dôk hriăm ƀrư̆ brư̆.”

Dŭm mmông hriăm mrô sơnăn jing leh klei mưng ti lu ƀuôn hgŭm mơ̆ng čar Dak Lak, mơ̆ng čar mtrŭt mjhar 100 hruê ngă hdră mnuih ƀuôn sang hriăm kơ bruă mrô mơ̆ng krah mlan 7. Êbeh 2000 êpul kdrăp mrô yang ƀuôn dưi mkŏ mjing, hŏng êbeh 3.500 čô knuă druh, phung êdam êra nao ti grăp sang, djă ti kngan ktrâo bruă, đru kơ mnuih ƀuôn sang mưng hŏng klei mrâo mrang.

Amâo djŏ knŏng mdei hlăm klei lăm lui klei amâo mâo thâo, dŭm êpul bruă anei lŏ pŏk anôk hriăm kơ mrô ti sang dhar kreh alŭ ƀuôn amâodah ti anôk bruă swang čư̆ êa  ƀuôn hgŭm. Mnuih ƀuôn sang ba đĭng blŭ, dưi mâo klei mtô yua dŭm kdrăp dưn yua online, dlăng klei čih hưn kơ lăn, tla prăk jia điện tử, tla prăk hŏng online. Y-Sion Knul, khua bruă êdam êra ƀuôn hgŭm Ea Ana, čar Dak Lak brei thâo:

 “Djŏ tuôm hŏng klei bi mŭt mbĭt, mnuih ƀuôn sang rŭng răng êjai ngă hră mơar. Hmei đru kơ mnuih ƀuôn sang hlăm dŭm boh klei anei, mơ̆ng nao ba hră mơar, truh kơ yua VNEID mơ̆ng phŭn bruă kahan ksiêm. Boh nik hŏng mnuih djuê ƀiă, bruă anei dưi pluă mbĭt nanao čiăng bi hrŏ mmông êrô êbat mơ̆ng mnuih ƀuôn sang.”

Nao mbĭt hŏng êpul đru, lu knơ̆ng bruă dăng kông ăt đru mguôp hlăm hdră ngă bruă mnuih ƀuôn sang hriăm kơ bruă mrô. Dŭm anôk hriăm dưi đru brei kdrăp yua, êlan dăng kông, kdrăp yua AI ênưih ba yua, đru kơ mnuih ƀuôn sang ksiêm duah pral hĭn. Nguyễn Văn Thản, k’iăng khua kiă kriê VNPT Dak Lak brei thâo:

 “Hmei tiŏ nao knuă druh nao hgŭm hŏng dŭm êpul mrô yang ƀuôn ti ƀuôn hgŭm, alŭ ƀuôn. Mbĭt hŏng bruă sang čư̆ êa alŭ wăl, hmei mkŏ mjing dŭm adŭ mtô yua mrô kơ knuă druh, phung mă bruă knŭk kna čiăng lŏ wĭt mtô kơ mnuih ƀuôn sang leh anăn knơ̆ng bruă. Mta kñăm jing čiăng kơ grăp čô mnuih ƀuôn sang dưi thâo leh anăn yua tur knơ̆ng mrô hlăm klei hdĭp aguah tlam.”

 Bùi Thanh Toàn, Khua knơ̆ng bruă kreh knhâo leh anăn mrâo mrang čar Dak Lak brei thâo: 100 hrue trŭn kơ bruă mnuih ƀuôn sang hriăm kơ bruă mrô jing knhuang tal êlâo čiăng mlih mrô jing klei mưng aguah tlam mơ̆ng mnuih ƀuôn sang. Leh thâo ksiêm duah, thâo yua, thâo ngă hră mơar online, grăp hdră êlan, bruă knŭk kna klă sĭt truh kơ mnuih ƀuôn sang, amâo mâo hlei pô kơ tluôn.

 “Hmei ngă klei mbha êpul leh anăn ngă hdră êlan 100 hruê trŭn kơ bruă. Mta kñăm jing brei kơ mnuih ƀuôn sang klei thâo, klei hriăm kơ klei mlih mrô, amâo djŏ knŏng ti wăl krah ƀiădah lŏ bi lar truh kơ mnuih ƀuôn sang krĭng tlaih kbưi. Leh mâo klei mưn, mnuih ƀuôn sang srăng thâo yua tur knơ̆ng mrô hlăm klei mkra mjing, mnia mblei leh anăn ngă hră mơar knŭk kna găl ênưih hĭn.”

Mơ̆ng dŭm mmông hriăm “Djă ti kngan ktrâo bruă” truh kơ klei ƀuăn mơ̆ng knŭk kna leh anăn knơ̆ng bruă, hdră ngă bruă mnuih ƀuôn sang hriăm kơ bruă mrô dôk đru kdrăp mrâo mrang amâo lŏ jing klei kbưi ôh hŏng mnuih ƀuôn sang. Leh anăn grăp hruê, ti Dak Lak lŏ mâo thiăm lu mnuih jing mnuih ƀuôn sang mrô, mkŏ mjing yang ƀuôn mrô kluôm dhuôm leh anăn tŭ dưn. Anei jing tur knơ̆ng yuôm bhăn čiăng mkŏ mjing bruă sang čư̆ êa mrô, yang ƀuôn mrô leh anăn bruă duh mkra mrô.