Hdră bruă mkŏ dăp anôk dôk mklin sa anôk kơ krĭng yan adiê ngă ti să Ia Hiao (čar Gia Lai) dưi rŭ mdơ̆ng ti alŭ 9, hlăm ênhă êbeh 15ha, ênoh duh bi liê êbeh 120 êklai prăk. Hdră mkăp lăn dôk kơ êbeh 180 gŏ sang. Ară anei, dŭm anôk bruă rŭ mdơ̆ng dôk mjêč bi leh hdră bruă êlan klông hlăm krĭng, pui kmlă, dŭm hdră bruă nah gŭ msĕ si êa yua, sang dhar kreh êpul êya, sang hră hđeh điêt. Ksor Tin jing sa hlăm dŭm c̆ô mnuih tal êlâo ti ƀuôn C̆ư̆ Plah Jai, să Ia Hiao, hriê tŭ mă lăn mrâo pioh ngă sang dôk brei thâo:

“Hmei hriê dlăng lăn ala tinei jăk êdi. Tinei giăm sang hră, mâo tač hlăp lêñ djăp ênŭm. Lăn ti dlông čư̆ jăk snăk, dôk êđăp ênang hĭn kơ anak čô leh anăn mnuih ƀuôn sang; amâo lŏ đuê̆ kơ êa lip msĕ si dŭm thŭn êlâo ôh; anôk anei jăk êdi mkă hŏng êlâo dih. Mâo Knŭk kna đru, bruă sang čư̆ êa čar ngă anôk dôk mrâo kơ mnuih ƀuôn sang, kâo amâo thâo blŭ  lu ôh, mni lač jăk lu snăk".

Čiăng kơ mnuih ƀuôn sang hơĭt ai tiê đuê̆ mơ̆ng anôk dôk mưng khăng tuôm hŏng klei yan adiê ngă čiăng nao dôk ti anôk mrâo, bruă sang čư̆ êa alŭ wăl mkŏ mjing leh lu klei bi kƀĭn, mđing hmư̆ ai tiê klei mĭn leh anăn wĭt lač djăp klei êmuh mơ̆ng mnuih ƀuôn sang. Mnuih ƀuôn sang dưi dlăng rup dŭm anôk khăng tuôm hŏng êa lip lêč, ktuê dlăng hnơ̆ng rŭ mdơ̆ng wăl anôk dôk mrâo, ksiêm duah hdră êlan đru. Dŭm gŏ êsei mnuih ƀuôn sang dưi ruah mta sang, ruah anôk lăn leh anăn nao čuă dlăng wăl anôk dôk mrâo. Gŏ sang Nay Chúc ti ƀuôn Sô Ma Lơng, jing sa hlăm 67 gŏ sang tal êlâo hriê ti anôk dôk, hơ̆k mơak kyua dưi ruah mă leh anôk “jăk siam hĭn kơ klei čang hmăng".

"Gŏ sang kâo êlâo dih hdĭp giăm hŏng êa krông mơh, rŭng răng snăk tơdah klưh hroh lăn. Kâo myun mâo mă mrô 63, anôk dôk giăm sang hră gưl hđeh điêt, anak kâo thŭn anei ăt mŭt hlăm thŭn hriăm mtô bi hriăm gưl hđeh điêt".

Êlâo kơ hluê ngă hdră đru kơ mnuih ƀuôn sang nao dôk ti anôk mrâo, să mkŏ mjing Knăm trŭn ngă bruă "Mjing wăl anôk dôk hơuh mđao mrâo–Anôk dôk mtah" ti Krĭng mkŏ anôk dôk mrâo. Tinei, phung khua să, dŭm êpul bruă mbĭt hŏng mnuih ƀuôn sang pla 250 phŭn boh bàng Taiwan ktuê êlan mnuih ƀuôn sang dôk.

Knăm trŭn ngă bruă bi êdah klei gĭr mơ̆ng jih bruă kđi čar leh anăn klei sa ai mơ̆ng mnuih ƀuôn sang hlăm bruă mkŏ mjing wăl hdĭp mda mrâo êđăp ênang leh anăn hơĭt kjăp. R’Ô Thí – K’iăng khua adŭ bruă duh mkra să Ia Hiao brei thâo, hdră bruă dôk bi leh dŭm klei găl čiăng dưi drông jih jang hlăm brô 180 gŏ êsei mnuih ƀuôn sang kơ anôk dôk mrâo hlăm dŭm mlan kơ anăp.

“Hlăm wưng êgao, să Ia Hiao ngă leh jăk hdră mtô mblang, mtrŭt mjhar dŭm gŏ êsei mnuih ƀuôn sang hmăi mơ̆ng klei yan adiê ngă, krĭng ênưih êngăp êa truh kơ krĭng mkŏ anôk dôk mrâo, truh ară anei mâo leh 100 gŏ êsei. Mĭn tĭng hlăm mlan 8, mlan 9 lŏ dơ̆ng mtrŭt mjhar jih jang dŭm gŏ êsei adôk hlăm anôk dôk mrâo, čiăng rơ̆ng klei êđăp ênang kơ klei hdĭp leh anăn ngăn drăp kơ mnuih ƀuôn sang".

Mbĭt hŏng hdră đru mơ̆ng knŭk kna, hruê mmông êgao, dŭm anôk bruă lĭng kahan jưh ti alŭ wăl ksiêm dlăng, hluê ngă hdră êlan đru kơ mnuih ƀuôn sang mbĕ đuê̆ sang leh anăn mnơ̆ng dhơ̆ng truh kơ anôk dôk mrâo ti Ia Hiao.

Êbeh 50 čô knuă druh, lĭng kahan Êpul kahan jơ̆ng 1, Anôk bruă răng mgang wăl krah 3 – Thống Nhất (Anôk bruă gĭt gai lĭng kahan čar Gia Lai) nao leh ti Ia Hiao čiăng đru kơ mnuih ƀuôn sang ruh sang dôk, mbĕ mđuĕ ngăn drăp leh anăn mdơ̆ng sang ti anôk dôk mrâo.Sa krĭng ƀuôn sang mrâo  grăp hruê dôk mkŏ mjing ti knông lăn mrô 9. Mơ̆ng dŭm anôk kreh tuôm nanao hŏng klei êa lip lêč huĭ hyưt, mnuih ƀuôn Ia Hiao mơak mñai truh kơ anôk dôk sa anôk, mâo djăp ênŭm bruă nah gŭ, leh anăn yuôm hĭn jing mâo klei hdĭp êđăp ênang, hơĭt kjăp.