Hruê knhal jih hruê kăm, ti să Ea Kly, čar Dak Lak, hơ̆k mơak hŏng ai êwa mprăp kơ hruê mplĕ hră. Mơ̆ng aguah ưm truh kơ tlam mmăt, knuă druh dŭm alŭ ƀuon bi mbha jiong lu êpul điêt, nao grăp boh sang, čiăng mbha hră mplĕ leh anăn hâo hưn, mtrŭt mjhar phung mlpĕ hră nao ruah phung bi ala Bruă Kbĭn ala gưl 16 leh anăn Êpul gơ̆ng bruă ƀuôn sang dŭm gưl wưng thŭn 2026 - 2031. Ti alŭ Chợ, să mkŏ mjing leh 7 êpul ngă bruă čiăng nao mbha hră plĕ kơ phung mplĕ hră. Ayŏng Nông Ngọc Thắng, sa čô hlăm êpul răng mgang klei êđăp ênang alŭ Chợ brei thâo, alŭ mâo giăm 1.400 čô bi ala. Truh kơ ară anei hră mplĕ dưi ba truh kơ kngan mnuih ƀuôn sang.

“Anei pô mbha hră plĕ kơ mnuih ƀuôn sang, bi nao ti anôk mplĕ hră mâo êpul mtô kơ mnuih ƀuôn sang kơ hdră lui anăn amâodah amâo mâo lui bi găl guôp. Ti sang truh mnuih ƀuôn sang bi mguôp kyuanăn jing boh tŭ dưn kơ diñu.”

Bruă nao ba hdră mplĕ truh kơ grăp čô mnuih ƀuôn sang dưi ngă hrăm mbĭt, mjêč ti dŭm să, ƀuôn hgŭm ti alŭ wăl čar Dak Lak. Amâo djŏ knŏng jing ba hră mplĕ truh kơ phung mplĕ hră, knuă druh nah gŭ lŏ bi mguôp hâo hưn, hlăk mblang, mtô kơ mnuih ƀuôn sang ksiêm kơ klei hưn kơ phung mgơ̆ng asei, thâo klă klei dưi leh anăn bruă klam pô êlâo kơ hruê ruah khua. Hluê anăn, đru hâo hưn kơ klei ruah khua, đru mđĭ klei thâo săng leh anăn bruă đua klam mơ̆ng phung mplĕ hră hŏng hruê knăm lăn čar. Nguyễn Doãn Kiều, ti alŭ 6A, ƀuôn hgŭm Thành Nhất, čar Dak Lak brei thâo:

“Kâo hmư̆ leh klei hâo hưn ti alŭ, leh anăn dŭm êdeh hâo hưn yang ƀuôn, leh anăn đa đa jing dhar bruă mặt trận hâo hưn truh kơ anôk hmei dôk leh anăn kâo hơ̆k mơak êdi. Leh anăn kâo mprăp ngă bruă klam, mbĭt anăn mtrŭt mjhar grăp čô nao hgŭm hlăm klei ruah khua gưl anei.”

Ti čar Dak Lak, êngao kơ klei hâo hưn, lu alŭ wăl pŏk mlar mbah hâo hưn čiăng kơ phung mplĕ hră thâo ênưih hĭn. Êngao kơ bi kƀĭn mnuih ƀuôn sang, mđung asăp, pano, dŭm alŭ wăl lŏ dưn yua klei mrâo mrang mrô, internet yang ƀuôn, hâo hưn online čiăng mkăp brei klei čih hưn leh anăn hdră ngă bruă phung mgơ̆ng asei. Hdră ngă anei đru kơ phung bi ala pral thâo klei hưn, ruah djŏ phung bi ala. Đặng Gia Duẩn, khua dlăng bruă Đảng nah gŭ, khua Êpul gơ̆ng bruă ƀuôn sang ƀuôn prŏng Ea Kao, čar Dak Lak brei thâo:

“Hmei mkŏ mjing lu mta hdră hâo hưn mdê mdê, mơ̆ng hâo hưn truh kơ klei bi mlih mrô. Hmei nao êlâo hlăm dưn yua kdrăp mrô hlăm bruă hâo hưn kơ klei čih hưn mơ̆ng phung bi ala.”

Nao mbĭt hŏng bruă hâo hưn ti nah gŭ, dŭm hdră hâo hưn klă anăp ăt dưi ngă ti alŭ wăl čar. Lu bĭt êlan, alŭ ƀuôn ti Dak Lak mngač hŏng pano, băng rông, ap phích mtrŭt mjhar klei ruah khua, mkŏ mjing klei hơ̆k mơak mđing kơ hruê knăm lăn čar. Hluê si Trần Hồng Tiến, khua knơ̆ng bruă dhar kreh, mjuăt ktang asei mlei leh anăn hiu čhưn ênguê čar Dak Lak, mnơ̆ng hâo hưn dưi hluê ngă hrăm mbĭt mơ̆ng čar truh kơ nah gŭ, đru ba klei hưn klei ruah khua truh giăm hĭn hŏng mnuih ƀuôn sang.

“Hmei mkŏ mjing dŭm mta mnơ̆ng hâo hưn msĕ si video clip, leh anăn klei hưn truh kơ nah gŭ, leh anăn bi mguôp hŏng dŭm mbah hâo hưn hlăm internet yang ƀuôn čiăng mđĭ klei hâo hưn êlâo, hlăm leh anăn êdei gưl mplĕ hră.”

Êbeh 2,4 êklăk čô mplĕ hră ti čar Dak Lak dôk hơ̆k mơak guôn hruê ruah khua. Klei nao hgŭm hrăm mbĭt mơ̆ng bruă kđi čar mbĭt hŏng lu hdră hâo hưn bruă đru ba klei hưn ruah khua truh hŏng giăm phung mplĕ hră, mkŏ mjing klei đăo knang leh anăn klei mprăp nao hgŭm hlăm hruê knăm mơ̆ng jih jang mnuih ƀuôn sang./