Gŏ sang Hà Thị Eng ti alŭ mrô 5, să Čư̆ Kbang, kdriêk Ea Sup, čar Dak Lak mâo 6 čô mnuih, ƀiădah knŏng hjăn ñu jing mnuih mă bruă phŭn. Lăn pla mjing điêt, ênoh mâo hrui wĭt knŏng mơ̆ng bruă hiu ngă bruă mưn, amâo mâo djăp ôh yua pioh rông 3 čô anak điêt, kmha mniê mduôn awăt leh mơh, lehanăn ung kreh lĕ nanao hlăm klei ruă duam. Thŭn 2023, kyua mâo klei đru êbeh 35 êklăk prăk mơ̆ng hdră ala čar kñăm bi hrŏ ƀun hŏng klei kjăp, ñu blei mâo 4 drei êmô ba wĭt rông. Truh ară anei, êmô mđai lar leh truh 6 drei. Hà Thị Eng đăo knang kơ klei hdĭp mgi dih srăng mngač tač hĭn:

 “Sang pưk hmei amâo mâo sa mta mnơ̆ng ôh, lăn knŏng mâo mă 5-6 sào mdiê mâo wiă mơ̆ng 50-60 kdô đuič. Lŏ mâo klei đru kơ gŏ sang ñu êmô rông, mâo hĕ bruă sanhg čư̆ êa mjuăt bi hriăm bruă rông êmô. Wưng tinăp kâo srăng gĭr čiăng tlaih mơ̆ng klei dleh dlan”.

Bi Hà Thị Yêu, ti alŭ mrô 5 să Čư̆ Kbang, pui ƀơ̆ng hĕ sang hlăk thŭn 2013 ngă kơ gŏ sang ñu lĕ hlăm klei dleh dlan knap mñai. Knhal jih thŭn 2014, amâo mâo tŭ mă sa boh sang bi đru. Thŭn 2023 gŏ sang ñu mâo klei đru truh kơ 4 drei êmô ana pioh rông. Mâo klei knŭk kna đru, lehanăn hŏng klei gĭr čiăng kpưn đĭ, ară anei gŏ sang ñu tlaih leh mơ̆ng klei dleh dlan:

 “Leh mâo êmô, kâo lŏ čan prăk pioh duh bi liê kơ bruă knuă, truh êmô mđai, mâo êđai êmô ba čhĭ tla nư klei. Ară anei gŏ sang kâo hơĭt hĭn leh, mâo kle bi mni lač jăk kơ Đảng lehanăn bruă sang čư̆ êa.”

Čư̆ Kbang jing să krĭng III dleh dlan êdi hlăm kdriêk Ea Sup, lu jing mnuih djuê ƀiă, gŏ sang ƀun giăm 58%. Cao Thanh Hoài, K’iăng khua bruă Đảng să Čư̆ Kbang, brei thâo, čiăng kơ bruă bi hrŏ ƀun hŏng klei kjăp, să mâo leh dŭm hdră êlan kơ klei mđĭ kyar klei duh mkra ala ƀuôn. Boh nik mơ̆ng hdră êlan knŭk kna kñăm mjing leh klei jăk, đru mguôp yuôm bhăn hlăm bruă bi mlih klei hdĭp mnuih ƀuôn sang:

 “Klei duh bi liê bruă nah gŭ, kơ hdră đru mjut mjing bruă rông êmô kơ mnuih ƀuôn sang, msĕ si hdră mkăp mjeh êmô kơ mnuih ƀuôn sang rông, mâo klei mnuih ƀuôn sang ư ai êdi. Leh sa thŭn tui ksiêm, snăn ƀuh klei tŭ dưn ba yua prăk duh bi liê hŏng klei jăk. Hnơ̆ng ênoh gŏ êsei ƀun grăp thŭn hrŏ mơ̆ng 5-7%."

Hlăm kluôm kdriêk knông lăn Ea Sup, dŭm thŭn êgao, gưl bruă Đảng, bruă sang čư̆ êa alŭ wăl mâo ngă leh tŭ jing dŭm hdră êlan mơ̆ng Đảng, knŭk kna, mjing klei bi mlih prŏng hlăm klei mđĭ kyar duh mkra ala ƀuôn. Êdah êdi jing mâo rŭ mjing 56 hdră bi hmô hlăm klei duah ƀơ̆ng hlăm ƀuôn sang, pŏk dŭm pluh boh adŭ bi hriăm bruă knuă hlăm ƀuôn sang, atăt mnuih nao mă bruă kơ ala čar Dhŭng Korea, đru mnuih ƀuôn sang mâo čan prăk truh êbeh 121 êklai prăk pioh duh mkra mnia mblei... Mkăp hră ênua klei mdrao mgŭn kơ 53.240 gŏ sang, amâo mâo mă ôh prăk hriăm hră kơ 13.650 gưl čô hđeh… Nguyễn Thanh Tuấn, K’iăng khua knơ̆ng bruă sang čư̆ êa kdriêk Ea Sup, čar Dak Lak lač:

 “Êlâo dih ênoh gŏ sang ƀun hlăm kdriêk Ea Súp lu êdi, êbeh 60%. Găn hlăm 3 thŭn hlue ngă hdră ala čar kñăm bi hrŏ ƀun hŏng klei kjăp, truh kơ ară anei kdriêk mâo bi hrŏ leh adôk mă 42% gŏ sang ƀun. Čiăng dưi bi sĭt bruă bi hrŏ ƀun hŏng klei kjăp, kdriêk mâo ngă leh 3 hdră ala čar kñăm, ngă bruă đru sang dôk, lăn dôk, mbha lăn pla mjing kơ dŭm gŏ sang mnuih djuê ƀiă.”

Ăt msĕ hŏng Nguyễn Thanh Tuấn, lač kdriêk Êa Sup hlăk mđing hâo hưn mđĭ klei thâo săng hlăm mnuih ƀuôn sang, lehanăn mkŏ mjing pŏk mlar hdră bi hmô hlăm klei duh ƀơ̆ng ba wĭt leh klei tŭ dưn. Mbĭt hŏng anăn, kdriêk lŏ iêo jak jih jang klei dưi bi rŭ mkra bruă nah gŭ pioh kơ klei mđĭ kyar bruă duh mkra ala ƀuôn, đru hlăm klei bi hrŏ ƀun hŏng klei kjăp./.