Guê gang êa ksĭ Xóm Rớ hlăm ƀuôn hgŭm Phú Yên, čar Dak Lak dŭm hruê giăm anei mâo lu mnuih ƀuôn sang lehanăn tuê hiu čhưn nao dlăng. Yan adiê êđăp drưm mbĭt anăn ti kdrŭn ksĭ mă kan Đông Tác, ti anăp jing krĭng ksĭ Đà Diễn mâo lu hô̆ mran hiu trah mă kan. Dlăng phă Dưr jing čư̆ Chóp Chài lehanăn ƀuôn prŏng Tuy Hòa. Wĭr phă Yŭ mâo kban Hùng Vương găn krông Đà Rằng. Jih jang mjing sa pŏk rup siam êdi mơ̆ng lăn adiê.

Hlăm brô 3 thŭn hŏng anei, hlăm yan bhang, tinei mâo lu phung mda asei hriê hlăp čhưn hlăm grăp adiê tlam. Mơ̆ng sa krĭng kreh mâo klei êa ksĭ đĭ, ară anei Xóm Rớ jing leh anôk truh mơ̆ng lu tuê hiu čhưn ênguê ngă kơ lu mnuih ƀuôn sang hơ̆k mơak. Sa čô mnuih ƀuôn sang dôk tinei brei thâo:

"Ară anei lŏ mkra, lŏ mia êa mil mrâo msĕ snei kâo ƀuh mâo lu êdi phung tuê hiu čhưn. Kyua anăn, ară anei mnuih ƀuôn sang hlăm krĭnb bi čhĭ lu mta mnơ̆ng, dul ƀiă mơh klei dleh dlan”.

Klei siam mơ̆ng guê gang êa ksĭ Xóm Rớ êdah êdi mơ̆ng kreh mlan 6 leh êgai, hlăk dŭm klŏ bêtông gang êa dưi “Bi mlih mrâo” hŏng dŭm êa mil mtah, hrah, kñĭ… guh mngač siam êdi krah lăn adiê lehanăn êa ksĭ mtah. Lu mnuih ƀuôn sang alŭ wăl lehanăn tuê hiu čhưn ênguê nao dlăng, mă rup, boh nik hlăm aguah ưm lehanăn adiê tlam, hlăk yang hruê trŭn mjing leh klei jăk siam êdi.

 "Êlâo adih kâo tuôm hriê leh, mrâo mia êa mil mrâo kâo ăt hriê mơh. Dlăng msĕ si view êklăk đolar dlăng, siam êdi”.

Mơ̆ng phŭn mkăp êa mil mơ̆ng êpul đru brei, ƀuôn hgŭm Phú Yên mtrŭt mjhar leh phung ba anăp mbĭt hŏng phung thâo mia êa mil mbruă nao mia kơ dŭm klŏ bêtông gang êa ksĭ Xóm Rớ. Phung ba anăp brei thâo, ayŏng adei mă bruă jih sa hruê krah adiê mđiă, bruă mia êa mil hŏng dŭm kdrêč bruă mdê mdê̆ msĕ si bi mdoh klŏ bê tông, mia tal êlâo, mia êa mil… ƀiădah diñu mơak nanao hlăk mâo lu mnuih bi mni lehanăn nao dlăng.

 "Siam hĭn, jăk hĭn kơ ƀuôn hgŭm pô, ayŏng adei ƀuh dul mơh klei êmăn. Mă bruă dŭm hruê ƀuh boh tŭ dưn mâo ba wĭt jing mnuih ƀuôn sang nao dlăng, mni siam, pô ăt mơak mơh”.

 Bruă “bi mlih mrâo” kơ dŭm klŏ bêtông gang êa ksĭ Xóm Rớ amâo djŏ knŏng đru bi msiam wăl anôk ktuê hang ksĭ ƀiădah lŏ mjing hdră wăl anôk hiu čhưn, tui ksiêm kơ phung tuê hiu čhưn ênguê hlăm wưng hiu čhưn yan mdei prŏng thŭn 2026. Anei amâo djŏ knŏng jing mđĭ lar boh tŭ yuôm mơ̆ng lăn adiê, mtrŭt mđĭ kyar bruă hiu čhưn ênguê alŭ wăl, ƀiădah lŏ brei ƀuh, klei jăk siam mơ̆ng bruă hiu čhưn ênguê amâo djŏ knŏng kbiă hriê mơ̆ng ênoh duh bi liê lu, ƀiădah gơ̆ lŏ kbiă hriê mơ̆ng hdră mtrŭn mơ̆ng bruă knŭk kna alŭ wăl lehanăn êpul êya hŏng wăl anôk lăn adiê ti alŭ wăl pô./.