Dŭm bĭt êlan bê tông mkŏ găn alŭ Gia Bắc 1, să Bảo Thuận. Dua nah êlan, pưk sang ƀrư̆ hruê ƀrư̆ prŏng siam; đang war, mnư̆ mnang bi msiam doh siam. Ti dŭm bĭt êlan êlâo adih êrô êbat dleh dlan, ară anei êdeh mdiăng boh mnga bruă lŏ hma dưi mŭt truh hlăm krĭng mnuih ƀuôn sang dôk, phung hđeh nao sang hră găl ênưih hĭn. Hŏng aduôn Ka Hôm, alŭ Gia Bắc 1, êlan klông găl ênưih ăt msĕ mơh bruă duh ƀơ̆ng, hriăm hră leh anăn klei hdĭp mnuih ƀuôn sang ƀiă klei dleh dlan hĭn:

"Mâo êlan klông găl ênưih, mnuih ƀuôn sang dŭ mdiăng mnơ̆ng dhơ̆ng găl ênưih hĭn, phung hđeh nao sang hră găl ênưih hĭn, bruă duh mkra mâo klei găl đĭ kyar. Alŭ wăl mđing dlăng, mjing klei găl kơ mnuih ƀuôn sang lu êdi, boh nik jing mnuih djuê ƀiă. Mâo êlan klông mrâo găn êrô găl ênưih leh snăn mnuih ƀuôn sang hơ̆k mơak êdi, lač jăk kơ Đảng, Knŭk kna mđing dlăng duh bi liê mkra êlan kơ mnuih ƀuôn sang".

Klei bi mlih ti Gia Bắc 1 ăt jing sa kdrêč hlăm pŏk rup krĭng ƀuôn sang mơ̆ng să Bảo Thuận. Să mâo 31 alŭ snăn 15 alŭ hlăm krĭng mnuih djuê ƀiă, lu jing mnuih K'ho, mâo giăm mkrah wah ênoh mnuih să. Knŏng hlăm thŭn leh êgao, mbĭt hŏng ai dưi Knŭk kna, mnuih ƀuôn sang čŏng myơr êbeh 2.000m² lăn, hlăm brô 1,2 êklai prăk leh anăn lu hruê ai; êbeh 1,5 êklai prăk rŭ mdơ̆ng, mkra sang kơ gŏ êsei ƀun, giăm ƀun. Truh ară anei, 17/31 krĭng ƀuôn mâo krĭng ƀuôn sang bi hmô, truh 55%; 21/31 krĭng ƀuôn mâo krĭng ƀuôn sang êdah kdlưn, truh 68%.

Ti tluôn dŭm ênoh mrô anei jing hdră mtrŭt mjhar čiăng kơ mnuih ƀuôn sang thâo săng, sa ai leh anăn jing pô phŭn mơ̆ng bruă mkŏ mkra krĭng ƀuôn sang mrâo. Ti Gia Bắc 1, khua mduôn K’Đôi, Khua alŭ, jing sa hlăm dŭm čô ngă bruă anăn. Thâo klei bhiăn, klei mưng leh anăn klei hdĭp grăp gŏ sang, ñu gĭr mtô mblang čiăng kơ mnuih ƀuôn sang thâo săng mkŏ mkra krĭng ƀuôn sang mrâo amâo djŏ bruă knŭk kna ôh. Mnuih ƀuôn sang đru mguôp, lŏ tŭ dưn mơ̆ng dŭm hdră bruă leh anăn klei bi mlih mơ̆ng ƀuôn sang.

“Mơ̆ng leh pŏk ngă hdră mkŏ mkra krĭng ƀuôn sang mrâo, mâo Knŭk kna mđing dlăng duh bi liê leh anăn bruă sang čư̆ êa alŭ wăl pŏk ngă dŭm hdră bruă klă klơ̆ng, hmei mđing hâo hưn, mtrŭt mjhar mnuih ƀuôn sang hrăm mbĭt nao hgŭm. Mnuih ƀuôn sang nao hgŭm sĭt êmĭt, đru mguôp hruê ai, myơr lăn pŏk êlan, hrăm mbĭt bi hgŭm ngă bruă kyua anăn ƀô̆ mta krĭng ƀuôn sang bi mlih lu êdi. Boh nik, mnuih ƀuôn sang dưi thâo, dưi bi trông, dưi ksiêm dlăng, dưi dưn yua kyua anăn mnuih ƀuôn sang sa ai êdi".

Mơ̆ng mjing klei sa ai čiăng kơ êpul êya hrăm mbĭt ngă, bruă klam mơ̆ng mnuih mâo kơhưm lŏ bi êdah hlăm bruă mtrŭt mjhar bi mlih klei mĭn, hdră ngă čiăng grăp gŏ sang čŏng kpưn đĭ. Ti alŭ B’Đơr, să Bảo Lâm 2, Khua alŭ K’Juyên khăng nao truh kơ grăp gŏ sang hâo hưn, mtrŭt mjhar. Kkiêng, hriê kơ prŏng ti krah mnuih ƀuôn sang, ñu thâo mâo dŭm hdră êlan amâo dưi lač sa blư̆ hlăm klei bi kƀĭn ôh ƀiădah brei gĭr mblang, mtrŭt mjhar hŏng klei blŭ mnuih ƀuôn sang pô.

Mơ̆ng kriê pioh klei bi mguôp, bi mdoh êlan klông truh kơ bruă mkra mjing, bi hrŏ ƀun, K'Juyên mtrŭt mjhar mnuih ƀuôn sang hrăm mbĭt bi đru, boh nik mđing dlăng kơ dŭm gŏ êsei dôk dleh dlan. Kyua hŏng ñu, sa krĭng ƀuôn sang đĭ kyar amâo djŏ knŏng čiăng êlan siam, wăl hdĭp mda doh ƀiădah mnuih ƀuôn sang brei mâo hdră duh ƀơ̆ng, klei hdĭp ƀrư̆ hruê ƀrư̆ đĭ kyar:

 "Hŏng bruă klam jing khua ƀuôn, kâo mâo nanao bruă klam mtrŭt mjhar mnuih ƀuôn sang bi mguôp, hgŭm mguôp, bi đru hdơ̆ng găp čiăng mkŏ mkra krĭng ƀuôn sang mngač, mtah, doh, siam. Hŏng dŭm gŏ êsei dôk dleh dlan, hmei mâo nanao klei hâo hưn, mtrŭt mjhar mnuih ƀuôn sang mđing duh mkra pla mjing, ƀrư̆ ƀrư̆ kpưn đĭ."

Wưng thŭn 2026-2030, čar Lâm Đồng gĭr ktưn mâo 42 să djăp hnơ̆ng čuăn krĭng ƀuôn sang mrâo, 2 să djăp hnơ̆ng čuăn krĭng ƀuôn sang mrâo mrang; bi hrŏ gŏ êsei ƀun krĭng mnuih djuê ƀiă, krĭng čư̆ čhiăng 2/3% grăp thŭn, ba 50% ênoh să, ênoh alŭ tlaih mơ̆ng krĭng dleh dlan hĭn. Hnơ̆ng čuăn mrâo mâo klei čuăn kdlưn hĭn kơ klei kreh knhâo kdrăp mrâo, mlih mrâo mbruă, bi mlih mrô.

Ti să Tà Năng, amai Ka Să K’Hiêr, Khua bruă Đảng alŭ Ma Bó, dôk ba anăp hlăm dŭm hdră bruă. Mơ̆ng boh tŭ bruă duh mkra kphê, čêñ hruê̆, rông mnơ̆ng, ñu mtrŭt mjhar mnuih ƀuôn sang mlih mrâo hdră ngă bruă; mbĭt anăn klă anăp mtô kơ dŭm gŏ sang ba yua VNeID, hdră bruă knŭk kna online, dưi mâo klei hâo hưn, hdră êlan hlăm wăl anôk mrô.

"Hŏng bruă klam jing khua bruă Đảng alŭ, kâo mđing mtô mblang, mtrŭt mjhar mnuih ƀuôn sang hluê ngă jăk dŭm hdră êlan mtrŭn mơ̆ng Đảng, Knŭk kna, boh nik klei hâo hưn hlăm kdrăp mrô. Sa kdrêč mnuih ƀuôn sang adôk kƀah klei thâo kơ kdrăp mrâo kyua anăn kâo khăng nao ti grăp gŏ sang ktrâo lač ba yua VNeID, ngă bruă knŭk kna leh anăn ksiêm dlăng dŭm hdră êlan kơ lăn ala, hră ênua mdrao mgŭn, klei hdĭp yang ƀuôn".

Mơ̆ng bruă mtrŭt mjhar mnuih ƀuôn sang myơr lăn, bi hgŭm mkŏ mkra krĭng ƀuôn sang, mđĭ kyar hdră duh ƀơ̆ng truh kơ ba anăp ba yua kdrăp kreh knhâo, mlih mrô, bruă klam mơ̆ng khua mduôn, mnuih mâo kơhưm hlăm bruă mkŏ mkra krĭng ƀuôn sang mrâo ƀrư̆ hruê ƀrư̆ klă sĭt. Hŏng klei blŭ mâo êpul êya đăo knang leh anăn klei bi hmô ba anăp, diñu đru mguôp mtrŭt mđĭ ai mnuih ƀuôn sang, ba dŭm hnơ̆ng čuăn hlăm boh sĭt klei hdĭp, mkŏ mkra dŭm ƀuôn sang krĭng mnuih djuê ƀiă Lâm Đồng ƀrư̆ hruê ƀrư̆ đĭ kyar.