Giăm yang hrue dơ̆ng leh, ung mô̆ Đinh Thị Lá (29 thŭn) ăt dôk mă bruă mbĭt hŏng phung mkra pưk sang, bi êran masin lŭk simăng, pioh mdơ̆ng sang mrâo. Amai mgei ai tiê, klei hdĭp ƀuôn sang êlâo dih ênguôt êưn, ƀiădah ară anei mâo leh klei bi mlih jăk. Truh mlam, pui kmlă mtrang mngač hlăm jih ƀuôn, hmư̆ phung hđeh dôk hriăm răk ê a, jih ƀuôn ƀuh jing mơak hĭn:

“Êlâo dih blei môtơr bi êran pui kmlă, êdei anei mâo knŭk kna duh bi liê đru pui kmlă bi êran hŏng pil yang hrue. Ară anei thŭn  2025 mâo leh pui kmlă yua snăn ƀuôn sang mâo leh klei bi mlih jăk hĭn mkă hŏng dŭm thhŭn êlâo.”

Anôk mkăp pui kmlă kơ ƀuôn Canh Tiến mâo ênoh duh bi liê êbeh 9 êklai prăk, mphŭn rŭ mkra mơ̆ng mlan 12/2024 lehanăn bi leh hlăm mlan 4/2025. Tui si  Đinh Văn Tào, Khua bruă Đảng hlŏng jing khua ƀuôn Canh Tiến, mơ̆ng leh mâo pui kmlă, ƀuôn sang klă sĭt mâo klei bi mlih.

“Mâo leh pui kmlă jing jăk găl hĭn hlăm klei hdĭp mda aguah tlam mlam hrue, mlam phung hđeh mâo pui hriăm hră mơar. Êlâo dih mnuih ƀuôn sang êpa mhao êdi čiăng mâo tivi dlăng, snăn ară anei mâo leh pui kmlă bi blei tivi pioh dlăng, lehanăn mâo klei găl tui duah klei bi hriăm êmuh kơ bruă kreh knhâo kơ bruă rông mnơ̆ng lehanăn pla mjing…”

Ƀuôn Canh Tiến mâo 176 gŏ sang lu jing mnuih djuê aba Bana lehanăn Chăm. Mơ̆ng sa alŭ wăl hdĭp msĕ si klah hŏng tač êngao, Canh Tiến hlăk mâo dŭm knhuang mă bruă jăk. Mbĭt hŏng pui kmlă, êlan klông mâo lŏ mkra mđĭ. Klei bi duh myơr lăn ala mâo leh mnuih ƀuôn sang sa ai prŏng êdi. Dương Hiệp Hòa, Khua knơ̆ng bruă sang čư̆ êa ƀuôn hgŭm Canh Vinh lač.

“Knŭk kna kă brei pui kmlă jing leh hdră êlan jăkêdi, mâo klei mnuih ƀuôn sang tŭ ư. Ti anôk mâo pui kmlă tinăn mâo klei mđĭ kyar bruă duh mkra. Ară anei ƀuôn hgŭm hlăk rŭ mdơ̆ng ƀuôn Canh Tiến jing ƀuôn hiu čhưn ênguê yang ƀuôn, tui si klei kiă kriê mơ̆ng čar, kñăm mđĭ kyar klei hdĭp mda ala ƀuôn ti alŭ wăl”./.