Hŏng Adei Nông Trà Vy, hđeh sang hră adŭ 6A2, sang hră Knŭk kna rông ba mlir gưl hriăm gưl 1 leh anăn gưl 2 Ea Rôk, dưi dôk ti sang hră hriăm hră mơar, hdĭp mda jing sa klei hơ̆k mơak êdi.

“Kâo ƀuh hriăm ti sang hră Knŭk kna rông ba jing hơ̆k mơak êdi, sang hră êđăp, phung nai kriê dlăng hđeh sang hră, khăp kơ phung hmei.”

Sang hră mrâo krưh kơăm, anôk dôk doh siam, djăp ênŭm đru kơ phung hđeh hơĭt ai tiê hdĭp mda, mâo thiăm mmông hriăm leh anăn hlăp lêñ mbĭt hŏng ƀĭng găp. Adei Trần Hà Thiên, hđeh hriăm adŭ 7A2, brei thâo:

“Kâo ƀuh hơ̆k mơak êdi êjai dưi nao hriăm ti sang hră Knŭk kna rông ba, ƀuh kdrưh kơăm, doh siam, ƀĭng găp jăk mơh, hơ̆k mơak, phung nai kriê dlăng grăp mmông huă ƀơ̆ng leh anăn uêñ mĭn kơ phung hđeh sang hră hmei”.

Klei hơ̆k mơak anăn lŏ mâo boh tŭ dưn hĭn êjai sang hră jing hdră bruă yuôm mơ̆ng phŭn bruă lĭng kahan rŭ mdơ̆ng mđup brei kơ mnuih ƀuôn sang să Ea Rôk - alŭ wăl să krĭng 3 adôk mâo lu klei dleh dlan. Anôk bruă bi êdah klei uêñ mĭn, hrăm mbĭt mơ̆ng phŭn bruă lĭng kahan hŏng Bruă sang čư̆ êa alŭ wăl hlăm bruă mtô mjuăt bi hriăm, mkŏ mjing klei găl hriăm hră mơar, bi kƀĭn jăk hĭn kơ phung hđeh ti alŭ wăl. Mphŭn čô̆ mlan 3/2026, leh knŏng 6 mlan ngă bruă, sang hră dưi bi leh anăn anăn ba yua hlăm wưng pŏk thŭn hriăm mrâo mlan 9/2026, hnưm hĭn sa thŭn mkă hŏng hdră kčah êlâo anăn.

Nai Lương Thị Hoa, nai mtô ti sang hră brei thâo, sang hră Knŭk kna rông ba mâo klei čuăn mrâo hŏng phung nai mtô, amâo djŏ knŏng hlăm klei mtô ƀiădah wăt hlăm bruă dlăng kriê hđeh sang hră, boh nik jing phung hđeh sang hră mrâo kbưi hŏng gŏ sang.

“Dlăng kriê phung hđeh ti lu ênuk thŭn mdê mdê, boh nik jing phung hđeh hriăm gưl 1, êjai mrâo kbưi hŏng gŏ sang nao hriăm ti sang hră Knŭk kna rông ba, lu phung hđeh adôk ngĭ ngơ̆ leh anăn ênguôt kơ sang. Kyuanăn, dlăng kriê phung hđeh amâo djŏ knŏng ngă bruă klam dlăng kriê brei djŏ hdră bhiănm ƀiădah lŏ uêñ mĭn, jĕ giăm, kriê dlăng leh anăn mđĭ ai, jêñ jêñ ngă bruă, ktuê dlăng klei suaih pral, ai mĭn mơ̆ng phung hđeh”.

Klei dlăng kriê anăn lŏ mâo hlăm grăp mmông huă ƀơ̆ng grăp hruê mơ̆ng phung hđeh sang hră. Amai Đinh Thị Thoả, pô ngă bruă tŭk knă mơ̆ng sang hră brei thâo, kčưm mă bruă mơ̆ng 4h30 aguah leh anăn ruĕ hlăm 7 mmông mmăt. Mơ̆ng bruă mprăp mnơ̆ng ƀơ̆ng, tŭk mkra leh anăn mbah êsei huă, êmiêt sang pui, bruă lŏ čuê nanao hlăm jih hruê.

“Hmei kčưm mă bruă mơ̆ng hruê 13/10. Êpul mă bruă ară anei ăt suăi êmăn êdi, ăt čiăng mâo klei đru mơ̆ng phung nai. Hmei gĭr ngă bruă jih ai tiê, čiăng bi leh jăk bruă klam pô.”

Čiăng mkŏ mjing klei huă ƀơ̆ng yang hruê, dôk hlăm sang hră hlăm boh klei anôk bruă ba yua hnưm hĭn mkă hŏng hdră kčah, sang hră čŏng pô mprăp dŭm hdră êlan, bi mguôp hŏng Bruă sang čư̆ êa alŭ wăl leh anăn dŭm êpul bruă ti alŭ wăl.

 Võ Viết Khoa, Khua kiă kriê Knŭk kna rông ba mlir gưl hriăm gưl 1 leh anăn gưl 2 Ea Rôk brei thâo, leh ba jao aôk bruă, sang hră mjêč mkŏ dăp dŭm klei găl čiăng êdi čiăng mkŏ mjing dŭm mta bruă. hruê 13/10, sang hră mkŏ mjing klei huă ƀơ̆ng yang hruê kơ jih jang 515 čô hđeh, hmao đru kơ phung amĭ ama hlăm klei găl ka dưi dôk ti sang hră. Truh hruê 30/10, sang hră klă klơ̆ng mkŏ mjing dôk ti sang hră kơ 337 čô hđeh sang hră.

“Sang hră đru kčĕ hŏng gưl bruă Đảng nah gŭ, Bruă sang čư̆ êa alŭ wăl mâo hdră êlan hŏng anak čô mnuih djuê ƀiă ăt msĕ mơh mâo klei dleh dlan wĭt hriăm tinei. Hmei bi mguôp kjăp hŏng phung amĭ ama hđeh, êpul bi ala amĭ ama hđeh sang hră čiăng ngă bruă bi mguôp ệai phung anak hriê hriăm tinei, si srăng ngă čiăng mkŏ mjing djăp klei găl hĭn kơ phung anak mâo klei thâo čŏng răng kriê asei mlei pô”.

Mbĭt hŏng klei đru mơ̆ng sang hră, Bruă sang čư̆ êa alŭ wăl ăt jêñ jêñ ksiêm dlăng, bi mguôp ruh mgaih klei dleh dlan hlăm bruă mkŏ mjing klei huă ƀơ̆ng yang hruê, dôk ti sang hră. Trịnh Văn Cường, k’iăng khua Bruă sang čư̆ êa să Ea Rôk brei thâo, sang hră Knŭk kna rông ba Ea Rôk mâo klei ngă bruă rŭ mdơ̆ng pral. Phung ngă bruă klă sĭt găn mđiă, găn hjan čiăng bi leh knong hlăm brô 6 mlan, hmao ba sang hră ngă bruă hlăm thŭn hriăm 2026 - 2027. Truh kơ ară anei, jih jang dŭm mta bruă dưi bi leh leh anăn ba yua.

Trịnh Văn Cường mñă ktang, anei jing hdră bruă yuôm bhăn mâo Phŭn bruă lĭng kahan rŭ mdơ̆ng mđup brei kơ mnuih ƀuôn sang să Ea Rôk. Sang hră amâo djŏ knŏng bi mbŏ kdrăp mnơ̆ng hnơ̆ng jăk klei hriăm hră ƀiădah lŏ mkŏ mjing klei găl čiăng kơ alŭ wăl kriê dlăng jăk hĭn kơ phung hđeh, boh nik jing phung hđeh hlăm gŏ sang ƀun ƀin,  gŏ sang Knŭk kna dlăng ba leh anăn phung hđeh mâo klei hdĭp dleh dlan.

“Să gĭt gai klă anăp jing adŭ bruă dhar kreh yang ƀuôn leh anăn êpul khua kiă kriê Sang hră jêñ jêñ ksiêm dlăng klei huă ƀơ̆ng yang hruê, dôk hlăm sang hră, boh nik jing klei doh êƀăt mnơ̆ng ƀơ̆ng huă, hưn mdah klă mngač mtă jăk hlăm mmông huă ƀơ̆ng kơ phung hđeh. Rơ̆ng grăp mmông huă ƀơ̆ng mâo djăp mta jăk leh anăn phung hđeh lač mmông huă ƀơ̆ng nao đŏk kƀông êdi, rơ̆ng djăp mta jăk brei mâo klei hơĭt hriăm hră mơar.

Mơ̆ng klei hơĭk mơak mơ̆ng phung hđeh truh kơ klei jih ai tiê mơ̆ng phung nai, phung tŭk knă leh anăn bruă klam mơ̆ng Bruă sang čư̆ êa alŭ wăl, sang hră Knŭk kna rông ba mơ̆ng phŭn bruă lĭng kahan rŭ mdơ̆ng mđup brei kơ sa krĭng 3 dleh dlan dôk jing anôk knang kơ phung hđeh sang hră krĭng dleh dlan. Klei yuôm mơ̆ng hdră bruă amâo djŏ knŏng kdrăp mnơ̆ng kdrưh kơăm ƀiădah lŏ ti găl găl hriăm hră, hdĭp mda leh anăn đĭ hriê jăk hĭn, boh nik hŏng phung hđeh mâo klei hdĭp dleh dlan.