Mơ̆ng krah mlan 4, dŭm anôk đih đăm hŏng êbeh 2.000 adŭ dôk ti wăl krah Măng Đen, kdriêk Kon Plŏng, čar Kon Tum mâo phung tuê kuôl kă dôk bŏ leh kơ wưng mdei knăm mơak hruê 30/4 lehanăn hruê 1/5. Hlăm ai êwa mčhĭt mơuăt mơ̆ng hdră hiu čhưn ênguê Măng Đen ară anei, dleh snăk dưi bi mĭn amâo sui ôh hŏng anei, krĭng lăn 7 ênao 3 drai êa anei gơ̆ dôk bhiông êyăng, lu jing ktuê êlan đ’điêt mâo lu kêč ƀloh lehanăn êruê. Găn sa wưng tal êlâo dleh dlan, Măng Đen ƀrư̆ ƀrư̆ dưi bi mklă kơhưm jing sa anôk truh jăk êdi hlăm ktuê êlan hiu ksiêm dlăng Lăn dap kngư prŏng kdrưh mơ̆ng phung tuê hiu čhưn ênguê jĕ giăm taih kbưi. Nguyễn Xuân Hùng, sa čô tuê hriê mơ̆ng Ƀuôn prŏng phŭn Hà Nội hơ̆k mơak lŏ wĭt hŏng Măng Đen.

 “Kâo truh ti Măng Đen lu blư̆ leh, hriê tinei tui ksiêm kơ lăn êa wăl hdĭp mda lehanăn dŭm mta mnơ̆ng ƀơ̆ng ti alŭ wăl. Măng Đen jăk ênang msĕ si sa čô mniê êra 18 thŭn anăn čiăng drông jih jang phung êkei êdam mơ̆ng djăp krĭng kwar mơ̆ng ala čar truh tinei tui ksiêm klei siam mơ̆ng Măng Đen anei. Sa thŭn gĭr hriê 2, 3 blư̆ truh tinei čiăng dưi mơak mbĭt hŏng ƀĭng găp ti krĭng lăn Măng Đen anei”.

Tlâo thŭn giăm anei, hiu čhưn ênguê Măng Đen – Kon Plŏng đĭ kyar nanao, grăp thŭn drông dŭm êtuh êbâo čô tuê hiu čhưn êngiê. Phung duh bi liê lehanăn phung tuê hiu čhưn ênguê amâo mdei truh ti krĭng lăn anei lehanăn anei jing boh kdrŭt čiăng kơ Măng Đen bi mlih hlăm grăp hruê hruê.

Čiăng mjing klei tluh tluñ kơ Măng Đen ti hră kak lăn hiu čhưn ênguê, hlăm dŭm thŭn êgao, čar Kon Tum mđing leh djăp klei găl mâo duh kơ anôk bruă nah gŭ, mnuih mă bruă lehanăn mđĭ hdră hưn mthâo, bi hgŭm hdră hiu čhưn ênguê hlăm lehanăn êngao ala čar. Đặng Đình Toán, Khua adŭ bruă Dhar kreh, kreh knhâo lehanăn hâo hưn kdriêk Kon Plŏng brei thâo, hŏng hdră êlan mđĭ kyar bruă hiu čhưn ênguê hơĭt kjăp mguôp hŏng bruă kriê pioh lehanăn mđĭ lar dŭm boh tŭ yuôm dhar kreh đưm mơ̆ng mnuih ƀuôn sang djuê ana ƀiă, kdriêk mphŭn dưi mkŏ mkra leh dŭm anôk bruă nah gŭ mkăp kơ phung tuê hiu čhưn ênguê.

 “Truh kơ ară anei, hmei mâo leh 142 anôk bruă đih đăm. Mnuih ƀuôn sang djuê ana ƀiă pô mtam thâo ba yua lehanăn mđĭ lar klei găl mâo mơ̆ng gŏ sang lehanăn pưk sang pô, mơ̆ng anăn mđĭ kyar hdră hiu čhưn ênguê. Kơ hdră hiu čhưn ênguê snăn hmei mđing kơ mnơ̆ng lŏ hma ba yua kdrăp mrâo lehanăn dŭm mta mnơ̆ng jiă knhuah dhar kreh tinei, msĕ si sang mnia Măng Đen, wăl duh mkra mlam, Đang mnga siam Măng Đen. Hdră hiu čhưn ênguê hmei mđing truh anăn jing hdră hiu čhưn ênguê kơ lăn adiê”.

Mbĭt hŏng bruă mđĭ lar klei găl mâo, krĭng lăn 7 ênao 3 drai êa mơ̆ng ênuk đưm êlâo lehanăn hdră hiu čhưn ênguê Măng Đen – Kon Plŏng hruê anei dôk tlă anăp hŏng klei găl kpưn đĭ kbưi hĭn hlăk Quảng Ngãi lehanăn Kon Tum hluê ngă hdră bi mŭt mbĭt.

Mrâo êgao, khua kiă kriê 2 čar Quảng Ngãi lehanăn Kon Tum ruah leh Măng Đen čiăng mkŏ mjing anôk mă bruă tal êlâo bi trông kơ hdră bi mŭt čar. Hlăm lu mta klei mâo bi trông snăn bruă mkra mđĭ êlan dơ̆ng mrô 24 lehanăn mtrŭt mđĭ bruă mkra êlan êran pral mâo 2 čar sa ai. Bùi Viết Hà, Khua êpul hgŭm hdră hiu čhưn ênguê Măng Đen brei thâo, anei jing klei găl čiăng kơ hdră hiu čhưn ênguê dliê – êa ksĭ mđĭ hĭn klei jak ieue phung tuê hiu čhưn ênguê.

 “Knŭk kna brei bi mŭt čar Quảng Ngãi- Kon Tum, hmei jing mnuih ngă bruă hiu čhưn ênguê ti Măng Đen hmei mơak êdi. Măng Đen dôk ti wăl krah phŭn. Măng Đen ăt jing anôk phŭn hlăm hdră hiu čhưn ênguê mơ̆ng čar kyua anăn hmei đăo knang srăng đĭ kyar. Mnuih mă bruă hiu čhưn ênguê brei mprăp kơ pô ai tiê, klei duh bi liê dơ̆ng mơ̆ng klei mă bruă truh kơ prăk kăk čiăng bi mlih anôk bruă pô. Êpul hiu čhưn ênguê hmei ăt dôk tĭng kơ hdră ngă klă klơ̆ng čiăng dưi mđĭ kyar krĭng lăn anei.

Mơ̆ng sa krĭng lăn dleh dlan, huâng kduâng leh klei bi blah, Măng Đen – Kon Plŏng hruê anei hơô leh kơ pô sa klei bi mlih mrâo, jăk ênang, jĕ giăm lehanăn bŏ hŏng ai êwa hdĭp. Dŭm ktuê êlan ti krĭng lăn 7 ênao 3 drai ară anei mčhĭt mơuăt leh, mâo lu phung tuê hiu čhưn ênguê hriê tui ksiêm. Mơ̆ng hdră êlan bi mŭt 2 čar Quảng Ngãi lehanăn Kon Tum, Măng Đen-Kon Plŏng dôk mâo klei jăk čiăng kpưn đĭ kbưi hĭn mñă klă pô ti hră kak lăn hiu čhưn ênguê krĭng wăl lehanăn tar rŏng lăn./.