Să Da Chais, kdriêk Lạc Dương, čar Lâm Đồng, kbưi hŏng ƀuôn prŏng Đà Lạt hlăm brô 60km hŏng êlan dơ̆ng mrô 27C phă êa ksĭ. Lĭng kahan hđăp Kơ Să Ha Tam, 83 thŭn, mnuih K’Ho ti alŭ Tu Poh, să Dă Chais brei thâo, lu phung anak mơ̆ng ƀuôn săn asei mlei ti krĭng lăn anei leh anăn dưi čih anăn ti knưng bi hdơr mơ̆ng kdriêk. Ñu mgei ai tiê yăl dliê kơ ênuk hlăk ai dleh dlan êjai nao hgŭm đru mdăp knuă druh, jing pô ba mnơ̆ng leh anăn bh phao kơ anôk bi blah.

“Pô knă êsei srăng knă jăk, dlăng kơ pui amâo brei mâo săp, tơdah mâo săp phung roh srăng ƀuh leh anăn mnah mtam, knă êsei rông kahan. Pô ngă bruă hưn mơ̆ng 18, 19 thŭn, bi gui boh bao  hlăk 20 thŭn. Êjai dôk ngă hlăk ai ba anăp, hŭi hĭn jing mmông B52 mplĕ ƀom. Nô năng pô djiê mmông anăn leh, êjai anăn tuôm hŏng êdeh phiơr mplĕ ƀom djiê 7 čô hlăm êpul”.

Ktưn hưn kơ ênuk hlăk ai nao hgŭm bi blah mtlaih êngiê ƀuôn sang, lĭng kahan hđăp K’Dĩnh, 82 thŭn, mnuih K’Ho, ti să Lộc Nam, kdriêk Bảo Lâm, čar Lâm Đồng bi êdah, klei asăn asei kơ phung ênuk êlâo dôk đru kơ ƀuôn sang ƀrư̆ hruê ƀrư̆ mdrŏng siam.

“Mnuih ƀuôn sang nao hgŭm cách mạng, đru mguôp braih mkuê̆ rông kahan, Grăp sang mâo hdră pioh briah hlăm huôm, pia jing huôm briah rông kahan. Ai tiê mơ̆ng mnuih ƀuôn sang sơnăn truh kơ hruê mtlaih êngiê. Mơ̆ng hruê mâo klei êđăp ênang klei hdĭp mnuih ƀuôn sang đĭ kyar, hơĭt ênang, gĭr mă bruă knuă. Ară anei êlan klông jăk, mnuih ƀuôn sang leh anăn knŭk kna bi ngă mbĭt, knŭk kna duh bi liê êlan klông, ƀrư̆ hruê ƀrư̆ siam hĭn. Lač sĭt, ară anei mnuih ƀuôn sang knŏng mđing bi mdrŏng đuč”.

50 thŭn leh mtlaih êngiê, dŭm djuê ana ti čar Lâm Đồng mâo leh klei mlih. Ƀon Yô Soan, k’iăng khua dhar bruă mặt trận čar Lâm Đồng brei thâo, ară anei gŏ sang ƀun hlăm čar knŏn adôk ti gŭ 2%, hlăm anăn gŏ sang ƀun mnuih djuê ƀiă ti gŭ 5,5%. Bi lar ai tiê bi mguôp, mnuih ƀuôn sang dŭm djuê ana dôk hrăm mbĭt mkŏ mjing ƀuôn sang mdrŏng ktang.

“Ară anei mnuih ƀuôn sang thâo mkŏ wĭt ana pla mjing, mnơ̆ng rông, dưn yua klei kreh knhâo mrâo mrang hlăm klei mă bruă. Kâo mĭn hlăm wưng kơ anăp srăng mâo klei mlih jăk hĭn hŏng mnuih ƀuôn sang mơ̆ng čar Lâm Đồng, hlăm anăn mâo wăt mnuih djuê ƀiă”.

50 thŭn găn êgao, dŭm krĭng lăn boh ƀom, boh phao đưm ară anei jing leh să krĭng ƀuôn sang mrâo đĭ kyar. Mnuih ƀuôn sang dŭm djuê ana ti Lâm Đồng dôk đăo knang mbĭt hŏng lăn čar mŭt hlăm wưng đĭ kyar mrâo./.