Ti anôk hiu čhưn ênguê ƀuôn Akŏ Dhông, ƀuôn hgŭm Ƀuôn Ama Thuô̆t, wăl anôk tông čing mbĭt hŏng dŭm klei kdŏ mmuñ đưm iêo jak lu phung tuê nao dlăng hlăm dŭm hruê akŏ thŭn mrâo. Amai Freya, sa tuê mơ̆ng Mi brei thâo, wăl anôk mtah siam, yan adiê đao mbĭt hŏng klei mhač mơ̆ng mnuih ƀuôn sang leh anăn knhuah dhar kreh alŭ wăl jing klei amâo mâo dưi wơr ôh.

“Mâo diñu drông jăk êdi, hơ̆k mơak êjai tinei msĕ hŏng yan hjan, klei hmei amâo mâo mưng ôh kyua gŏ sang hmei ti Mi, yan adiê êăt hlăm akŏ thŭn mrâo. Kyuanăn, hmei hơ̆k mơak kyua klei mđao anei. Ti Mi, grăp čô bi huă mnăm lu hĭn, bi tinei msĕ si mâo klei bi hgŭm leh anăn huă ƀơ̆ng hŏng gŏ sang lu hĭn hŏng mah jiăng leh anăn arăng êgar”.

Hŏng phung tuê hlăm lăn čar, Dak Lak ăt jing anôk truh wưng akŏ thŭn čiăng mdei msăn, dlăng kơ dliê kmrơ̆ng leh anăn ksiêm duah dhar kreh krĭng kwar. Nguyễn Ngọc Chân, ti ƀuôn prŏng Hồ Chí Minh brei thâo, dŭm gưl nao hiu msĕ sơnei đru kơ phung anak ñu mâo thiăm klei hriăm leh anăn klei ktuê dlăng sĭt.

“Akŏ thŭn mrâo phung hđeh dưi mdei sang hră, kyuanăn gŏ sang kâo hriê ti Ƀuôn Ama Thuô̆t jing krĭng pla mjing kphê mơ̆ng Việt Nam, čiăng kơ dua čô anak ksiêm hriăm kơ dhar kreh alŭ wăl ăt msĕ mơh thâo bĭt anôk, brei kơ diñu thâo si ngă krĭng Lăn Dap Kngư”.

Hlăm wăl dhar kreh mơ̆ng mnuih Êđê, ƀơ̆ng dŭm mta mnơ̆ng knhuah gru, dlăng klei kdŏ mmuñ leh anăn blŭ hrăm hŏng phung thâo mbruă brei leh kơ phung tuê klei amâodưi wơr ôh. Mơ̆ng dŭm klei anăn, mnuih ƀuôn sang dŭm ƀuôn êlan ƀrư̆ ƀrư̆ ngă bruă hiu čhưn ênguê hŏng knhuah gru dhar kreh êpul êya.

Hluê si Y- Nuel Niê, mduôn ƀuôn Akŏ Dhông, dŭm thŭn giăm anei, bruă hiu čhưn ênguê êpul êya mâo mnuih ƀuôn sang uêñ mĭn, mkŏ mjing dŭm gru hmô wăl mnơ̆ng hdĭp leh anăn dhar kreh. Hlăm thŭn mrâo, êpul kiă kriê bruă hiu čhưn ênguê êpul êya mơ̆ng ƀuôn lŏ mkra thiămn dŭm mta mnơ̆ng leh anăn bruă čiăng mđĭ hnơ̆ng đru kơ phung tuê.

“Dŭm mta mnơ̆ng, boh nik jing mnơ̆ng ƀơ̆ng huă jơr hĭn mkă hŏng thŭn 2025, dŭm gru hmô mkăn kơ klei mmuñ ăt bi mlih mrâo. Hlăm ƀuôn pô grăp mlan srăng mâo klei kdŏ mmuñ brei kơ phung tuê dlăng”.

Hŏng dŭm knơ̆ng bruă hiu čhưn ênguê ti Dak Lak, mđĭ kyar ƀruă hiu čhưn ênguê wăl mnơ̆ng hdĭp leh anăn dhar kreh êpul êya jing êlan nao hơĭt kjăp. Nguyễn Thị Ngọc Anh, knơ̆ng bruă hiu čhưn ênguê êpul êya Kŏ Tam, ƀuôn hgŭm Tân Lập brei thâo, bruă hiu čhưn ênguê wăl mnơ̆ng hdĭp - êpul êya amâo djŏ knŏng mâo prăk hrui wĭt, ƀiădah lŏ mđing truh răng mgang wăl hdĭp mda, bi lar klei găl bruă lŏ hma - rông mnơ̆ng ti čar:

“Kyua jing anôk hiu čhưn ênguê wăl mnơ̆ng hdĭp, dhar kreh êpul êya, hmei kñăm kơ bi siam wăl anôk, mprăp dŭm dja mtam mơ̆ng rông mnơ̆ng, pla mjing čiăng đru kơ mnơ̆ng ƀơ̆ng. Hmei mprăp êlâo leh anăn rông tinăn mtam, kyuanăn jih jang dŭm hruê knăm, ênoh amâo mâo mlih ôh, ăt kăn lŏ mă prăk mkăn lei mkă hŏng hruê yang đar.

Bi lar knhuah dhar kreh êpul êya leh anăn boh sĭt, bruă hiu čhưn ênguê Dak Lak mâo lu phung tuê khăp. Hlăm dŭm hruê akŏ thŭn mrâo, kyua mâo ênai čing, klei kdŏ čhuang leh anăn klei mhač mơ̆ng mnuih ƀuôn sang dŭm ƀuôn êlan jing leh mta kñăm iêo jak kơ alŭ wăl.