Ênai čing kwang ti gŭ pruê̆ kyâo prŏng mtah ti êlan dơ̆ng Trần Quang Khải, ti djiê wăl tač hruê 10/3, ƀuôn prŏng Ƀuôn Ama Thuôt, čar Dak Lak lŏ êđăp êjai ti krah yang bhang hlơr hlăm dŭm hruê mdei mrâo êgao. Klei kdŏ čhuang nao mbĭt hŏng klei mmuñ ênhiang êdu êun ngă kơ mnuih ƀuôn sang leh anăn phung tuê găn ti anôk anôk mdei dlăng hĕ. Aduôn Nguyễn Thị Oanh, sa čô tuê mơ̆ng čar Nam Đinh brei thâo:

“Hriê tinei tăm ƀuh hĕ klei rang mdah tông čing krĭng Lăn Dap Kngư kâo hlŏng nao dlăng mtam. Čing čhar jing mrô 1 leh, hlăm lăn čar knŏng krĭng Lăn Dap Kngư đuč yơh mâo čing. Ênai čing krĭng Lăn Dap Kngư djăp anôk mơak mñai êdi”.

Hdră rang mdah klei tông čing leh anăn klei kdŏ mmuñ hŏng kă “Lăn čar bŏ klei mơak” jing hdră bruă mơ̆ng Anôk bruă dhar kreh – mjuă asei mlei ƀuôn prŏng Ƀuôn Ama Thuôt mkŏ mjing ti wăl tač ƀuôn prŏng djŏ wưng hruê mdei 30/4 leh anăn hruê 1/5 thŭn anei. Hŏng klei tông čing, pĕ tông kdrăp djuê ana mơ̆ng dŭm êpul phung kdŏ mmuñ mơ̆ng Ƀuôn Ky, Ƀuôn Akŏ Tam, êpul mmuñ Then ƀuôn prŏng Ƀuôn Ama Thuôt, Rang mdah mơ̆ng êpul hgŭm kriê pioh ao Dai Việt Nam ti čar Dak Lak, Êpul kdŏ oremi Kid...dưi mkŏ mjing leh sa hdră kdŏ mmuñ lu jơr leh anăn hơ̆k mơak. Trương Ngọc Bảy, ti să Ea Kuăng, kdriêk Krông Pač, čar Dak Lak nao dlăng hdră anei brei thâo:

“Mâo dŭm djuê ana, mnuih Êđê, Tày leh anăn dŭm djuê ana mkăn mâo knhuah gru mdê mdê. Knhuah gru dhar kreh anăn jing klei ktưn hưn mơ̆ng mnuih ƀuôn sang, kyuanăn klei mjĕ mjuk dhar kreh čiăng kơ mnuih ƀuôn sang hmei dưi thâo klă dhar kreh kluôm dhuôm hĭn”.

Amâo djŏ knŏng ti wăl tač hruê 10/3, hlăm wưng hruê mdei 30/4 leh anăn 1/5 mrâo êgao, lu anôk hiu čhưn ênguê ti čar Dak Lak mkŏ mjing dŭm mta klei kdŏ mmuñ jiă kma knhuah gru dhar kreh krĭng Lăn Dap Kngư msĕ si: tông čing, mmuñ then ƀrô̆ tính, mkra mjing kdrăp pĕ tông, mnăm kpiê čeh, ƀơ̆ng dŭm mta mnơ̆ng jăk yâo mơ̆ng mnuih Êđê, M’Nông, Lào… brei leh kơ phung tuê hiu čhưn ênguê dŭm klei ktuê dlăng jăk êdi.

Lý Thế Quân, sa čô tuê hiu čhưn ênguê mơ̆ng ƀuôn prŏng Hồ Chí Minh brei thâ0, kâo dlăng jăk êdi kơ klei rang mdang tông đĭng boh tâo leh anăn kdrăp pĕ tông dŭm djuê ana ti êlan dlăng hră kphê Ƀuôn Ama Thuôt hlăm gưl hiu čhưn ênguê ti čar Dak La wưng anei.

 "Kâo ƀuh dŭm klei kdŏ mmuñ pluă mbĭt jing dlăng jăk êdi, bi êdah knhuah gru dhar kreh krĭng kwar, boh nik jing mnuih Êđê. Hŏng dŭm asăp mmuñ, kâo ƀuh hmư̆ jăk êdi, kwang êdi, jiă kma čư̆ dliê. Klei anei kâo ƀuh anôk mkăn amâo mâo ôh”.

Amâo djŏ knŏng phung tuê mơ̆ng dŭm alŭ wăl mkăn, wăt mnuih ƀuôn sang dôk hdĭp ti čar Dak Lak ăt ƀuh jăk êdi hŏng dŭm mta bruă dhar kreh, kdŏ mmuñ jiă kma knhuah gru krĭng Lăn Dap Kngư dưi mkŏ mjing hlăm dŭm hruê êgao. Amai Trần Thị Đan Phương, ti ƀuôn hgŭm Tân Lập, bo Ƀuôn Ama Thuôt brei thâo:

“Sa wưng mdei sui ƀiădah gŏ sang kâo ăt bi klă dôk ti sang pô ti ƀuôn prŏng Ƀuôn Ama Thuôt čiăng ktuê dlăng dŭm hdră dhar kreh. Leh anăn kâo ƀuh djum dar pô mâo lu sơnăk klei jăk mơak msĕ sơnăn. Hmăng hmưi Dak Lak srăng lŏ mâo dŭm hdră jăk msĕ sơnăn hĭn kơ lu gŏ sang, mâo dŭm gŏ sang amâo mâo klei găl leh anăn mâo gŏ sang diñu čiăng ktuê dlăng thiăm dưi mâo klei hơ̆k mơak hĭn”.

Jing krĭng lăn lu jơr dhar kreh hŏng 49 djuê ana hdĭp mda, êngao kơ dŭm klei găl, wăl siam, lu gru kruăk knal dhar kreh dŭm djuê ana jing mta knăm mkŏ mjing knhuah mdê hjăn mơ̆ng bruă hiu čhưn ênguê Dak Lak. Mă yua dŭm klei găl anăn, amâo djŏ knŏng hlăm wưng mdei mrâo êgao, ƀiădah dŭm anôk bruă hiu čhưn ênguê ti Dak Lak hlăm wưng êgao jhŏng mkŏ mjing dŭm bruă hiu čhưn ênguê čiăng iêo jak phung tuê hriê ti alŭ wăl. Mơ̆ng dŭm klei bi hmô anei pŏk dŭm klei găl kơ bruă hiu čhưn ênguê krĭng Lăn Dap Kngư ba yua knhuah dhar kreh ala ƀuôn mkŏ mjing klei kruăk knăl kơ dŭm krĭng ƀuôn sang krĭng Lăn Dap Kngư./.