Vu Rcom, ƀuôn Ia Rniu, să Ia Broái, kdriêk Ia Pa hlăk dôk dlăng kriê kêbưn ktơr mâo truh 1 héc-ta H’Rcom brei thâo, anei jing yan pla ktơr tal 3 leh hlăm thŭn, đru gŏ sang ñu dưi mâo truh 80 êklăk prăk leh kah hĕ jih kơ ênoh bi liê.

“Hŏng hdră pla mjing mrâo, mnuih ƀuôn sang bi pla ktơr mâo lu klei găl hĭn, hŏng klei ba yua kdrăp krih êa hlăm klei mkiêt mkriêm, bruă knuă ăt hdjul mơh mkă hŏng êlâo dih. Sa kdrêč mâo klei tŭ jing mơ̆ng bruă pla ktơr anei kyua mâo amai Kpă H’Yư, knuă druh bruă mniê să ktrâo atăt hdră mă bruă, đru lu mnuih hlăm ƀuôn hlăm dŭm hrue tal êlâo”.

 Rcom Tiêu – Khua ƀuôn Ia Rniu hŏng klei mơak lač: Kyua mâo ba yua klei kreh knhâo, grăp héc-ta ktơr mâo mơ̆ng 35 - 40 tôn. Mơ̆ng klei bi mlih hdră mă bruă mrâo, ƀuôn  Ea RNiu dơ̆ng hrŏ leh gŏ sang dôk hlăm klei dleh dlan, ară anei knŏng adôk mă hlăm brô 73 gŏ sang.

“Êlâo dih pla ktơr sa thŭn knŏng sa yan đuič, ƀiădah mơ̆ng leh ba yua hdră mă bruă mrâo, 1 thŭn mâo pla mơ̆ng 3-4 yan ktơr, mbĭt hŏng êpul hgŭm bruă mniê mâo leh klei bi kƀĭn phung amai adei, ktrâo atăt kơ bruă pla mjing ktơr hŏng hdră mrâo, jing hdră dưi tui ngă mdê mdê, dơ̆ng mơ̆ng krih êa hlăm kllei mkiêt mkriêm, truh kơ bruă prue hbâo, krih êa drao, mâo leh phung amai adei tui ngă, mơ̆ng hdră anei ba wĭt leh boh mnga lu hĭn”.

Klei đru mnuih djuê ana Jarai bi mlih mnơ̆ng pla, ba yua klei kreh knhâo hlăm klei mă bruă, mâo ba wĭt leh klei tŭ dưn, hlăm anăn mâo ai tiê amai Kpă H'Yư, Khua êpul hgŭm bruă mniê să Ia Broái. Ñu đru kčĕ leh hŏng gưl bruă Đảng, bruă sang čư̆ êa, mâo lu hdră bi hmô hlăm klei duh ƀơ̆ng hlăm krĭng mnuih djuê ƀiă. Amai Kpă H'Yư, lač:

“Asei kâo pô mtam yơh mđĭ ai phung amai adei, grăp čô mnuih brei mâo klei bi mlih ƀrư̆ ƀrư̆ dơ̆ng mơ̆ng klei mĭn, knhuah ngă bruă, thâo ba yua klei kreh knhâo, msĕ si êlâo dih dôk guôn mơ̆ng mâo hjan hlĭm, ƀiădah ară anei, mâo leh klei krih êa hŏng klei mkiêt mkriêm, thâo pruê hbâo, krih êa drao răng mgang mnơ̆ng pla mjing, ară anei lu phung amai adei bi mlih leh klei mĭn, hdră mă bruă, lehanăn thâo ba yua klei kreh knhâo hlăm bruă pla mjing”.

Tui si Vương Chí Thông, K’iăng khua bruă Đảng să Ia Broái, kyua klei gĭr amâo mâo mdei mơ̆ng phung knuă druh, msĕ si amai H'Yư, bruă bi hrŏ ƀun hlăm să hlăk mâo leh dŭm klei tŭ dưn jăk.

“Klei thâo bi hmô mơ̆ng khua êpul bruă mniê să, jing hur har, jih ai tiê hlăm klei mtrŭt mjhar mđĭ ai mnuih ƀuôn sang gĭr ktir mă bruă, kñăm bi hrŏ klei dleh dlan, mnuih ƀuôn sang hmư̆, mnuih ƀuôn sang gưt, tui ngă jih jang bruă čiăng bi hrŏ klei dleh dlan kơ pô, tui si să đru leh. Ñu mâo leh êpul hgŭm bruă mniê gưl dlông mđup brei klei mpŭ mni, kyua thâo mđĭ ai mnuih ƀuôn sang hlăm klei duh ƀơ̆ng. Ñu jing mnuih kreh kriăng, thâo gĭr hlăm bruă mtrŭt mjhar mnuih ƀuôn sang”.

Hŏng boh tŭ dưn mâo ba wĭt hlăm bruă êpul hgŭm mniê, lehanăn klei phung mniê bi ktưn thŭn 2023, amai Kpă H'Yư mâo klei myun gưl dlông bruă mniê Việt Nam mđup brei klei mpŭ mni. Ƀiădah hŏng ñu, klei pah mni prŏng hĭn anăn jing klei khăp, klei mnuih ƀuôn sang mpŭ, lehanăn dŭm klei bi mlih hlăm mmnuih ƀuôn sang hlăm alŭ wăl, yơh jing klei pah mni yuôm bhăn hĭn./.