Nai Kpă Pual brei thâo, klei myun ñu jing “Pô thơ̆ng” kơ bruă ksiêm hriăm klei  Jarai jing thŭn 2008, Sang hră gưl prŏng Lăn dap kngư pŏk adŭ bi hriăm bruă Giáo dục Tiểu học klei Jarai. Anei jing bruă mrâo, ka mâo nai mtô. Nai Kpă Pual mâo Knơ̆ng bruă Sang hră mơar mtô bi hriăm čar Gia Lai hưn mthâo brei ngă nai mtô kơ sang hră gưl prŏng Lăn dap kngư; đru mjuăt bi hriăm phung nai kơ sang hră lehanăn mtô bi hriăm phung hđeh hriăm hră. Êdei anăn, ñu mâo Phŭn bruă Sang hră mơar mtô bi hriăm jak nao hgŭm čih mkra hdruôm hră hriăm klei Jarai mơ̆ng adŭ 1 truh kơ adŭ 5. Mbĭt anăn, Knơ̆ng bruă kreh knhâo sang hră mơar, Phŭn bruă Sang hră mơar mtô bi hriăm jak đru nao ksiêm hriăm, čih Hdruôm hră dua klei blŭ hluê hŏng klei amĭ kkiêng (klei Jarai), Hdruôm hră mkăp kơ Hdră bruă rơ̆ng hnơ̆ng tŭ jăk bruă mtô bi hriăm ti sang hră (SEQAP)….

“ Kâo pô hriăm thơ̆ng kơ klei hriăm Toán, ƀiădah kâo ƀuh klei Jarai pô mâo ƀiă snăk mnuih tui ksiêm êlam, kyua anăn kâo pô gĭr tui ksiêm čiăng kriê pioh hŏng mta kñăm lŏ mtô bi hriăm kơ phung hđeh ênuk gưl êdei. Kâo ƀuh dhar kreh mnuih Jarai mâo lu klei jăk siam, ƀiădah ƀiă snăk mnuih ăt dôk djăp pioh. Kâo čang hmăng amâo djŏ knŏng hjăn kâo ƀiădah hlei pô thâo kơ klei Jarai bi gĭr tui ksiêm mbĭt čiăng kơ dhar kreh, klei Jarai mơ̆ng djuê ana pô amâo luič ram ôh.

Dưi kkiêng lehanăn đĭ hriê kơ prŏng ti krĭng ƀuôn sang, đĭ kơ prŏng hlăm klei hriăm hră, kyua anăn hlăm hdră mtô, tui ksiêm, čih mkra hdruôm hră, nai Kpă Pual thâo klă êdi kơ klei hdĭp aguah tlam mlam hruê mơ̆ng mnuih Jarai. Boh nik, dŭm klei duê, klei khan mơ̆ng mnuih Jarai mâo leh ñu ba hlăm hdruôm hră, kñăm đru krơ̆ng kjăp knhuah dhar kreh jăk siam mơ̆ng djuê ana pô.

“Dŭm klei čih, klei duê hmei lŏ čih pioh čiăng dưi krơ̆ng kjăp, jih jang kbiă hriê mơ̆ng klei hdĭp mnuih ƀuôn sang Jarai sơaĭ. Anăn jing dŭm klei blŭ kbiă hriê mơ̆ng klei hdĭp ti krĭng ƀuôn sang, dŭm klei khan mơ̆ng aduôn aê ênuk đưm jiă kma klei mtô mjuăt. Đa đa mâo dŭm klei duê, klei blŭ, klei čih lač kơ klei hdĭp aguah tlam mlam hruê, hdră răng mgang bruă djuê ana mơ̆ng đưm… jih jang hmăi čih pioh čiăng lŏ mtô kơ ênuk gưl êdei.

Kpă Pual lu thŭn mă bruă ti anôk bruă mtô bi hriăm hŏng krĭng dleh dlan Krông Pa, Gia Lai. Tal êlâo ñu knŏng nao hgŭm hlăm gưl hriăm sơ cấp sư phạm 1 thŭn leh kơnăn nao mtô, êdei anăn ñu lŏ nao hriăm Trung cấp sư phạm ti Kon Tum. Leh ruê̆ hriăm, ñu wĭt mtô ti sang hră hlăm alŭ wăl 3 thŭn, nai Kpă Pual akâo lŏ nao hriăm Gưl prŏng hriăm êjai mă bruă êjai Quy Nhơn. Hlăm hdră mă bruă, ñu mâo êbeh 10 thŭn ngă Khua sang hră, lehkơnăn ngă Kơiăng khua Knơ̆ng bruă sang hră mơar mtô bi hriăm kdriêk Krông Pa, êdei anei lŏ dưi mă bruă ti Knơ̆ng bruă sang hră mơar mtô bi hriăm čar Gia Lai, păn ngă Khua anôk bruă mtô bi hriăm mnuih djuê ƀiă. Khă snăn, êdei anăn, ñu akâo wĭt ti alŭ wăl, ngă nai mtô hlŏng truh ti thŭn dưi mdei bruă.

“Truh thŭn mdei ƀiădah amâo mdei bruă” ară anei wĭt hŏng ƀuôn sang, ƀiădah nai Kpă Pual ăt hur har ksiêm hriăm, nao hgŭm hlăm êpul bi mklă hdruôm hră klei Jarai mơ̆ng Phŭn bruă sang hră mơar mtô bi hriăm mbĭt anăn lŏ nao mtô hlăm adŭ bi hriăm klei Jarai kơ phung knuă druh ti alŭ wăl.

“Bruă krơ̆ng kjăp klei Jarai jing yuôm bhăn êdi, hlăm anăn mâo dŭm klei duê lač kơ klei bhiăn amâo dah klei mtă mtăn, mtô bi hriăm phung čô anak brei yua hŏng klei Jarai mtam snăn kơh dưi thâo săng klă kơ klei tŭ yuôm anăn. Hlăm hdră tui ksiêm, hmei yua dua klei blu, đa đa hlăm klei blŭ mnuih djuê lar amâo mblang klă ôh, kyua anăn hmei lui klei Jarai snăn yơh čiăng dưi bi êdah jih klei aduôn aê pô đưm adih čiăng lač”.

Jih ai tiê hŏng boh hră, nai Kpă Pual jing gru mngač kơ klei khăp mơai, hur har hlăm bruă mtô bi hriăm klei Jarai kơ ênuk gưl êdei./.