Êlâo kơ hrue nao ti ƀuôn prŏng Hồ Chí Minh truh ti anôk bi kƀĭn prŏng êdam êra kdlưn hĭn hlue ngă knhuah mngač mơ̆ng Awa hlăm kluôm ala tal 8, thŭn 2025, Kpuih HMin ăt hnêč kgŭ ưm, nao kơ đang ksu čiăng ktrâo atăt bruă riêt ktăk ksu bi djŏ hŏng êpul mrâo hriăm bruă riêk ktăk ksu. Hŏng ai tiê hur har mơ̆ng khua kiă kriê bruă êdam êra, mđĭ ai leh kơ ƀĭng mă bruă mbĭt. Pô mă bruă mda asei hĭn Siu Pôp brei thâo:
“Kpuih Hmin jing mnuih mbruă êdi, ktrâo atăt leh kơ hmei bruă riêk ktăk ksu mâo klei tŭ dưn snăk. Hmei tui hriăm lehanăn ba yua djŏ snăn lehanăn jing jăk găl êdi. Sitôhmô Kpuih Hmin ktrâo atăt hdră riêk ktăk ksu čiăng bi mâo lu ktăk ksu kbiă snăn hriăm riêk amâo mâo êlam ôh, ăt kăn êđal rei; êlan riêk ƀuh jing điêt ƀiădah ktăk ksu kbiă lu snăk, lehanăn jing ktăk jăk. Êngao anăn, Hmin thâo lŏ mkra đĭng krih êa drao mduê dlông pioh krih êa drao amâodah mmia êa ƀlĭt mkhư̆ mmao jhat kơ ana ksu, hlăm dŭm anôk jing dleh dlan, mnĭ anei ka dưi ngă ôh. Hmin jing leh gru bi hmô jăk êdi hlăm phung êdam êra thâo mă bruă, lehanăn jih ai tiê ktrâo atăt mnuih mă bruă hlăm klei mă bruă”.

Pral hur har hlăm bruă knuă mđrăm mbĭt hŏng bruă êdam êra , jih jang bruă mơ̆ng Kpuih HMin dŭm thŭn êgao mâo leh dŭm dhar bruă, dŭm gưl čih pioh. Êdah êdi jing mâo mă anăn knăl “Hđeh êdam kdlưn hĭn hlue gưt asăp Awa” gưl čar wưng thŭn 2023 – 2025; Pô bi ktưn kdlưn hĭn hlăm nah gŭ lu thŭn mtam. Ñu mâo leh êpul bruă êdam êra gưl dlông pah mni thŭn 2022, mâo mă anăn knăl “kriê kngan mbruă” Hlăm klei bi lông riêk ktăk ksu thŭn 2024… Boh nik, thŭn anei, Kpuih HMin myun dưi jing pô bi ala nao hlăm klei bi kƀĭn prŏng phung êdam êra kdlưn hĭn hlue ngă asăp Awa hlăm kluôm ala tal 8. Kpuih HMin lač:
“Mơ̆ng leh mŭt mă bruă, mâo mŭt hlăm êpul êdam êra CS Hồ Chí Minh lehanăn ngă bruă khua kiă kriê êdam êra mơ̆ng đang ksu. Kâo bi klin jih jang phung êdam êra nao bi hgŭm ngă lu bruă tŭ dưn, lehanăn thâo mđĭ ai ayŏng adei bi hur har mă bruă. Ktưn mjuăt hriăm hlue gưt knhuah mngač mơ̆ng Awa Hồ, kâo jih ai tiê ngă djŏ hŏng klei bhiăn mơ̆ng knơ̆ng bruă hlăm klei riêk ktăk ksu, nao hlăm klei bi lông kngan mbruă thâo riêk ktăk ksu mâo mă leh klei pah mni jăk, lehanăn hră bi mni, kâo mơak snăk kơ klei anăn. Jing sa čô đoàn viên hlăm bruă êdam êra kâo gĭt mnă bruă bi jăk hĭn, mbĭt hŏng jih jang êpul êdam êra mâo klei thâo bi mguôp, amâo mâo mdei bi ktưn čiăng ba wĭt klei tŭ dưn hĭn”.
Trần Quang Huấn – Knuă druh êpul duh mkra pla mjing hlăm knơ̆ng bruă ksu Hòa Bình, dôk hlăm knơ̆ng bruă ksu Chư Prông brei thâo, Kpuih Hmin amâo mâo djŏ knŏng jing mnuih mbruă hlăm bruă ksu, ƀiădah lŏ jih ai tiê hŏng bruă êdam êra. Jing khua bruă êdam êra, ñu jih ai tiê hur har đru phung êdam êra mđĭ klei thâo hlăm bruă, mơ̆ng anăn mơh ayŏng amai adei mđĭ mơh ênoh mâo ba wĭt hlăm grăp mlan. Mbĭt hŏng bruă phăn jao hlăm bruă ksu mơ̆ng knơ̆ng bruă. Kpuih Hmin lŏ jing mnuih kreh kruiñ duh mĭn bruă kơ gŏ sang pô. Ñu mkuôm prăk lŏ blei lăn, lehanăn mâo pla leh giăm 1 ha kphê. Trần Quang Huấn lač:
“ Kpuih Hmin jing khua bruă êdam êra mâo klei hur har êdi. Jing mnuih djuê ƀiă, klei hdĭp dôk hlăm klei dleh dlan, ƀiădah mâo knhuah kreh kruiñ, thâo gĭr, ñu tui hriăm êmuh, mđĭ klei thâo hlăm bruă. Êjai mă bruă knuă ñu jing mnuih ba akŏ nanao, lehanăn mâo ba wĭt leh lu klei tŭ dưn hlăm đang bruă, knơ̆ng bruă, wăt hlăm êpul bruă êdam êra”.

Hŏng klei thâo gĭr amâo mâo mdei, Kpuih HMin jing leh gru bi hmô jăk hlăm krĭng mnuih djuê ƀiă ti Ia Vêr, kdriêk Chư Prông (čar Gialai). Čang hmăng mơ̆ng klei yăl dliê kơ Kpuih Hmin anei, srăng lŏ mâo lu phung êdam êra mnuih djuê ƀiă, kpưn đĭ hlăm klei hriăm mjuăt, hlăm klei mă bruă knuă lehanăn đru mguôp hlăm bruă mđĭ kyar ƀuôn sang lăn čar pô.
Đỗ Đức Thanh – K’iăng khua bruă êdam êra čar Gia Lai brei thâo, hlăm dŭm thŭn êgao hlăm čar mâo leh êbeh 400 klei bi hmô jăk hlăm djăp mta bruă ngă. Hlăm anăn, mâo leh lu phung êdam êra krĭng ƀuôn sang mnuih djuê ƀiă năng mâo klei bi mni lehanăn mđĭ ai êdi:
Hmei mâo ruah leh phung êdam êra jing kdlưn hĭn, mâo klei thâo čiăng duh ƀơ̆ng, kpưn đĭ tlaih mơ̆ng klei dleh dlan, pioh đru kơ mah jiăng mkăn hlăm klei duh ƀơ̆ng. Mbĭt hŏng anăn hmei kiă kriê dŭm gưl êpul bruă êdam êra ngă nanao dŭm bruă bi kriê pioh knhuah gru dhar kreh djuê ana pô. Msĕ si klei bi lông tông čing, mjign anôk hlăp jăk kơ phung êdam êra mnuih djuê ƀiă, lehanăn hlăk ai phung đăo. Mơ̆ng jih jang bruă ngă anăn, hmei ba leh dŭm mta bruă kơ klei tui hriăm lehanăn hlue ngă knhuah mngač Hồ Chí Minh”.
Viết bình luận