Aguah ưm, ai êwa mă bruă hơ̆k mơak leh ti sang ală kĭng, sang ñuăl ti krĭng pla djam Đơn Dương, čar Lâm Đồng. Djam dưi hrui pĕ, mkra mjing, đŭng hruh, mnga dưi mdiăng ƀrư̆ ƀrư̆ truh kơ anôk bi mlin. Khắc Bình, mnuih ƀuôn sang să Dran hơ̆k mơak brei thâo, klei bi mlih ti krĭng pla djam anei truh mbĭt hŏng klei mkŏ mkra krĭng ƀuôn sang mrâo:

 “Mnuih ƀuôn sang mđĭ kyar bruă duh mkra. Kyua mâo klei uêñ mĭn, klei đru mơ̆ng Knŭk kna kyuanăn mâo klei đĭ kyar hĭn. Pla mjing trŏng msăm, djam mtam, amrêč prŏng boh…dŭm mta anei dưi pla mjing hŏng bruă lŏ hma kdrăp mrâo mrang. Ară anei lŏ pla mnga. Klei hdĭp ară anei đĭ kyar hĭn hŏng êlâo leh anăn mâo klei bi mlih sĭt”.

Mkŏ mkra krĭng ƀuôn sang mrâo ti Đơn Dương mâo 4 să xã Đơn Dương, Ka Đô, Quảng Lập và D’ran mơ̆ng čar Lâm Đồng, nao mbĭt hŏng mkra mjing thâo mĭn. Truh knhal jih thŭn 2025, djam leh anăn mnga mâo hlăm brô 95% ênhă pla mjing, ênoh mkra mjing bruă lŏ hma kah knar mâo êbeh 220 êklăk prăk sa ha hlăm sa thŭn. Dŭm să anei djăp ênoh čuăn krĭng ƀuôn sang mrâo mđĭ hnơ̆ng, bi hmô.

Hluê si klei đĭ kyar mbĭt, dŭm ƀuôn mnuih djuê ƀiă tinei ăt mâo klei mlih pral. K’Bril, khua ƀuôn Kambute, să Đơn Dương brei thâo, klei bi mlih anei amâo djŏ knŏng klei mkra mjing ƀiădah lŏ bi êdah hŏng klei thâo pla mjing leh anăn klei hdĭp mnuih ƀuôn sang:

 “Ară anei yua êdeh kai prŏng, duh bi liê kdrăp krih êa thâo mĭn, hdră ngă bruă dưi mđĭ hĭn. Mơ̆ng anăn bi hơĭt klei hdĭp ăt msĕ mơh prăk hrui wĭt, klei hdĭp ară anei đĭ hĭn. Ƀuôn Kambute ară anei sang 2 tal 3 tal, ôtô mâo lu sơnăk. Mơ̆ng anăn boh sĭt hlăm ƀuôn, hlăm să bi mlih prŏng sơnăk, mlih hlăm grăp hruê”.

Hlăm wưng mkŏ dăp anôk bruă Knŭk kna leh anăn ngă Bruă sang čư̆ êa alŭ wăl dua gưl, bruă ksiêm dlăng, bi klă mta kñăm mkŏ mkra krĭng ƀuôn sang mrâo dưi mâo dŭm să krĭng Đơn Dương bi klă jing bruă klam phŭn. Hluê si Trương Quang Kiên, k’iăng khua Bruă sang čư̆ êa să Dran, krĭng ƀuôn sang mrâo dưi bi mguôp hŏng hluê ngă hdră mtrŭn mrô 57 kơ mtrŭt mđĭ klei kreh knhâo mrâo mrang leh anăn mbruă leh anăn bi mlih mrô:

 “Hdră mtrŭn klei kƀĭn prŏng să Dran wưng thŭn 2025 - 2030 bi klă hdră êlan klă sĭt. Hlăm anăn jing mkŏ mjing klei bi hmô čiăng mđĭ kyar, dưn yua kdrăp mrâo mrang hlăm bruă lŏ hma, mkŏ mjing dŭm êpul hgŭm bruă, mkra dŭm mnơ̆ng OCOCP, mơ̆ng anăn iêo jak dŭm knơ̆ng bruă duh bi liê sang măi mkra mjing, mđi hnư hrui wĭt kơ mnuih ƀuôn sang”.

Bi ti să Đơn Dương mrâo - mkŏ mjng mơ̆ng wăl krah Thạch Mỹ, să Dă Ròn leh anăn să Tu Tra hđăp - Bruă sang čư̆ êa alŭ wăl bi klă êlan nao kơ wưng kơ anăp.Trần Hùng Dũng, khua Bruă sang čư̆ êa să Đơng Dương brei thâo:

 “Leh mâo ênoh čuăn kơ mkŏ mkra krĭng ƀuôn sang mrâo wưng thŭn 2026 - 2030 să mâo leh hdră êlan čiăng lŏ dơ̆ng mđĭ hnư hrui wĭt, klei hdĭp, wăl hdĭp mda, rơ̆ng kơ hnơ̆ng jăk, mkra mjing, klei hdĭp…Si srăng ngă čiăng mâo mta kñăm mkŏ mkra krĭng ƀuôn sang mrâo mrang”.

Mơ̆ng krĭng bruă lŏ hma, čar Lâm Đồng brei ƀuh, hdră mkŏ mkra krĭng ƀuôn sang mrâo dôk mŭt hlăm wưng mđĭ hnơ̆ng jăk mđing truh kơ krĭng ƀuôn sang mrâo mrang, thâo mĭn, nao mbĭt hŏng wăl anôk mnia mblei leh anăn boh tŭ yuôm. Dŭm klei mlih anăn amâo djŏ knŏng bi mlih krĭng ƀuôn sang, mđĭ hnơ̆ng klei hdĭp mnuih ƀuôn sang, ƀiădah lŏ đru ngă dŭm mta kñăm mđĭ kyar hơĭt kjăp mâo Đảng bi klă./.