Klei ƀuh tal êlâo tơdah truh kơ plei Pông, ƀuôn hgŭm Chư A Thai, čar Gia Lai jing sa boh sang roong ti krah ƀuôn kdrăm kơah. Jŭm gah găn jing sang krum mơ̆ng mnuih djuê ana Bahnar. Jih jang êlan klông hlăm ƀuôn mâo mkra leh hŏng betong kjăp, wăt êlan nao kơ hma. Đinh Pơr mrâo djă êdeh kai wĭt mơ̆ng hma, brei thâo gŏ sang ñu mâo 8 drei êmô, lehanăn dua ha hma, dưi mâo ba wĭt hơĭt hlăm klei hdĭp:

“Mnuih ƀuôn sang pô kdlưn hĭn leh. Lu sang pla mdiê mâo ba wĭt mdiê kuê lu mơh. Bi gŏ sang kâo hơĭt nanao leh, amâo lŏ msĕ si mphŭn dô ôh, kƀah braih mkuê̆, tăp năng ƀơ̆ng knŏng ktơr, hbei. Ară anei anak čô nao sang hră djăp ênŭm leh, sang hră giăm hŏng ƀuôn mơh. Mâo leh lu phung hđeh hriăm hră mơar thâo, lŏ dơ̆ng nao hriăm truh kơ Gia Lai...”

Hlăm sang krum Đinh Mlanh ti kang êlan ktlah mpă, ti djiêo wăl sang roong ƀuôn. Hlăm gŭ krum sang dưm boh mnơ̆ng mnuă pioh ngă hma, anăp mprăp kơ sa yan hrui êmiêt mrâo. Gŏ sang mâo 3ha lăn pioh pla hbei tao, lehanăn kbâo, rông 16 êmô, 3 drei kbao lehanăn lu mnŭ ada. Kyua kreh kruiñ hlăm bruă knuă, lehanăn thâo mkuôm pioh, mơ̆ng anăn gŏ sang ñu jing leh sa gŏ sang thâo mâo hlăm ƀuôn plei Pông. Đinh Mlanh yăl dliê:

“Krĭng hmei anei, êlâo dih jing krĭng phŭn kơ klei krŭ kdơ̆ng, tuôm nanao hŏng klei phung roh bi rai, krŭng mđuĕ, ƀiădah hmei amâo mâo ư ôh, lŏ dơ̆ng tui tiŏ ngă  cách mạng hlăm krĭng phŭn krŭ kdơ̆ng anei. Leh lăn čar mâo klei êngiê, klei hdiưp mda tinei, amâo mâo mnuih tui hlue Fulro ôh, amâo mâo duah hmư̆ klei arăng mčŭt mčhur, knŏng mđing kơ klei duh ƀơ̆ng, rông mnơ̆ng lehanăn pla mjing. Êlâo dih klei hdĭp mda mnuih ƀuôn sang lĕ hlăm klei dleh dlan. Mâo klei knŭk kna dru brei čan prăk, mbha brei êmô rông snăn mnuih ƀuôn sang mđĭ kyar klei hdĭp, lehanăn knŭk kna đru mkra brei êlan betong hlăm ƀuôn, wăt hlăm êlan nao kơ hma, đru kơ mnuih ƀuôn sang mă bruă knuă mâo klei tŭ dưn hĭn, klei hdĭp bi mlih hĭn”.

Kyua mâo klei knŭk kna mđing, mnuih ƀuôn sang mâo đru ana mjeh mnơ̆ng pla, mâo čan prăk knŭk kna pioh duh mkra pla mjing, rông mnơ̆ng, snăn klei hdĭp mda mnuih ƀuôn sang dơ̆ng bi mlih. Êpul hgŭm bruă mniê ƀuôn hgŭm Chư A Thai jih ai tiê hâo hưn kơ phung amai adei ngă klei thâo mkiêt mkriêm, rông ŭn lăn. Knŏng hlăm sa thŭn, mâo gŏ sang thâo mkriêm giăm 25 triệu đồng, gŏ sang ƀiă êdi truh 8 êklăk prăk. Amai Byơnh – sa čô mnuih hlăm ƀuôn plei Pông brei thâo, kyua kreh kriăng hlăm klei mă bruă lehanăn thâo mkiêt mkriêm hlăm klei bi liê, snăn klei hdĭp mnuih ƀuôn sang mâo leh klei bi mlih sĭt. Sitôhmô gŏ sang amai Siu H’Oan mâo 1,5 ha đang hbei ƀlang, 8 sao lŏ, rông dŭm pluh drei êmô, jing leh gŏ sang thâo mâo hlăm ƀuôn.

“Hmei bi mguôp hlăm êpul bruă mniê, mâo nanao klei thâo bi đru hlăm bruă duh ƀơ̆ng, ngă klei bi ring, bi đru hdơ̆ng găp mă bruă… Kâo ƀuh phung hđeh ară anei pral kdal, thâo duh ƀơ̆ng, pha hbei, pla kbâo lehanăn pla lu mta mnơ̆ng mkăn. Ya bruă mă mâo klei tŭ dưn sơăi hĭn hŏng êlâo dih. Mơak hĭn jing hđeh gưl mrâo ară anei tui gưt nanao klei bhiăn, klei ktrâo atăt mơ̆ng phung knuă druh.”

Đinh Tuy – Khua ƀuôn plei Pông brei thâo, hlăm ƀuôn mâo giăm 150 gŏ sang, hŏng giăm 700 čô mnuih, lu jing mnuih djuê ana Bahnar. Klei hdĭp mơ̆ng mnuih ƀuôn sang hlăm ƀuôn mâo leh klei bi mlih mơ̆ng leh čar Gia Lai hlue ngă hdră êlan mkŏ mkra krĭng ƀuôn sang mrâo hlăm krĭng mnuih djuê ƀiă mơ̆ng thŭn 2017. Hlăm anăn,  plei Pông mâo să Chư A Thai, kdriêk Phú Thiện (hđăp), čar Gia Lai ruah ngă klei bi hmô, hŏng mta kñăm čĭng mjing krĭng ƀuôn sang mrâo pioh bi hmô kơ ƀuôn mkăn. Dŭm alŭ wăl mnuih ƀuôn sang hdĭp hlăm ƀuôn mâo čuăl mkă khuăt jăk, pui kmlă, êlan klông, êa jua yua mâo duh bi liê kjăp. Mnuih ƀuôn sang bi đru pla ana kyâo mtah jŭm wăl sang roong lehanăn anôk mnuih ƀuôn sang bi mguôp mbĭt, mjing leh klei mtah mda kơ ƀuôn sang plei Pông hrue anei. Khua ƀuôn Đinh Tuy  brei thâo:

“Ƀuôn hmei mâo leh knŭk kna duh bi liê mkra êlan klei pui kmlă, mkra êlan klông, rŭ mdơ̆ng sang hră mơar, klei hdĭp mda mnuih ƀuôn sang ară anei amâo lŏ knap msĕ hŏng êlâo ôh. Anak aneh mâo hriăm hră mơar djăp ênŭm. Lač jăk kơ Đảng, Knŭk kna mâo klei mđing đru mkra brei jih jang bruă kơ ƀuôn sang Plei Pông hmei, đru kơ mnuih ƀuôn sang ƀrư̆ hrue ƀrư̆ mâo klei bi mlih. Anăp anei mnuih ƀuôn sang lŏ dơ̆ng ktưn hlăm klei mă bruă knuă, mâo klei thâo bi mguôp tui hlue   Đảng, Knŭk kna mkŏ mjing klei hdĭp dhar kreh, ƀuôn sang thâo bi mguôp, klei hdĭp jăk mơak.”

Plei Pông (ƀuôn hgŭm Chư A Thai, čar Gia Lai) hrue anei, hơô leh hlăm pô klei bi mlih mrâo, jăk siam hĭn mtah mda hĭn, êđăp ênang hĭn. Hŏng êlan betong doh siam, dŭm boh sang krum dăp hlăm krah ana kyâo mtah, klei mtah mda êđăp mơ̆ng kdrăn lŏ, jing leh klei bi knăl kơ klei mlih mrâo mơ̆ng krĭng phŭn krŭ kdơ̆ng êlâo dih. Mâo klei Đảng, knŭk kna mđing uêñ, mbĭt hŏng klei mnuih ƀuôn sang thâo bi mguôp, lehanăn kreh kriăng duh ƀơ̆ng, snăn mnuih ƀuôn sang ƀuôn plei Pông hlăk dôk kpưn đĭ, ciăng bi mlih jing gru mngač hlăm bruă mkŏ mkra krĭng ƀuôn sang mrâo./.