Ti djiêo dŭm bĭt êlan ti ƀuôn hgŭm Đơn Dương, čar Lâm Đồng, mtah mda hŏng dŭm kdrăn pla djam, anôk pla mnga dôk hrăm yan hrui êmiêt leh anăn klei blŭ tlao hơ̆k mơak mơ̆ng ƀĭng ngă lŏ hma. Hŏng êbeh 8.400ha ana pla mjing dŭm mta, hlăm anăn mâo êbeh 3.000ha djam, mnga mbĭt hŏng giăm 19.000 drei êmô mă êa ksâo…ba wĭt leh klei hdĭp trei mđao kơ mnuih ƀuôn sang tinei. Nguyễn Tiến Khánh, ti alŭ 1, ƀuôn hgŭm Đơn Dương brei thâo, ƀuôn hgŭm dưi mkŏ mjing dŭm hdră mkra mjing – ba čhĭ krip hŏng dŭm mta mnơ̆ng dhơ̆ng phŭn msĕ si êa ksâo êmô, djam mtam mtrŭt mđĭ leh bruă lŏ hma hơĭt kjăp leh anăn mđĭ hnư prăk hrui wĭt kơ mnuih ƀuôn sang:

 “Ƀuôn hgŭm Đơn Dương lŏ čuê mơ̆ng kdriêk Đơn Dương êlâo dih, boh nik jing kdriêk Đơn Dương jing kdriêk tal êlâo mơ̆ng dŭm čar Lăn Dap Kngư djăp hnơ̆ng čuăn krĭng ƀuôn sang mrâo, krĭng ƀuôn sang đĭ kyar hĭn hŏng êlâo doh. Klei hdĭp mnuih ƀuôn sang dưi mđĭ hĭn, sang lu tal, êdeh pui msĕ hŏng alŭ wăl hmei amâo lŏ mâo gŏ sang ƀun ôh ƀiădah mâo êbeh 7% jing mdrŏng sah”.

Mơ̆ng hruê 1/7 êgao, čar Lâm Đồng mŭt hlăm wưng đĭ kyar mrâo hŏng klei găl êdah êdi leh anăn wăl pŏk mlar mơ̆ng dliê truh kơ êa ksĭ. Čar mâo ênhă êbeh 24.000km2 prŏng hĭn hlăm lăn čar leh anăn hnơ̆ng bruă duh mkra dôk tal 8. Bruă bi mŭt mbĭt 3 čar ăt mkŏ mjing klei găl kơ Lâm Đồng lu bruă duh mkra ba anăp hlăm lăn čar, msĕ si bruă mkra mjing bosit – alumin – ksuêh leh anăn hnơ̆ng bosit đăo tĭng êbeh 5,4 êklai tôn, bruă hiu čhưn ênguê lu jơr hŏng anăn knăl bruă hiu čhưn ênguê Đà Lạt, wăl mnơ̆ng gŭ lăn Dak Nông leh anăn jar ƀăng kơưp cư̆ pui prŏng hĭn Ngŏ Dhŭng Asi, ênao Ta Đùng dưi lač msĕ hŏng kplang Hạ Long ti Lăn Dap Kngư, bruă hiu čhưn ênguê êa ksĭ hŏng Phan Thiết - Mũi Né, anôk bruă knơ̆ng Phú Quý, pla mjing djam mtam, boh kroh, mnga, hluăt mrai, kan êa êăt…ba anăp mơ̆ng lăn čar. Nguyễn Hoài Bão, khua bruă Đảng čar hđăp, khua êpul bi ala Bruă Kƀĭn Ala gưl 10 čar Lâm Đồng đăo knang:

 “Ară anei Lâm Đồng mâo knông lăn, mâo êa ksĭ, ênhă ară anei prŏng hĭn hlăm lăn čar, kyuanăn mâo klei găl prŏng. Lâm Đồng mâo klei thâo săng mrâo, hdră tă mrâo leh anăn yuôm bhăn hĭn jing sa ai. Mnuih ƀuôn sang đăo knang kơ Đảng hŏng klei thâo mĭn Việt Nam čiăng ngă jăk bruă klam leh anăn hmăng hmưi Việt Nam dưi nao mbĭt hŏng dŭm ala čar mdrŏng ktang msĕ hŏng Awa Hồ lač leh”.

Lâm Đồng ăt dôk bi hluh dŭm klei kpăk hŏng lu hdră kñăm kơ êlan klông, mnơ̆ng gŭ lăn, pui kmlă, anôk dôk…hŏng ênoh prăk dŭm pluh êklai prăk čiăng mtrŭt mđĭ klei duh kơ bruă knŭk kna mkŏ mjing boh kdrŭt kơ bruă duh mkra đĭ kyar.

Y Thanh Hà Niê Kđăm, Khua bruă Đảng čar Lâm Đồng lač klă:

 “Mtrŭt mđĭ klei đĭ kyar bruă duh mkra rơ̆ng kơ mta kñăm đĭ kyar thŭn 2025 mơ̆ng čar Lâm Đồng mâo êbeh 8&, Mñă kơ boh sĭt ară anei srăng rơ̆ng kơ hnơ̆ng jăk klei ngă bruă mơ̆ng gưl bruă pô, mbĭt anăn đru kơ gưl nah gŭ. Bi hơĭt bruă mkŏ mjing leh anăn rơ̆ng kơ klei ngă bruă hŏng klei bi hmô mrâo, mtrŭt mđĭ mkŏ mjing klei găl čiăng ba yua ai ktang mơ̆ng čar ƀiădah ăt rơ̆ng dŭm ai dưi mđĭ kyar kơ wưng êdei”.

Bruă Đảng, bruă sang čư̆ êa leh anăn mnuih ƀuôn sang čar Lâm Đồng dôk bi lar ai tiê bi mguôp, mbruă, gĭr mkŏ mjing ƀuôn sang mdrŏng ktang, mrâo mrang, năng hŏng klei đăo knang leh anăn klei hmăng hmưi mơ̆ng Đảng, awa Hồ./.