Truh kơ anôk ngă hră mơar ti ƀuôn hgŭm Nhân Cơ, čar Lâm Đồng dŭm hrue anei, mnuih ƀuôn sang bi êdah klei ư ai hŏng anôk mă bruă jăk, hdră mă bruă mâo klei kreh knhâo. Klei ba yua mrô dăp iêo mnuih ngă hră mơar ƀrư̆ ƀrư̆ êlâo êdei, hlăm klei mtăp mđơr, amâo lŏ mâo klei b ksĭng mmiă ôh. Nao ngă hră hưn hrue kkiêng kơ anak, Trần Đình Khương, ƀuôn hgŭm Nhân Cơ lač:

“hrue anei kâo hriê ngă hră hưn hruê kkiêng kơ anak, kâo ƀuh anôk mă bruă doh siam, hŏng kdrăp mă bruă ênuk mrâo, mghaih msir bruă knuă hŏng klei pral mơh.”

Msĕ snăn mơh ti ƀuôn hgŭm Quảng Tín, kyua mâo duh leh ênŭm ênap kdrăp mă bruă, grăp mlan anôk ngă hră mơar mâo tŭ mă truh 600 mta hră mơar, hồ sơ, 100% mâo ngă hŏng online, mâo mghaih msir djŏ wưng kčah truh êbeh 99%. Tui si Lưu Văn Gia, Khua anôk bruă ngă hră mơar ƀuôn hgŭm  Quảng Tín, mơ̆ng mlan 2 thŭn anei, alŭ wăl čŏng bi liê leh prăk kăk mđĭ mlih jih jang anôk mă bruă, kdrăp mă bruă, mơ̆ng anăn dưi mă bruă jăk ngă hră mơar kơ mnuih ƀuôn sang:

“Ƀuôn hgŭm mâo duh bi liê mkra mđĭ, pŏk phai anôk mă bruă, blei mprăp kdrăp mă bruă, klei mă mrô dăp mnuih ngă hră mơar, computer, masin kđăp mkra hră mơar, masin scan lehanăn mđĭ hnơ̆ng kjăp Internet”.

Bi ti ƀuôn hgŭm Kiến Đức, klei tŭ mă, ngă hră mơar hlăm hla pŏk mâo klei găl hlăm bruă mrô. Tui si Phạm Xuân Anh, K’iăng khua anôk bruă ngă hră mơar ƀuôn hgŭm Kiến Đức, jih jang kdraqwp computer, camera kăp ksiêm, kdrăp ksiêm duah hră mơar mâo bi êran sa hnơ̆ng, đru ba wĭt leh klei tŭ dưn jăk kơ knuă druh mă bruă.

“Jih jang kdrăp ksiêm duah hră mơar mâo lŏ mkra mđĭ snăn jih jang bruă knuă mă jing pral lehanăn ênưih, mghaih msir hră mơar hŏng klei pral”.

Kluôm čar Lâm Đồng ară anei mâo ênŭm 100% anôk bruă alŭ wăl mkŏ leh êlan hla pŏk, bi êdah truh 2.310 mta klei dưi ngă hră mơar. Hnơ̆ng ênoh mghaih msir hră mơar hlăm gưl ƀuôn hgŭm djŏ wưng kčah truh 98,38%, jing leh klei jăk hlăm bruă ngă hră mơar.

Bruă duh bi liê jih jang kdrăp mă bruă, anôk mă bruă, nao hlăm klei bi mlih mrô hlăk đru leh kơ gưl ƀuôn hgŭm hlăm čar Lâm Đồng klă sĭt jing leh anôk jăk jĕ giăm hŏng mnuih ƀuôn sang, djŏ bruă knuă, ngă hră mơar kơ mnuih ƀuôn sang knư̆ hrue knư̆ pral hĭn, klă mngač, lehanăn tŭ jing./.