Ƀuôn hgŭm Tà Năng, čar Lâm Đồng mâo ênhă prŏng truh êbeh 25.800 ha, hŏng ênoh mnuih giăm 14.000 čô mnuih, hlăm anăn mnuih djuê ƀiă giăm 78%. Leh giăm 1 thŭn mă bruă, truh kơ ară anei wăt anôk bruă Đảng, knơ̆ng bruă sang čư̆ êa, anôk bruă mặt trận ƀuôn hgŭm mrâo mâo jih jang 41 čô mnuih mă bruă lehanăn adôk kƀah truh 21 čô mnuih mă bruă. Nguyễn Tiến Điền, Khua bruă Đảng ƀuôn hgŭm Tà Năng, brei thâo, êjai bruă knuă mă jing lu, ƀiădah adŭ bruă  Đảng ƀuôn hgŭm knŏng mâo mă 2 čô mnuih mă bruă, Êpul bruă mkŏ mjing   Đảng mâo 3 čô mnuih, anôk bruă ksiêm dlăng mâo 2 čô mnuih, anôk bruă djăp êpul êya amâo mâo ôh pô truăn kơ bruă, lehanăn anôk bruă sang čư̆ êa kƀah truh  9 čô mnuih mă bruă. Leh msĕ snăn, hnơ̆ng thâo mă bruă hlăm phung knuă druh amâo mâo bi knar ôh:

 “Knŏng mâo 4 čô dôk hlăm êpul khua kiă kriê, k’iăng khua kiă kriê bruă Đảng, Khua lehanăn k’iăng khua kiă kriê jing phung dưi tiŏ hriê mơ̆ng čar, mơ̆ng gưl kdriêk, dŭm adôk jing mnuih mơ̆ng dua boh să leh bi mŭt mbĭt, snăn kơ hnơ̆ng hriăm lehanăn klei thâo hlăm bruă adôk lu klei kƀah. Kyua kƀah mnuih mă bruă, snăn mâo đa đa knuă druh hlŏng klam lu mta bruă. Ară anei sa čô pô truăn kơ bruă lŏ klam mơ̆ng  4- 5 anôk tui si klei ktrâo atăt mơ̆ng dlông.”

Mdê hŏng dŭm klei kƀah mnuih mă bruă hlăm ƀuôn hgŭm dleh dlan Tà Năng, klei kơ knuă druh jing sa klei lông dlăng wăt hŏng dŭm boh ƀuôn hgŭm mâo klei găl msĕ si hlăm čar Lâm Đồng. Hlăm anăn mâo ƀuôn hgŭm Xuân Trường- Đà Lạt, klei kơ knuă druh mă bruă ăt jing sa mta klei dôk bi mĭn prŏng snăk. Ngô Thị Mỹ Lợi, Khua bruă Đảng ƀuôn hgŭm Xuân Trường- Đà Lạt, brei thâo, bruă jing ktrŏ hĭn dah mkă hŏgn să hđăp, klei ktrŏ kyua bruă knuă jing lu, ngă leh kơ lu knuă druh akâo mdei bruă:

“Êpul knuă druh mă bruă hlăm ƀuôn hgŭm Xuân Trường- Đà Lạt ară anei jing dleh dlan êdi, klei akâo mdei bruă jing lu, klei kbiă mă bruă đĭ nanao. Anôk bruă Đảng mâo leh dua čô mnuih akâo mdei bruă. Bi hơ̆ng knơ̆ng bruă sang čư̆ êa mâo leh 3 čô knuă druh jing khua kiă kriê ăt akâo mdei bruă, amâo guôn dưn klei đru ôh. Truh ti wưng anei hmei lŏ mâo truh kơ 4 čô knuă druh akâo mdei bruă.”

Leh mâo klei bi mŭt mbĭt 3 boh čar Dak Nông, Bình Thuận lehanăn Lâm Đồng, čar Lâm Đồng mrâo mâo truh 124 boh ƀuôn hgŭm, alŭ wăl knơ̆ng. Klei dăp wĭt čiăng bi khuăt êpul khua kiă kriê, čar Lâm Đồng mâo leh truh 2.529 čô mnuih mdei bruă hlue hŏng hdră mtrŭn mrô 178; 145 čô mnuih mdei hlue hŏng hdră mtrŭn mrô 07 lehanăn lŏ hlue ngă klei bi hrŏ mnuih mă bruă hŏng 1.450 čô mnuih amâo mâo djŏ jing phung truăn hlăm bruă ôh. Tui si boh klei mrâo hĭn mơ̆ng knơ̆ng bruă kiă kriê bruă knuă mă čar Lâm Đồng, leh giăm sa thŭn ngă klei bi mŭt mbĭt, mkă hŏng ênoh mnuih dưi jao mă bruă  ară anei hlăm ƀuôn hgŭm kƀah truh 823 čô mnuih hlăm gưl nah gŭ, lehanăn kƀah truh 990 čô mnuih hlăm dŭm dhar bruă. Nguyễn Ngọc Phúc, K'iăng khua knơ̆ng bruă sang čư̆ êa čar Lâm Đồng, brei thâo, hlăk dôk mâo klei ktrŏ prŏng hŏng phung knuă druh ti gưl ƀuôn hgŭm, lehanăn kyua mơ̆ng klei anei mơh ngă kơ bruă dăp mnuih mă bruă dôk tuôm hŏng klei dleh dlan:

 “Mâo lu snăk bruă mơ̆ng gưl kdriêk, lehanăn mâo lu mta bruă mơ̆ng gưl čar ksŭn kơ gưl ƀuôn hgŭm. Klei ktrŏ tal dua jing, hnơ̆ng thâo mă bruă mơ̆ng ayŏng adei jing ka hmao ôh hŏng hdră êlan mă bruă mrâo mrang, lehanăn bruă knuă mơ̆ng kdriêk lehanăn čar êlâo anăn ksŭn ti mra gưl ƀuôn hgŭm sơăi.. klei ktrŏ tal 3 jing, mă bruă êjai, lehanăn brei mâo nanao klei hâo mdah kơ bruă knuă pô mă êjai, bi mghaih msir bruă knuă mă bi djŏ hŏng mmông kčah, hlăm klei mă bruă sa ƀăng bhă. Tơdah amâo mâo dưi ngă ôh msĕ snăn, lehanăn klei dăp mnuih amâo mâo lŏ djŏ ôh ti gưl ƀuôn hgŭm snăn anei yơh jing sa klei dôk dleh kpăk prŏng êdi, brei drei thâo ƀuh bi klă klei anei.”

Ti anôk bi kƀĭn ksiêm wĭt sa thŭn hlue ngă hdră êlan bruă sang čư̆ êa dua gưl, snăn bruă Đảng čar Lâm Đồng bi êdah leh klă: Hnơ̆ng bruă knuă mă hlăm gưl ƀuôn hgŭm jing ktrŏ, ƀiădah ênoh knuă druh mă bruă dôk kƀah, ngă truh kơ klei knuă druh bi klam lu mta bruă, jing klei ktrŏ prŏng hlăm klei mă bruă, klei dăp mnuih mă bruă, lehanăn klei tĭng tla prăk ƀơk ka djŏ guôp ôh, klei anăn mơh hmăi djŏ amâo mâo jăk kơ ai tiê klei mă bruă hlăm phung knuă druh hlăm nah gŭ. Đỗ Thanh Bình Khua phŭn bruă kiă kriê bruă knuă mă lač, mơ̆ng boh sĭt leh sa thŭn hlue ngă hdră êlan bruă sang čư̆ êa dua gưl, lehanăn dưi ƀuh klă hlăm thŭn 2026 jing thŭn “Thŭn mđĭ hĭn hnơ̆ng thâo lehanăn klei kjăp knuă druh bruă nah gŭ” Lâm Đồng srăng lŏ ksiêm wĭt, mkă tĭng bi kjăp bruă dăp knuă druh hlăm gưl ƀuôn hgŭm, mđĭ hnơ̆ng lŏ mjuăt bi hriăm hdră mă bruă hlăm klei kjăp hĭn pioh dưi ngă bruă:

“Hlăm grăp boh ƀuôn hgŭm bi ksiêk hnơ̆ng klei jing mnuih mă bruă, kñăm pioh lŏ mjuăt bi hriăm. Mbĭt anăn bi kjăp ênoh mnuih mă bruă, iêo bi mŭt mnuih mă bruă jing phung thâo hlăm bruă knuă hlăm alŭ wăl ƀuôn hgŭm. Mđing kơ bruă dăp, lehanăn mghaih msir kơ ênoh ƀơk prăk mlanbi năng hŏng mnuih mă bruă jing knuă druh truăn kơ bruă. Dŭm gưl, dhar bruă hlăm čar Lâm Đồng čŏng mghaih msir hlue ngă bi jăk, mđing ruh mgaih bi jih klei dleh kpăk, pioh mđĭ bruă hlue ngă hdră êlab bruă sang čư̆ êa dua gưl klă sĭt dưi mă bruă mâo klei tŭ dưn.”

Mghaih msir “anôk dleh kpăk” kơ knuă druh leh giăm sa thŭn hlue ngă bruă sang čư̆ êa dua gưl, mă klei hriăm hlăm klei mă bruă, čar Lâm Đồng hlăk lŏ dôk mkŏ dăp, bi kjăp êpul mă bruă, dôk hlăm jih jang bruă kđi čar djŏ hŏng klei gưl dlông gĭt gai. Mbĭt hŏng anăn Lâm Đồng ăt mđing kơ klei mđĭ hnơ̆ng thâo phung knuă druh mă bruă, boh nik hlăm alŭ wăl ƀuôn hgŭm, lŏ dơ̆ng ksiêm dlăng, dăp mbha gưl phung knuă druh mjuăt bi hriăm klei thâo hlăm bruă, boh nik klei thâo hlăm kdrăp mrô, lehanăn klei thâo hlăm bruă čuăn kơ bruă ngă hră mơar, pioh kiă kriê bruă sang čư̆ êa dua gưl, klă sĭt mâo klei tŭ dưn klă mngač, djŏ hŏng ai tiê mnuih ƀuôn sang lehanăn phung duh mkra, anăn yơh giê pioh mkă./.