Mơ̆ng krah kdriêk Kbang (čar Gia Lai), gŏ sang Nguyễn Thị Thu Huyền, tue hrie mơ̆ng Hà Nội, găn leh sa wang êlan giăm 70km hlue êlan dơ̆ng čar mrô 669 čiăng nao kơ drai Lơ Lung, amâodah lŏ pia jing drai 3 tal ti ƀuôn Kon Bông, să Đăk Krong. Ti anei, jih gŏ sang ñu nao mŭt hlăm wăl anôk drai êđăp, dlăng êa đoh êngeh bhang mơ̆ng krah lăn mnga êa siam. Phung hđeh dôk hlăp hlăm dŭm anôk êa êđal, bi mnuih prŏng dôk wah, lehanăn bi mă rup ti gŭ êyui ana kyâo mtah siam, dưn êwa êđăp mơ̆ng kmrơ̆ng. Pô hiu atăt klei hiu čhưn anei jing mnuih mơ̆ng ƀuôn sang kơ anei, ba phung tue nao čuă dlăng klei jăk siam mơ̆ng jŭm alŭ wăl drai anăn. Leh dua mmông hiu hlăp, jih êpul wĭt kơ ƀuôn čiăng ƀơ̆ng huă jih jang mnơ̆ng ƀơ̆ng jing dŏ mơ̆ng dliê, jing djam dliê, kan êa hnoh, lehanăn êa hnue. Jih jang mnơ̆ng ƀơ̆ng mkăn mâo wăt dŏ mnuih ƀuôn sang klơ anei pla mjing thâo dah rông. Amai Huyền lač:

“Leh găn sa wang êlan kbưi dưi truh kơnei jing klei yuôm bhăn êdi. Đuĕ hiu ƀuh jing suăi mơh, ƀiădah mâo ƀuh lăn mnga êa siam anei jing năng êdi. Mâo drai siam, adiê êđăp, ba hriê klei jâwk jĭn hŏng jih jang mnuih. Jăk êdi yơh sa klei đuĕ hiu msĕ snei”.

 Bi hŏng phung tue čiăng lŏ dôk dlăng dhar kreh mnuih djuê ana Bahnar, snăn mnuih ƀuôn sang srăng kơ̆ng digơ̆ dôk đăm. Čiăng truh kơ adiê mlam mmăt, dơ̆ng hmư̆ yơh êwa čing, mâo klei bi kdŏ čhuang hŏng mnuih ƀuôn sang kơ anei hŏng drăm pui h’uh mđao. Knŏng mơ̆ng mlan 1/2024 truh kơ ară anei, ƀuôn Kon Bông mâo drông leh 40 êpul tue truh, grăp êpul mâo mơ̆ng 20 - 30 čô mnuih. Diñu hiu čuă kmrơ̆ng hrông, nao hiu hlăm hnoh êa boh tâo, nao čuă drai 3 tal. Mnuih ƀuôn sang Ba Na tinei mrâo mưng drông leh tue hiu čhưn ênguê. Kyua hŏng knuih klei jing mnuih ƀuôn sang tinei yơh, bi êdah djŏ hŏng ai tiê digơ̆ hlăm klei drông tue, klei anăn knư̆ hĭn mơh mâo klei khăp prŏng hĭn mơ̆ng phung tue. Đinh Văn Nhú, Khua bruă Đảng, khua ƀuôn Kon Bông lač: Mnuih ƀuôn sang hmei drông tue hŏng jih ai tiê hmei mâo:

“Jih jang mnơ̆ng mnuih ƀuôn sang mâo, hlăm ƀuôn msĕ si ŭn mnŭ, lehanăn teinan mmih, mâo phung tuê khăp êdi. Ară anei mâo leh lu gŏ sang hlăm ƀuôn lŏ dơ̆ng mâo leh dŭm mta mnơ̆ng pioh čhĭ kơ phjung tue. Êpul bruă Đảng ƀuôn lŏ mta mtăn kơ mnuih ƀuôn sang brei mâo klei gĭr hĭn hlăm bruă duah ƀơ̆ng pla mjing lu mta ana boh kroh, rông lu ŭn jŭ, mnŭ ada, lehanăn riă kpiê điŏ. Hmei lŏ mjuăt bi hriăm êpul tông čing,lehanăn êpul kdŏ čhuang pioh kơ tue hiu čhưn ênguê dlăng.”

 Kmrơ̆ng Kon Hà Nừng dôk tĭng kơ nah ngŏ dưr čar Gia Lai, bi knông hŏng čar Kon Tum, Quảng Ngãi lehanăn Bình Định, hŏng boh prŏng jih jang êbeh 413.000 ha. Jing krĭng msăt kmrơ̆ng dliê Kon Ka Kinh lehanăn dliê Kon Chư Răng, hlăm anei lu jing kmrơ̆ng khua, dliê hđăp. Nguyễn Hồng Quân, K’iăng khua klam bruă kiă kriê kmrơ̆ng  Kon Chư Răng lač, dôk lu klei găl kơ bruă hiu čhưn dhing hlăm lăn mnga êa mơak, wăt hlei pô mâo klei čiăng lông hiu hlăm dŭm anôk huĭ hyưt ăt mâo mơh, ƀiădah ka dưi dưn yua jih ôh.

“Dliê knŭk kna mkuôm Kon Chư Răng mâo êbeh 20 boh drai, jing găl kơ bruă hiu čhưn ênguê. Klei duh bi liê kơ bruă hiu čhưn ênguê jing klei găl kơ bruaư̆ hưn mdah kơ lăn dap kngư Kon Hà Nừng truh hŏng dŭm êpul bruă hlăm ala čar lehanăn mơ̆ng ala tač êngao.”

Nguyễn Văn Hoan, K’iăng khua knơ̆ng bruă lŏ hma čar Gia Lai brei thâo čar hlăk dôk ngă lu mta bruă kơ klei hiu čhưn ênguê hlăm yang ƀuôn, lehanăn klei hiu čhưn ênguê lăm nga êa mơak, kñăm mjing hdră duah ƀơ̆ng kơ mnuih ƀuôn sang djuê ƀiă krĭng wăl êngao kmrơ̆ng. Čar ăt dôk mâo hdră mđĭ hĭn jih boh tŭ dưn mơ̆ng lăn dap kngư Kon Hà Nừng hŏng dŭm bruă ngă klă mngač kñăm drru kơ mnuih ƀuôn sang hlăm alŭ wăl mâo prăk yua.

“Čar Gia Lai mâo mkŏ mjing leh wăl hdĭp mda mơ̆ng lăn dap kngư Kon Hà Nừng, mơ̆ng k’iăng khua knơ̆ng bruă sang čư̆ êa čar jing khua êpul. Mơ̆ng anăn, čar dôk ngă lu mta bruă hŏng klei klă mngač kñăm mđĭ klei tŭ dưn anei, msĕ si mkŏ mjing logo rup bi knăl lehanăn hla pŏk web kơ bruă anei. Jih jang mnơ̆ng mơ̆ng bruă lŏ hma mâo pla mjing hlăm anei, ăt bi djŏ hŏng anôk ala, mâo klei ktrâo atăt, djă pioh klei tŭ dưn ñu”.

Dŭm klei dôk gĭr mđĭ klei tŭ dưn dhar kreh, lehanăn klei jăk jing mơ̆ng dliê kmrơ̆ng hrông lăn dap kngư Kon Hà Nừng hlăm čar Gia Lai hlăk dôk pŏk leh hdră mă bruă mrâo kơ klei mđĭ kyar kjăp. Mkŏ mjing djŏ hŏng klei jing leh mơ̆ng phŭn dô hŏng anak mnuih krĭng čư̆ čhiăng, lă lia dliê kmrơ̆ng prŏng dôk hrông mơ̆ng đưm... Sĭr nik srăng jing anôk jăk kơ lu phung tuê hlăm ala čar pô lehanăn mơ̆ng ala tač êngao truh.  Kon Hà Nừng hlăk hlê mdih kgŭ./.