Gŏ sang aduôn H’Sắk ti ƀuôn Mơ Nú, să Chư Á, ƀuôn prŏng Pleiku mâo 7 čô mnuih, hdĭp hlăm sa boh sang klia simăng điêt mơ̆ng sui leh. Ung ñu djiê kyua mâo klei ruă kjham, asei mlei ñu pô lŏ rông ba adei ñu pô êwiên mơ̆ng điêt, mơ̆ng anăn yơh klei hdĭp lĕ hlăm klei dleh dlan nanao, klei hdĭp mda knŏng knang hŏng bruă hiu ngă kli. Čiăng đru kơ gŏ sang pô dưi hdĭp mda, H’Sắk bŏ hŏng klei gĭt ktĭr, "Hŏng lu hdră duah ƀơ̆ng, bi lar lu hdră bi hrŏ ƀun”, dưi đru leh kơ ñu sa drei êmô ana mđai. H'Sắk bŏ hŏng klei mơak kyua leh dua thŭn rông ba, ară anei mâo klei tŭ dưn leh:

 “Thŭn anei, êmô ana mđai, mâo mđai leh sa drei, snăn gŏ sang mơak snăk, gĭr rông amâo mâo čhĭ ôh, lehanăn lŏ dơ̆ng bi lar”.

Tui si Nguyễn Thu Hương, K’iăng khua knơ̆ng bruă sang čư̆ êa să Chư Á, êngao kơ bruă rông êmô, mâo knŭk kna đru, snăn bruă bi hrŏ ƀun hlăm alŭ wăl lŏ dưn yua bruă brei čan prăk bi mlih bruă mă. 3 thŭn êgao, să mâo mbha leh truh 42 drei êmô kơ dŭm gŏ êsei ƀun đru prăk bi mlih bruă knuă mă kơ 10 gŏ sang, lehanăn brei kơ 8 gŏ sang čan prăk hŏng mnga hdjul… Nguyễn Thị Thu Hương brei thâo.

“Grăp thŭn să duh nanao kơ dŭm hdră êlan đru kơ klei duah ƀơ̆ng, mâo ƀuôn prŏng  Pleiku lehanăn să đru kơ dŭm boh să ƀun, gŏ sang giăm ƀun hlăm bruă mdrao mgŭn, bruă sang hră mơar, klei kơ sang dôk, lehanăn čan prăk hŏng mnga hdjul, mjuăt bi hriăm bruă knuă, mơ̆ng anăn đru bi mlih leh klei hdĭp, mđĭ hĭn leh dŭm mta bruă kơ yang ƀuôn truh hŏng dŭm gŏ sang ƀun, lehanăn giăm ƀun”.

Boh sĭt brei ƀuh, grăp gŏ sang ƀun ti ƀuôn prŏng Pleiku čar Gia Lai mâo nanao dŭm klei čiăng đru ba mdê mdê. Msĕ hŏng Trần Thị Phượng, 50 thŭn, dôk ti alŭ mrô 4, să Trà Đa, ƀuôn prŏng Pleiku, leh toh hroh ngăn dŏ kyua mdrao mgŭn klei ruă bŏk brŭ, snăn čiăng snăk mâo klei đru ba mơ̆ng yang ƀuôn. Lehanăn boh sĭt , jing bruă sang čư̆ êa să, êpul hgŭm bruă mniê, phung mâo klei thâo bi đru… Mđrăm mbĭt sa ai tiê đru ba leh kơ ñu. Aduôn Phượng ăt dôk hdơr jih jang klei bi đru anăn jing yuôm bhăn, dơ̆ng mơ̆ng mnơ̆ng ƀơ̆ng huă hlŏng truh kơ sang dôk:

“Êjai dôk găn klei dleh dlan mâo bruă sang čư̆ êa đru hŏng gŏ sang kâo dưi mâo anôk dôk hơĭt, dŭm dhar bruă đru ba kơ anak kâo mâo mnơ̆ng ƀơ̆ng huă hlăm grăp hrue êjai dôk găn klei dleh dlan anei. Ară anei anak kâo gĭr hriăm hră mơar, čiăng dưi tlaih mơ̆ng klei dleh dlan. Gưl ung kâo dôk găn klei ruă kjham snăn să Trà Đa lehanăn êpul hgŭm bruă mniê đru leh kơ hmei 5 êklăk prăk, kâo mưn mnuih nao pĕ boh kphê, kyuadah kâo dôk kơ sang êa drao, bi mưn arăng yơh mă bruă, sa kpăt êjai êpa, sa anŭm êjai trei, kâo mgei ai tiê êdi”.

Hlue ngă hdră mtrŭn mrô 31-CTr/TU hrue 3/11/2021 mơ̆ng êpul khua kiă kriê bruă Đảng ƀuôn prŏng Pleiku gưl XII “Kơ klei lŏ dơ̆ng mđĭ hĭn bruă bi hrŏ ƀun hŏng klei kjăp, mđĭ klei hdĭp mda mnuih ƀuôn sang, boh nik hŏng dŭm boh ƀuôn mnuih djuê ƀiă hlăm alŭ wăl”, mơ̆ng thŭn 2021 truh ară anei, ƀuôn prŏng bi hgŭm leh hŏng dŭm knơ̆ng dhar bruă, êpul êya, knơ̆ng bruă sang čư̆ êa dŭm boh să, alŭ, mtrŭt mjhar phung duh mkra, mnuih mâo ai tiê thâo bi đru, “Keh kyua mnuih ƀun ƀuôn prŏng” lehanăn să đru leh kơ 95 mdơ̆ng mrâo lehanăn mkra wĭt sang dôk hŏng ênoh prăk jih jang jing êbeh   4,7 êklai prăk, đru êđai mjeh mnơ̆ng pla, mnơ̆ng rông, hbâo pruê, prăk duh bi liê kơ bruă knuă truh 1,2 êklai prăk; đru 252 gŏ sang ƀun, giăm ƀun mrâo tlaih mơ̆ng klei dleh dlan, dưi lŏ čan prăk hŏng mnga hdjul hŏng ênoh êbeh 13,8 êklai prăk... Trần Tấn Quang, Khua adŭ bruă duh mkra ƀuôn prŏng Pleiku, brei thâo, hnơ̆ng ênoh gŏ sang ƀun hlăm ƀuôn prŏng truh 0,24%, hŏng 149 gŏ sang ƀun. Ƀuôn prŏng hlăk lŏ dơ̆ng ksiêm duah, hlue ngă lu klei bi hmô jăk kơ bruă duh ƀơ̆ng, čiăng mâo ba wĭt klei tŭ dưn:

“Hŏng bruă klam jing êpul êya hlue ngă jăk klei ƀuôn prŏng kiă kriê đru kơ dŭm gŏ sang ƀun duah ƀơ̆ng, êpul êya bruă mâo leh hdră bi hmô jăk hlăm klei mnuih ƀuôn sang duah ƀơ̆ng, djŏ guôp hŏng grăp boh sang, lehanăn dưi talih mơ̆ng klei dleh dlan hŏng klei kjăp. Adŭ bruă duh mkra ƀuôn prŏng srăng lŏ dơ̆ng hrăm mbĭt hŏng knơ̆ng bruă sang čư̆ êa dŭm boh să, ƀuôn hgŭm, lehanăn anôk bruă lŏ hma lŏ dơ̆ng ksiêm duah, hlue ngă lu hdră elan duah ƀơ̆ng , bi djŏ hŏng klei hdĭp lehanăn klei duh mkra mơ̆ng mnuih ƀuôn sang, đru ba wĭt klei tŭ jing bruă bi hrŏ ƀun hŏng klei kjăp hlăm ƀuôn prŏng wưng tinăp”.

Bruă bi hrŏ ƀun mâo leh ƀuôn prŏng Pleiku čar Gia Lai ngă nanao hlăm lu thŭn êgao leh. Dôk hlăm wưng mđĭ kyar mrâo, snăn bruă anei ƀai hĭn mơh mâo tă hdră bi djŏ, kñăm mghaih msir klă mngač jih jang bruă kơ anôk dôk, sang dôk lehanăn kơ hnơ̆ng hdĭp. Mơ̆ng anăn, lŏ mdĭ hĭn klei dưi, boh kdrŭt kơ bruă mđĭ kyar mơ̆ng ƀuôn prŏng, dưn yua bi jih klei găl mđĭ kyar bruă duh mkra ala ƀuôn hlăm ƀuôn prŏng hŏng klei kjăp, mđrĭng hŏng bruă răng mgang wăl hdĭp mda./.