Gia Bắc jing sa krĭng taih kbưi hlăm kdriêk Di Linh, čar Lâm Đồng, hŏng 95% ênoh mnuih jing mnuih djuê ana K’Ho. Mbĭt hŏng klei Đảng lehanăn knŭk kna duh bi liê hlăm djăp mta, mâo klei gĭr ktĭr brưih đĭ mơ̆ng grăp čô mnuih ƀuôn sang, mjing leh atur kơ klei mđĭ kyar klei hdĭp mda ala ƀuôn. Thâo săng klă klei anăn, mbĭt hŏng phung   đảng viên mkăn hlăm alŭ wăl, mơ̆ng hrue phŭn tal êlâo leh mŭt Đảng, K’Bơn, knuă druh mda asei să Gia Bắc, kdriêk Di Linh, čar Lâm Đồng gĭr leh jih ai tiê pô hlăm bruă hâo hưn, mtrŭt mjhar mnuih ƀuôn sang hlue djăp mta bruă mơ̆ng alŭ wăl mâo. K’Bơn brei thâo, čiăng kơ mnuih ƀuôn sang thâo săng lehanăn tui hlue, grăp čô knuă druh đảng viên brei jing mnuih ba akŏ hlăm djăp mta bruă:

           “Leh mŭt đảng viên, kâo mâo klei găl tui duah klei thâo săng klă mngač hĭn kơ dŭm hdră êlan mơ̆ng Đảng, hdră bhiăn knŭk kna. Mơ̆ng anăn, kâo dưi ngă jăk hĭn bruă mâo êpul bruă Đảng, bruă sang čư̆ êa jao. Mơ̆ng anăn, đru mnuih ƀuôn sang lu hĭn hlăm bruă mđĭ kyar klei duh mkra ala ƀuôn, mkŏ mkra krĭng ƀuôn sang mrâo maoa boh tŭ dưn hĭn”.

          Mơ̆ng anôk mđing hlăm bruă mkŏ mjing đảng, mkŏ mjing jih jang bruă kđĭ čar hŏng klei kjăp, truh kơ ară anei êpul bruă Đảng să Gia Bắc mâo bi mŭt leh truh 96 đảng viên, lu phung đảng viên jing mnuih djuê ƀiă sơăi, bi mguôp hlăm 9 êpul bruă Đảng. Tui si K’Thanh, Khua bruă Đảng buôn Ka Sá, să Gia Bắc, kdriêk Di Linh, đảng viên jing phung thâo bi hmô hlăm klei hlue ngă dŭm hdră êlan mơ̆ng Đảng lehanăn klei bhiăn knŭk kna. Kyuanăn, êngao kơ klei ksiêm hriăm amâo mâo mdei jih jang klei tŭ dưn, bi hriăm êmuh čiăng kơ mâo klei thâo săng hĭn, pioh lŏ bi lar kơ mnuih ƀuôn sang bi omlih mnơ̆ng pla, mnơ̆ng rông, myơr lăn pioh mkra êlan, mkŏ mkra krĭng ƀuôn sang mrâo...    Kyuanăn, klei hdĭp mda mnuiih ƀuôn sang hlăm ƀuôn Ka Sá, mbĭt anăn hlăm să Gia Bắc pral dưi msưh kdŭn jih klei ƀun ƀin kpưn đĭ jing sa djăp ênoh čuăn krĭng ƀuôn sang mrâo.   K’Thanh, Khua bruă Đảng să buôn Ka Sá, lač:

 “Hlue ngă hdră êlan 04 mơ̆ng bruă Đảng kdriêk, mơ̆ng gưl dlông kơ “Mkŏ mkra krĭng ƀuôn sang mrâo”, mnuih ƀuôn sang hlăm ƀuôn sa ai bi tui gưt, myơr lăn pioh mkra êlan. Hŏng bruă klam jing khua bruă Đảng ƀuôn, asei mlei kâo mâo nanao klei hâo hưn mtă mtăn mtrŭt mjhar mnuih ƀuôn sang hlăm ƀuôn mđĭ kyar bruă duh mkra ala ƀuôn, ngă bi mlih klei jing ƀuôn sang”.

Amâo mâo djŏ knŏng knuă druh đảng viên hlăm dŭm boh ƀuôn, phung đảng viên jing phung khua kiă kriê dŭm boh să, wăl krah hlăm kdriêk Di Linh ăt ngă jăk bruă ba anăp hŏng dŭm mta bruă ngă klă mngač. Hŏng đảng viên K’Ly, K’iăng khua knơ̆ng bruă sang čư̆ êa să Tân Thượng, kdriêk Di Linh, amâo mâo djŏ knŏng ngă jăk bruă mâo jao, ñu lŏ jhŏng mđĭ kyar bruă duh mkra pô hŏng bruă pla mjing êbŭng prăng. K’Ly brei thâo, čiăng mâo klei bi mlih hlăm bruă duh mkra pla mjing snăn brei mâo bruă bi hmô sĭt:

 “Čiăng kơ bruă mnuih ƀuôn sang duh mkra mâo klei đĭ kyar, hơĭt kjăp, êngao kơ bruă pla kphê, să lŏ mtrŭt pla pluă, bi mlih jih ana sui thŭn, pla mbĭt duĭm mta ana boh kroh  msĕ si boh ƀơr, boh durian, măkka... Asei mlei kâo mtam jing pô ngă klei bi hmô, čiăng kơ mnuih ƀuôn sang tui hlue. Ară anei ana êbŭng prăng mâo leh anôk čhĭ hơĭt, čhĭ hŏng ênoh mơ̆ng 70.000đ truh 100.000đ/kg, mâo lu phung ghan mnia hriê blei truh hlăm đang, tơl amâo lŏ mâo mnơ̆ng pioh čhĭ.

Ară anei hlăm kluôm kdriêk Di Linh, čar Lâm Đồng mâo leh êbeh 4.400 čô đảng viên, hlăm anăn mâo giăm 900 čô đảng viên jing mnuih djuê ƀiă. Mơ̆ng êpul phung đảng viên anei yơh jing phung bi hmô ba êlan êlâo hlăm djăp mta bruă, đru bio mlih klei mĭn hdră mă bruă jăk hlăm mnuih djuê ƀiă, đru leh jăk kơ klei mđĭ kyar klei hdĭp mda ala ƀuôn hlăm ƀuôn sang čư̆ čhiăng Di Linh./.