Amâo lŏ huĭ kơ klei mtŭk mtŭl, amâodah bi ktrŏ anak čô ôh, grăp blư̆ truh hrue mă prăk mlan leh mdei bruă, amâodah čiăng mghaih msir dŭm hdră êlan kơ bruă hră ênua, Nguyễn Văn Minh ti să Ea Ning, kdriêk Čư̆ Kuiñ, čar Daklak čŏng ñu pô yơh nao ksiêm ênoh mâo hlăm akkao mơ̆ng knơ̆ng prăk, lehanăn kơ ênoh đru ba hŏng knuă druh leh wĭt mdei hlăm akkao elektronik mâo pŏk leh hŏng knơ̆ng prăk, lehanăn anôk bruă hră ênua yang ƀuôn čar. Nguyễn Văn Minh brei thâo, leh mâo phung hlăm êpul đru kơ bruă mkŏ kdrăp mrô hlăm ƀuôn sang hriê ngă brei, lehanăn ktrâo atăt klei djă yua, snăn ñu ƀuh bŏ hŏng klei găl ênưih.

 “Amâo mâo guôn lŏ nao ôh, amâodah ya hrue pô kpăk gun, kreh jao kơ mnuih mkăn, bi dôk guôn mơgh snăn mâo mă. Mơ̆ng ară anei, leh mâo hdră êlan anei, truh hrue arăng mơĭt prăk, pô thâo. Hmei dơ̆ng mưng yua kdrăp anei, ăt kăn guôn lŏ nao mă prăk ti anăp rei ƀiădah knŏng dhuôr mrô QR bŏ hŏng klei găl ênưih”.

Amâo mâo djŏ knŏng nao truh hlăm grăp boh sang, ôh ƀiădah êpul ngă bruă kdrăp mrô hlăm ƀuôn sang ti să Ea Ning, kdriêk Čư̆ Kuiñ, čar Daklak lŏ bi mbha dôk kăp ti ƀăng bhă sang să, kăp đru, lehanăn ktrâo atăt mnuih ƀuôn sang. Hŏng klei hur har, mâo bruă klam , êpul đru bruă kdrăp mrô hlăm ƀuôn ƀrư̆ hrue brŭ lu mnuih ƀuôn sang thâo djă yuakdrăp mrô hlăm bruă mdrao mgŭn, bruă mjuăt bi hria7m, bruă yang ƀuôn hŏng kdrăp mrô sơăi, nao hlăm klei bi mnia mblei hŏng elektronik msĕ mơh. Nguyễn Văn Mạnh, mnuih hlăm êpul bi mlih mrô ti ƀuôn sang, să Ea Ning, kdriêk Čư̆ Kuiñ, čar Daklak brei thâo:

 “Phung knơ̆ng mơ̆ng êpul ngă bruă bi mlih mrô hlăm ƀuôn sang, mâo leh ai tiê thâo ba anăp, mơ̆ng êpul êdam êra, sa ai tiê thâo đru kơ mnuih ƀuôn sang. Mơ̆ng anăn, mnuih ƀuôn sang ƀrư̆ hrue ƀrư̆ yua kdrăp anei tŭ dưn hĭn hlăm dŭm alŭ wăl”.

Tui si Nguyễn Tuấn Hà, K’iăng khua knơ̆ng bruă sang čư7 êa čar Daklak, truh ară anei kluôm čar mâo mkŏ mjing leh giăm 2.000 êpul ngă bruă kdrăp mrô hlăm dŭm boh ƀuôn, hŏng 11.700 čô mnuih. Anei dưi yap jing phung kăp đtru kơ êpul khua kiă kriê bruă bi mlih mrô hlăm dŭm gưl, mâo leh bruă klam kjăp ba kdrăp mrô, klei thâo yua truh hŏng mnuih ƀuôn sang:

 “Êpul ngă bruă anei mâo ngă leh lu klei tŭ jing hŏng êpul bruă knơ̆ng hlăm bruă sang čư̆ êa, dŭm êpul êya phung duh mkra nao hlăm klei bi mlih mrô. Daklak gĭr ngă ƀrư̆ ƀrư̆, ngă nanao, hŏng klei gĭr truh hŏng mnuih ƀuôn sang”.

Čiăng mđĭ hĭn klei tŭ dưn mơ̆ng êpul ngă bruă mlih mrô, hlăm wưng ti anăp, čar Daklak lŏ mđĭ hĭn dŭm bruă mtô bi hriăm, ktrâo atăt, čiăng mđĭ klei thâo hlăm bruă bi mlih mrô hŏng mnuih hlăm êpul. Mbĭt hŏng anăn, bi mguôp hŏng dŭm êpul êya djŏ tuôm, boh nik hŏng anôk bruă dăng kông mkŏ mjing atur kơ klei ba yua kdrăp đĭng blŭ djă hiu kơ mnuih ƀuôn sang, phung duh mkra yua hŏng klei găl hĭn. Mơ̆ng anăn mđĭ ênoh mnuih thâo ba yua kdrăp mrâo, bi leh pral klei čiăng kơ ênoh mnuih./.