Amai H’Dôk Êban ti ƀuôn Êmăp, wăl krah Êa Pôč, kdriêk Čư̆ Mgar mrâo hrui êmiêt mdiê. Dŭm pluh kdô mdiê mâo dăp tring djiêu mtih sang. Amai H’Dôk brei thâo, gŏ sang amai lehanăn mnuih ƀuôn sang hlăm ƀuôn ară anei amâo lŏ mđing uêñ ôh kơ klei mnơ̆ng ƀơ̆ng huă. Hdră pla mdiê dưi mkra mđĭ, hnơ̆ng hrui wĭt mâo mơ̆ng 4 truh kơ 6 ton hlăm 1 ha, rơ̆ng lu gŏ sang amâo djŏ knŏng djăp huă ƀiădah lŏ ba čhĭ čiăng mđĭ hnư hrui wĭt. Hluê amai H’Dôk, mâo klei bi mlih anei kbiă hriê mơ̆ng dŭm êpul mjĕ mjing, jing Anôk bruă kiă kriê klei hâo hưn mơ̆ng bruă Đảng čar Dak Lak lehanăn Anôk bruă mguôp hnư hdră dhar kreh čar mbĭt hŏng êpul knuă druh mtrŭt mjhar bruă lŏ hma gĭr ktrâo lač.

Mâo klei ktrâo lač pô ăt hluê ngă, mdiê ƀâo mngưi hlăm 200m2 mâo 2 kdô, bi mdiê mjeh mrâo hlăm 200 m2 anăn dưi mâo 4 kdô, mdiê ƀâo mngưi mâo mta mâo boh mnga lu, mâo mta boh mnga ƀiă, bi mdiê mjeh mrâo gơ̆ yuôm hĭn. Mrâo rah pla snăn drei pruê hbâo sunfat, truh kơ mdiê prŏng ƀiă drei lŏ pruê 2 blư̆ hbâo NPK dưi leh.

Y -Tha Mlô, Khua bruă Đảng ƀuôn Êmăp brei thâo, kluôm ƀuôn ară anei mâo 535 gŏ sang lehanăn ară anei knŏng dôk 24 gŏ sang ƀun. Ênoh gŏ sang ƀun ăt hrŏ pral kyua dŭm thŭn hŏng anei mnuih ƀuôn sang kreh mao boh mnga ênoh čhĭ đĭ. Mbĭt hŏng klei bi mlih krĭng ƀuôn sang, hdră mđĭ kyar đảng viên ti ƀuôn ăt mâo lu klei bi mlih jăk. Mơ̆ng anôk “Amâo mâo” đảng viên hlăm thŭn 2004, ară anei, ƀuôn mâo leh 1 anôk bruă Đảng hŏng 17 čô đảng viên. Dŭm boh tŭ anei mâo klei đru mguôp mơ̆ng anôk bruă kđi čar ti gưl nah gŭ mbĭt hŏng gru kruăk mơ̆ng hdră đru čung ba mnuih ƀuôn sang, boh nik jing hdră mjĕ mjing plah wah dŭm anôk bruă, êpul êya hŏng ƀuôn sang. Y-Tha Mlô brei thâo:

 “Hlăm dŭm thŭn ayŏng adei hlăm anôk bruă mjĕ mjuk wĭt, diñu bi trông leh hŏng ƀuôn čiăng mkra êlan mrâo. Boh nik hdră mđĭ kyar bruă duh mkra, khădah anôk bruă mjĕ mjing amâo mâo prăk kăk, lu jing ai tiê lehanăn ktrâo lač kơ diñu, leh kơnăn ƀuôn, alŭ truh kơ knuă druh thâo, diñu srăng mtô mblang, mtrŭt mjhar kơ mnuih ƀuôn sang hluê ngă dŭm hdră êlan mđĭ kyar bruă duh mkra – ala ƀuôn, rơ̆ng klei êđăp ênang hlăm alŭ wăl ƀuôn”.

Hluê si Huỳnh Chiến Thắng, Kơiăng khua Anôk bruă kiă kriê klei hâo hưn bruă Đảng čar Dak Lak, jing anôk bruă mjĕ mjing hŏng ƀuôn Êmăp, ba wĭt leh boh tŭ hlăm bruă bi mlih klei thâo săng mơ̆ng mnuih ƀuôn sang hlăm hdră pla mjing, anôk bruă brei giăm mnuih ƀuôn sang lehanăn thâo săng mnuih ƀuôn sang. Kyua anăn, leh mjĕ mjing, anôk bruă mkŏ mjing leh anôk bruă gĭt gai, ksiêm dlăng boh sĭt ti krĭng ƀuôn sang čiăng čih mkra hdră kčah đru djŏ guôp. Hŏng gŏ sang dleh dlan amâo lăn pla mjing, anôk bruă srăng đru kơ prăk blei mjeh mnơ̆ng rông, mnơ̆ng pla, bi hgŭm hŏng anôk bruă duh mkra hưn mthâo bruă mă. Dŭm gŏ sang mâo lăn pla mjing ƀiădah hnơ̆ng boh mnga ƀiă, ka ba wĭt boh tŭ, anôk bruă jak iêu leh knuă druh bruă mtrŭt mjhar hdră lŏ hma nao đru. Grăp mlan, anôk bruă tiŏ nao leh phung đảng viên bi mjĕ mjuk hŏng anôk bruă đảng ƀuôn čiăng pral thâo klă klei čiăng lehanăn ruh mtlaih klei gun kpăk mơ̆ng mnuih ƀuôn sang.

 “Hluê ngă hdră êlan mkŏ mkra anôk bruă đảng 4 jăk mơ̆ng Anôk kiă kriê bruă Đảng čar, hmei mkŏ mjing leh hdră bi hgŭm hŏng anôk bruă đảng mơ̆ng ƀuôn grăp mlan hmei tiŏ nao phung đảng viên wĭt mjĕ mjuk đru kơ bruă čih mkra dŭm hdră mtrŭn, msir mghaih dŭm bruă ti nah gŭ. Mơ̆ng anăn, thâo klă klei mâo čiăng mkŏ mkra ƀuôn sang jăk hĭn.

20 thŭn êgao, čar mâo leh 1.780 anôk bruă, êpul êya, anôk bruă duh mkra mjĕ mjing hŏng 556 boh ƀuôn mnuih ƀuôn sang djuê ƀiă. Hluê si Anôk bruă Đảng čar Dak Lak, boh tŭ hdră mjĕ mjing wưng êgao bi mklă anei jing hdră êlan djŏ klă, djŏ ai mnuih ƀuôn sang, mâo boh tŭ bruă kđi čar, ala ƀuôn jăk siam. Čiăng mđĭ boh tŭ yuôm mơ̆ng hdră anei, Dak Lak srăng lŏ mlih mrâo kơ mta phŭn lehanăn hdră, djŏ hŏng klei čiăng mơ̆ng mnuih ƀuôn sang. Nguyễn Đình Trung, Khua bruă Đảng čar Dak Lak lač snei, mjĕ mjing amâo djŏ knŏng klei yăl dliê mơ̆ng dŭm êpul êya – anôk bruă duh mkra hŏng mnuih ƀuôn sang ti dŭm boh ƀuôn ƀiădah lŏ mâo klei hgŭm mơ̆ng dŭm gưl bruă Đảng, bruă sang čư̆ êa.

 “Dŭm anôk bruă, êpul êya mjĕ mjing brei mđĭ hĭn klei bi mjĕ hŏng anôk bruă Đảng, bruă sang čư̆ êa alŭ wăl čiăng pral thâo klă klei mĭn, klei hdĭp mơ̆ng mnuih ƀuôn sang ƀuôn mjĕ mjing, mơ̆ng anăn ba mdah dŭm hdră đru klă sĭt, djŏ hŏng klei dôk mâo lehanăn bruă klam hlăm boh klei mrâo. Mbĭt anăn, pral bi trông kơ dŭm klei dleh dlan, gun kpăk hlăm hdră pŏk ngă bruă mjĕ mjing.

Mjĕ mjing dưi dlăng jing sa wưng bi hgŭm mguôp êpul êya, jing sa knhuah jăk siam hlăm klei hdĭp, ai tiê klei mĭn mơ̆ng êpul êya dŭm djuê ana Việt Nam. 20 thŭn êgao, klei jăk siam anei dưi ba yua hlăm sa hdră êlan mtrŭn prŏng mơ̆ng Anôk bruă Đảng čar Dak Lak, dưi bi sĭt hŏng dŭm hdră mjĕ mjing plah wah dŭm anôk bruă, êpul êya hŏng grăp alŭ, ƀuôn mnuih djuê ƀiă, mơ̆ng anăn lŏ bi msiam hĭn pŏk rup klei hgŭm mguôp jih jang djuê ana, đru rơ̆ng kjăp klei êđăp ênang bruă kđi čar, klei êđăp ênang ala ƀuôn, mđĭ kyar klei hdĭp, mnơ̆ng dhơ̆ng – ai tiê klei mĭn kơ mnuih ƀuôn sang krĭng djuê ƀiă./.