Hlăm lam sang “Bi mguôp lĭng kahan – mnuih ƀuôn sang” mrâo rŭ mjing, Y-Huê Êban ti ƀuôn Niêng 1, să Êa Ñuôl, kdriêk Ƀuôn Đon hơ̆k mơak brei thâo, mơ̆ng hruê mâo sang dôk mrâo, gŏ sang amâo mâo lŏ uêñ ôh kơ mđiă, hjan êa ƀrôč. Klei suaih pral dưi mâo klei hơĭt, dưi ngă lu bruă, gŏ sang mâo thiăm hnư hrui wĭt. Ñu lač jăk kơ phung lĭng kahan rŭ mjing leh sang dôk mđup breu kơ gŏ sang:

 “Êlâo dih hjan êa ƀrôč, mđiă hlơr, thŭn anei alŭ wăl uêñ mĭn đru rŭ mdơ̆ng sang dôk jăk hmei hơ̆k mơak êdi. Kâo srăng gĭr mă bruă knuă, mbĭt hŏng mnuih ƀuôn sang hlăm ƀuôn đru răng mgang klei êđăp ênang”.

Hluê si Y-Kim Êban, khua ƀuôn Niêng 1, lĭng kahan mơ̆ng Y-Huê bơ̆k bâo jing phung lĭng kahan, knuă druh anôk bruă K864 (Anôk bruă phao ktuang, Kdrăp yua lĭng kahan). Anei jing anôk bruă mjĕ mjing hŏng Ƀuôn Niêng 1 mơ̆ng lu thŭn hŏng anei. bruă đru rŭ mjing sang dôk kơ phung ƀun ƀin dưi lŏ mbŏ boh kdrŭt čiăng kơ dŭm gŏ sang gĭr ktưn kpưn đĭ.

 “Diñu hur har êdi, hriê čuă êmuh leh anăn kah mbha dŭm klei hriăm čiăng kơ mnuih ƀuôn sang mđĭ kyar klei hdĭp mda. Ƀuôn sang hmei hơ̆k mơak sơnăk. Boh nik jing dŭm gŏ sang ƀun diñu gĭr mđĭ kyar bruă duh mkra êdei anăp, ênoh gŏ sang ƀun ƀrư̆ hruê ƀrư̆ hrŏ”.

Jing anôk bruă mjĕ mjing hŏng Ƀuôn M’Riu, să Čư̆ Huê, kdriêk Ea Kar, čar Dak Lak, 20 thŭn êgao, knơ̆ng bruă pui kmlă Dak Lak đru mguôp lu sơnăk hlăm bruă bi mlih klei jing krĭng ƀuôn sang tinei. Mơ̆ng sa ƀuôn ƀun ƀin, Mơ̆ng sa ƀuôn ƀun ƀin, mă braih đru hlăm wưng giăm wiă, arăn gŏ sang ƀun ƀin knŏng adôk ti gŭ 10%. Lu gŏ sang hlăm ƀuôn dưi rŭ mdơ̆ng sang dôk, blei êdeh kai, măi krih êa. Hluê si Trần Văn Thuận, khua kiă kriê knơ̆ng bruă pui kmlă Dak Lak, hŏng hdră êlan mjĕ mjing grăp thŭn, Bruă Đảng knơ̆ng bruă mbha bruă klam hŏng grăp êpul, dhar bruă, anôk bruă Đảng bi mguôp hŏng dŭm anôk bruă mjĕ mjing ngă tŭ dưn hdră êlan anei.

 “Hluê si hdră mjĕ mjing, anôk bruă mâo leh dŭm hdră êlan ngă bruă grăp thŭn čiăng đru bi hơĭt klei hdĭp yang ƀuôn leh anăn uêñ mĭn kơ dŭm gŏ sang knŭk kna dlăng ba, gŏ sang dleh dlan čiăng đru mđĭ kyar bruă duh mkra ala ƀuôn. Bi hŏng ƀuôn M’Mriu dŭm klei dleh dlan ară anei hmei thâo klă leh anăn mâo dŭm hdră êlan đru klă klơ̆ng hŏng mnuih ƀuôn sang, ăt msĕ mơh bruă mkŏ mjing ƀuôn dhar kreh.”

Hluê ngă hdră êlan mơ̆ng bruă Đảng čar Dak Lak kơ bruă mjĕ mjing hŏng dŭm alŭ ƀuôn mnuih djuê ƀiă, truh kơ ară anei, Dak Lak mâo giăm 200 anôk bruă, knơ̆ng bruă gưl čar mjĕ mjing hŏng dŭm alŭ ƀuôn. Nguyễn Đình Trung, khua hlăm bruă Đảng gưl dlông, khua bruă Đảng čar Dak Lak brei thâo, hŏng klei đru klă klơ̆ng mơ̆ng dŭm anôk bruă mjĕ mjing, klei hdĭp mda mnuih djuê ƀiă anôk mjĕ mjing dưi bi hơĭt. Hlăm wưng kơ anăp, bruă Đảng čar Dak Lak srăng lŏ dơ̆ng mtrŭt mđĭ ngă bruă mjĕ mjing hŏng dŭm ƀuôn mnuih djuê ƀiă kñăm đru lăm lui klei ư̆ êpa, bi hrŏ klei ƀun, bi kjăp klei bi mguôp djuê ana, gĭr ktưn mkŏ mjing čar Dak Lak ƀrư̆ hruê ƀrư̆ mdrŏng siam – mrâo mrang – knhuah gru.

 “Dŭm anôk bruă mjĕ mjing hŏng dŭm alŭ ƀuôn dưi bi êdah bruă klam, mâo dŭm boh tŭ dưn leh anăn djăp klei čuăn, mta kñăm mâo leh. Klei hdĭp mơ̆ng mnuih ƀuôn sang ti dŭm krĭng taih kbưi mâo klei mlih klă sĭt leh anăn klei hrăm mbĭt, klei bi mguôp plah wah dŭm djuê ana hrăm mbĭt mkŏ mjing čar Dak Lak mdrŏng siam”.

Dưi ƀuh klă, dŭm bruă ngă tŭ dưn, nao mbĭt hŏng boh sĭt nah gŭ, klei mjĕ mjing hŏng dŭm alŭ, ƀuôn ti Dak Lak dưi ba wĭt boh tŭ dưn klă sĭt, đru mguôp yuôm bhăn hlăm bruă mđĭ kyar bruă duh mkra – ala ƀuôn, mkŏ mjing bi kjăp bruă kđi čar nah gŭ, răng mgang klei êđăp ênang yang ƀuôn leh anăn hyuă kjăp thiăm klei bi mguôp plah wah dŭm djuê ana./.