Ƀuôn Krông Hra, să Yang Bắc tuôm jing sa boh ƀuôn ƀun ƀin hlăm kdriêk Đăk Pơ. Mnuih ƀuôn sang djuê ana Bahnar anôk anei lu jing pla dŭm mta ana ƀiă hruê, hrui wĭt amâo mâo lu ôh. Siămdah, mơ̆ng thŭn 2018, mâo klei ktrâo atăt mơ̆ng bruă sang čư̆ êa, lehanăn phung đảng viên hlăm ƀuôn, lu gŏ êsei mnuih ƀuôn sang bi mlih pla kbâo hŏng ênhă prŏng. Knŏng hlăm 6 năm, klei hdĭp mnuih ƀuôn sang dơ̆ng mâo leh klei bi mlih klă sĭt. Đinh Phới, sa čô mnuih ngă lŏ hma ti ƀuôn Krông Hra lač:

"Lăn ƀrư̆ hrue ƀrư̆ sah kba snăn mâo bruă sang čư̆ êa ktrâo atăt brei kơ mnuih ƀuôn sang mlih pla kbâo čiăng mâo ênoh ba wĭt lu hĭn. Mnuih ƀuôn sang  Bahnar ti anei jih jang bi ktuh êyuh trŭn nao bi pla kbâo sơăi, kñăm mđĭ hĭn ênoh mâo ba wĭt. Čiăng kơ lăn jăk hĭn, mnuih ƀuôn sang ăt tui hriăm hdră dlăng kriê wiê ênăk, duh kơ hbâo pruê, dŭm hecta kbâo ăt mâo ba wĭt dŭm êtuh êklăk prăk. Gŏ sang kâo ăt pla kbâo mơh, lehanăn mâo ba wĭt truh leh mơh dŭm êtuh êklăk prăk”.

Hlăm dŭm hrue phŭn tal êlâo nao bi pla kbâo, Phới mbĭt hŏng mnuih ƀuôn sang ƀuôn Krông Hra dôk lu klei mtŭk mtŭl ka kjăp hlăm klei mă bruă ôh. Siămdah, mâo klei đru ba, ktrâo atăt mơ̆ng phung đảng viên hlăm ƀuôn, mnuih ƀuôn sang dơ̆ng ƀrư̆ ƀrư̆ tui hriăm, thâo hlăm bruă dlăng kriê wiê ênăk hĭn. Amai Đinh Thị Mại, Khua êpul hgŭm bruă mniê ƀuôn Krông Hra brei thâo:

"Kâo mâo jao čung ba dŭm gŏ êsei dôk hlăm klei dleh dlan, đru digơ̆ pral hĭn tlaih mơ̆ng klei knap mñai, đru hlăm klei čiăng bi leh ênoh čuăn mơ̆ng bruă mkŏ mkra krĭng ƀuôn sang mrâo. Pô đru čung ba mnuih ƀuôn sang hlăm hdră pla mjing bi djŏ rông mnơ̆ng bi jăk, thâo bi mdoh wăl hdĭp mda grăp hrue bi jăk siam”.

Mbĭt hŏng anăn, hlue hdră “knuă druh đảng viên nao êlâo, ƀuôn sang hlue tluôn”, êpul bruă Đảng ƀuôn Krông Hra ăt jing sa klei bi hmô kơ hnơ̆ng kjăp hlăm bruă bi mguôp êpul bruă Đảng hlăm alaŭ wăl. Đinh Văn Việt, K’iăng khua bruă Đảng ƀuôn  Krông Hra lač:

"Êpul bruă Đảng ngă jăk bruă čuăn kđĭ čar, mâo hnơ̆ng kjăp hlăm klei bi mguôp, mâo klei bhiăn kjăp, mâo êpul knuă druh, đảng viên jăk. Lŏ dơ̆ng dưn yua jih bruă klam hlăm klei đru čung ba mnuih ƀuôn sang, hlue ngă jăk dŭm hdră mtrŭn, asăp mtrŭn mơ̆ng Đảng nao hlăm klei hdĭp čiăng mđĭ kyar klei hdĭp mda lehanăn mkŏ mkra krĭng ƀuôn sang mrâo”.

Ară anei bruă Đảng să Yang Bắc mâo leh 13 êpul bruă Đảng, 205 čô đảng viên, hlăm anăn mâo 8 êpul bruă Đảng ƀuôn. Kyua ngă jăk bruă mtrŭt mjhar, ktrâo atăt, lehanăn djă kơ kngan ktrâo kơ bruă mơ̆ng êpul knuă druh, đảng viên, mnuih mâo k’hưm, dŭm thŭn giăm anei, mnuih ƀuôn sang hlăm dŭm boh ƀuôn thâo ba yua leh klei kreh knhâo hlăm bruă knuă pô, bi mlih mnơ̆ng pla, mnơ̆ng rông djŏ guôp mâo ba wĭt leh boh tŭ dưn yuôm bhăn.  Knhal jih thŭn 2023, hnơ̆ng ênoh gŏ êsei ƀun hlăm să Yang Bắc hrŏ leh adôk mă 14,4%, ênoh mâo hrui wĭt kah knar grăp čô mnuih jing êbeh 35,5 êklăk prăk/thŭn. Aduôn Phạm Thị Thúy, Khua bruă Đảng să Yang Bắc mñă:

"Hluê ngă bruă êpul bruă Đảng mâo 4 klei jăk, snăn êpul bruă Đảng bi hlue ngă mtam mơ̆ng akŏ thŭn. Leh hlue ngă dŭm bruă čuăn duh mkra ala ƀuôn, bruă răng mgang klei êđăp ênang, mkŏ mjing êpul bruă kđi čar kjăp, snăn êpul kiă kriê bruă Đảng mtrŭn mtam kơ jih jang êpul bruă Đảng bi hlue ngă, iêo jak êpul khua kiă kriê hriê ktrâo atăt mtô bi hriăm kơ hdră êlan mă bruă, mâo hdră ksiêm dlăng jêñ jêñ, lehanăn ngă bruă hŏng klei ƀhĭ klĭ, ênŭm ênap. Truh ti wưng anei dŭm êpul bruă Đảng ngă leh hră mơar kơ êpul bruă Đảng să, kut kat hlue ngă êpul bruă Đảng 4 klei jăk hlăm thŭn anei”./.