Ngă bruă mkŏ mkra krĭng ƀuôn sang mrâo, bruă Đảng să Tà Nung yap anei jing bruă kđi čar yuôm bhăn, jing boh kdrŭt kơ klei mđĭ kyar duh mkra ala ƀuôn. Hlăm anăn, bruă mjuăt bi hriăm kđi čar, kơ klei mĭn mâo ngă mđrăm mbĭt, mjing klei bi sa hnơ̆ng hlăm klei thâo săng, klei mă bruă mơ̆ng phung knuă druh, đảng viên lehanăn jih jang mnuih ƀuôn sang dŭm ênoh čuăn kơ krĭng ƀuôn sang mrâo.

Mbĭt hŏng anăn, să Tà Nung dưn yua leh jih hnơ̆ng klei dưi pioh mđĭ kyar bruă nah gŭ. Truh ară anei, jih jang êlan klông krĭng ƀuôn sang jăk găl, êlan hlăm ƀuôn mâo ngă hŏng bê tông sơăi, đru kơ klei êrô êbat lehanăn dŭ mdiăng mnơ̆ng mnuă jăk găl. Bruă knơ̆ng mbông êa mâo mkra mđĭ, rơ̆ng djăp êa kơ bruă krih mđoh, đru mđĭ leh boh mnga mnơ̆ng pla mjing. Mbĭt anăn, sang hră mơar, sang êa drao gŭn, sang dhar kreh ƀuôn ăt mâo rŭ mdơ̆ng, djăp kơ bruă mnuih ƀuôn sang bi mguôp, hriăm mjuăt, lehanăn mdrao mgŭn klei suaih pral.

   Hlăm klei duh mkra ala ƀuôn să mtrŭt leh mnuih ƀuôn sang bi mlih mnơ̆ng pla mnơ̆ng rông, tui tiŏ hdră êlan pioh čhĭ mnia, ba yua klei kreh knhâo hlăm klei mă bruă. Thŭn 2024, hrui wĭt kah knar grăp čô mnuih hlăm să mâo 60 êklăk prăk. Boh nik, klei duh mkra pla mjing ba yua kdrăp mrâo mrang, mguôp mbĭt hŏng bruă hiu čhưn ênguê yang ƀuôn mâo leh klei tŭ dưn, bi hơĭt bruă knuă mă hlăm ƀuôn sang.

Mđrĭng hŏng bruă mđĭ kyar klei hdĭp mda, să ăt mđing mơh hlăm bruă kriê pioh knhuah gru dhar kreh djuê ana. Mâo lu bruă dhar kreh, kdŏ muiñ dưi mkŏ mjing jêñ jêñ, mjing anôk hlăp jăk kơ mnuih ƀuôn sang. Dŭm mta bruă: “Jih jang mnuih ƀuôn sang bi mguôp mkŏ mjing klei hdĭp dhar kreh”, Phung ngă lŏ hma mbruă”, “5 hơăi, 5 doh, 5 amâo mâo” ăt dưi bi lar, đru leh hlăm bruă mkŏ mjing dhar kreh, ênuk mrâo.

Jih jang hdră êlan kơ klei hdĭp mda ala ƀuôn, mâo ngă hŏng klei tŭ jing, čiăng kơ jih jang mnuih mâo nao mdrao mgŭn, mâo klei mjuăt bi hriăm, lehanăn đru kơ hdră duh ƀơ̆ng. Ară anei să Tà Nung amâo lŏ mâo ôh gŏ sang ƀun. Hnơ̆ng ênoh mnuih mâo blei hră ênua mdrao mgŭn truh 97%. Jih jang phung hđeh djŏ thŭn mâo nao sang hră mơar, hnơ̆ng kjăp klei mjuăt bi hriăm amâo mâo mdei đĭ kyar.

Tui si Kră Jăn Ha Diệp, k’iăng khua bruă Đảng să Tà Nung, dŭm boh tŭ dưn leh mâo bi klă leh kơ klei gĭr amâo mâo mdei hlăm jih bruă kđi čar lehanăn mnuih ƀuôn sang. Čiăng lŏ dơ̆ng krơ̆ng lehanăn mđĭ bi lar dŭm boh tŭ dưn leh mâo hlăm bruă mkŏ mkra krĭng ƀuôn sang mrâo, să mđĭ bruă klam mơ̆ng dŭm gưl bruă Đảng, bruă sang čư̆ êa, bruă  mặt trận lehanăn dŭm êpul êya bruă kđi čar bruă yang ƀuôn, boh nik bruă klam mơ̆ng mnuih ƀuôn sang. Jih jang hdră êlan brei mâo klei bi lar truh ênŭm hŏng mnuih ƀuôn sang, čiăng kơ mnuih ƀuôn sang thâo săng lehanăn sa ai mbĭt.

 Nao hlăm klei mđĭ kyar bruă lŏ hma kjăp, alŭ wăl mđing hĭn kơ klei iêo jak phung duh mkra hriê duh bi liê. Tà Nung lŏ dưn yua jih klei găl duh bi liê bi leh jih jang bruă nah gŭ, mđing kơ bruă răng mgang wăl hdĭp mda, mjut mjing anôk hdĭp mda hlăm ƀuôn sang doh siam, mtah jăk.

Klei sa ai mđrăm mbĭt hŏng jih bruă kđi čar, lehanăn mnuih ƀuôn sang, să  Tà Nung hlăk čhuang bi leh mta kñăm mkŏ mkra krĭng ƀuôn sang mrâo ti hnơ̆ng kdlưn hĭn, lehanăn krĭng ƀuôn sang mrâo thâo bi hmô jăk. Mta kñăm prŏng hĭn jing mđĭ hnơ̆ng hdĭp jih jang mnuih ƀuôn sang dưi mâo hlăm klei kjăp nanao./.