Mmông huă yang hrue dơ̆ng, ti sang čhĭ êsei Lê Na, ti buôn Akŏ Dhông, ƀuôn prŏng Ƀuôn Ama Thuôt, čar daklak mjhĭt m’uăt tue. Knŏng mil 40 êbâo prăk, mnuih nao huă dưi ruah mơ̆ng 3 – 4 mta djam, mâo djam ƀăt, djam đeh, djam ăm, djam tlê lehanăn djam êa. Klei mdê tinei jih jang djam anei jign djam mtam mơ̆ng anak Ê Đê sơăi, ƀăt hrăt phĭ hăng. Iêo êsei mbĭt hŏng trŏng tlê, hla hbei ƀlang đeh, kđeh čĭm ŭn ăm bi lŭk hŏng amrêč hra, Lê Vạn Tiếp, dôk ti ƀuôn hgŭm Ea Tam, ƀuôn prŏng Ƀuôn Ama Thuôt lač, ñu kreh hriê huă yang hrue dơ̆ng kơ anei jêñ jêñ.

 “Êlâo dih kâo kreh ƀơ̆ng dŭm mta mnơ̆ng ƀơ̆ng anei tơdah kâo nao hlăm ƀuôn sang. Tăp năng lông mkra mă pô ƀiădah amâo mâo tuôm jăk snei ôh, diñu mkra jăk êdi. Lehanăn ară anei, kâo ƀuh ti Ƀuôn Ama Thuôt mâo leh dŭm anôk čhĭ êsei mơ̆ng mnuih ƀuôn sang kơ nei mkra mă jăk êdi, dưi blei ba wĭt huă dưi mơh, kâo ƀuh jing jăk snăk, lehanăn mâo lu snăk mnuih khăp lehanăn tui duah’.

Tui si H’Rul Niê, khua anôk čhĭ êsei Lê Na, kyua dưi mâo dŭm mta djam anăn mơ̆ng ƀuôn sang, snăn sang čhĭ êsei anei mâo leh lu mnuih khăp huă tui duah. Knŏng leh sa wưng bhiâo đuič sang čhĭ êsei anei mâo pŏk leh truh kơ 3 bĭt anôk ti ƀuôn Akŏ Dhông, pŏk mơ̆ng 10h – 22h grăp hrue.

“Ya mta mnơ̆ng ƀơ̆ng tue čiăng snăn čih hlăm mơar snăn pô mkra yơh tui si phung tue čiăng ƀơ̆ng, boh nik jing djam hla hbei ƀlang, djam pŭng, trŏng phĭ, kan krô tei hŭng tlê, djam knăt hla pŏng puič, knôk... snăn tui hiu duah blei djam mơ̆ng mnuih ƀuôn sang Ê Đê mâo nanao tui hlue yan”.

Dơ̆ng mơ̆ng klei mkra mnơ̆ng ƀơ̆ng tui si mâo êpul tue hiu čhưn čiăng, amâodah ya mta bruă mkŏ mjing klei huă ƀơ̆ng, snăn mơ̆ng akŏ thŭn truh kơ ară anei, lu gŏ sang hlăm ƀuôn Akŏ Dhông hlŏng tŭk kna mnơ̆ng ƀơ̆ng huă kơ mnuih ngă bruă. Jing dŭm mta mnơ̆ng ƀơ̆ng huă aguah tlam mơ̆ng ƀuôn sang pô đuič, ƀiădah ară anei jing leh mnơ̆ng ƀơ̆ng lu mnuih tui duah. H’Minh Byă (ami Jay), pô mkra mnơ̆ng ƀơ̆ng sang čhĭ êsei Mnga Tăng Bi, ti ƀuôn Akŏ Dhông lač, djăp mta mnơ̆ng ƀơ̆ng mâo klei bi mlih nanao, čiăng bi djŏ hŏng klei phung huă ƀơ̆ng čiăng:

“Dah mâo lu tue hriê huă, snăn pô mkra lu mơh. Kâo tŭk knă hlue knhuah anak êđê pô, knŏng jing amâo mâo hăng đei, amâo mâo phĭ đei, man dưn čiăng kơ jih jang mnuih dưi ƀơ̆ng sơăi. Mâo lu mta djam mtam, pô mkra thâo ruah, lehanăn bi lŭk, grăp hrue bi mlih nanao djam mtam, ya mta mnơ̆ng mâo mkra djam anăn yơh”.

Amâo mâo djŏ knŏng ti ƀuôn prŏng Ƀuôn Ama Thuôt anei đuič ôh, knă êsei kơ mnuih ngă bruă hŏng dŭm mta mnơ̆ng ƀơ̆ng anak Ê Đê pô, ƀiădah ară anei ti wăl krah ƀuôn Hồ. Lê Thanh Vinh, sa čô tue mơ̆ng ƀuôn prŏng Hồ Chí Minh lač, mnơ̆ng ƀơ̆ng ăt jing dŏ mnuih ƀuôn sang dưi hưn mdah kơ knhuah gru dharr kreh pô mơh:

 “Tui si kâo ƀuh klei jăk mơ̆ng mnơ̆ng ƀơ̆ng anak Ê Đê mkra ti čar daklak anei ăt jing sa knhuah iêo jak lu phung tue truh hŏng klei hiu čhưn ênguê. Kyuadah bruă hiu čhưn ênguê ti lu anôk snăn hŏng mnơ̆ng ƀơ̆ng huă yơh ăt jing sa klei bi knăl kơ sa klei iêo jak phung tue truh hlăm klei hiu čhưn’.

Amâo lŏ dôk guôn hlăm dŭm hrue knăm mơak ôh, thâodah nao ti dŭm boh ƀuôn sang kơh. Ƀiădah ară anei tue hiu čhưn truh ti Daklak ênưih tui duah mâo mtam mnơ̆ng ƀơ̆ng huă hlue knhuah ƀuôn sang anak Êđê ti krah ƀuôn prŏng Ƀuôn Ama Thuôt mtam. Dŭm ênoh huă ƀơ̆ng kơ sa blư̆ huă hŏng mnuih ngă bruă mâo ba hriê leh mơ̆ng knhuah tŭk mkra mơ̆ng ƀuôn sang nao hlăm klei hdĭp ênuk ară anei, jing leh mnơ̆ng ƀơ̆ng mâo lu mnuih tui duah, boh nik jing tue hiu čhưn ênguê, lehanăn mnuih mă bruă, wăt ƀuôn sang./.