Ti sa anôk mkra mjing boh mnga bruă lŏ hma ti ƀuôn hgŭm Ƀuôn Ama Thuôt, dŭm kƀluôn boh durian ksă kñĭ mâo bi mthu hŏng kdrăp mrâo mrang, dưi kriê pioh mnâo ƀâo mngưi, djă pioh klei siam lehanăn ƀơ̆ng ăt jăk. Mơ̆ng dŭm mta boh kroh mâo tui si yan, boh durian jing leh boh mnga pioh kơ klei mkra mjing prŏng, mâo mkra mjing dưm hlăm tŏ ƀuăt, hlăm huôm hruh jăk snăk. Nguyễn Thị Hường, Khua knơ̆ng bruă mkra mjing boh mnga N&H ti Ƀuôn Ama Thuôt brei thâo:

 “Boh durian bi mthu dưi mkra djăp ênoh čuăn jăk krơ̆ng mnâo mnañ, klei jăk siam, ênoh čuăn kơ 5 hơăi: Amâo mâo thiăm mta mmih, amâo mâo dưm mnơ̆ng bi rơ̆ng, amâo mâo lŏ thiăm mnâo mnañ mơ̆ng êngao, amâo mâo mđĭ hnơ̆ng h’uh, kăn ba yua prăi rei. Mnuih yua ti Daklak ăt čang hmăng jih jang mnơ̆ng mkra mjing dưi krơ̆ng mnâo mnañ jăk mơ̆ng boh kroh truh hŏng mnuih yua ti anôk mkăn, čar mkăn, mâo mnâo mnañ jăk mơ̆ng Daklak anăn jing boh durian leh bi mthu dưi dưm hlăm hruh mnơ̆ng mđup brei, hlăm dŭm hrue knăm mơak têt hat.”

Mbĭt hŏng boh kroh bi mthu, asăr mắc ca – dưi yap jing mta asăr jăk hĭn êdi mơ̆ng djăp mta asăr mâo leh lu hlăm hlao boh kroh ƀơ̆ng hlăm akŏ yan mnga. Mơ̆ng bruă ngă klei bi mthu êdu kñăm dưi djă pioh mnâo mnañ klei jăk mơ̆ng boh kroh, asăr mắc ca Daklak jing leh klei hrŏng ruah jăk mơ̆ng lu gŏ sang yua hlăm wưng Tết. Phạm Trần Tú Anh, bi ala kơ sa anôk mkra mjing asăr mắc ca đeh hŏng djuh ti ƀuôn hgŭm Krông Năng, čar Daklak lač:

 “Hmei mơak leh boh mnga mnơ̆ng hmei mkra mjing dưi ƀuh leh hlăm grăp boh jhưng čhưn huă ƀơ̆ng mơ̆ng lu gŏ sang. Mắc ca amâo mâo djŏ knŏng jing mnơ̆ng ƀơ̆ng jăk, ƀiădah jing mnơ̆ng ƀơ̆ng pioh mđĭ klei suaih pral, jing dŏ jăk yuôm bhăn êdi mơ̆ng bruă pla mjing ti ƀuôn sang.”

Wưng Tết leh êgao klei tŭ dưn boh mnga djăp ênoh čuăn OCOP mơ̆ng čar Daklak knư̆ hĭn mơh êdah. Amâo mâo djŏ knŏng jing mnơ̆ng pioh bi mđup brei, mnơ̆ng mơ̆ng ƀuôn sang mâo jing leh mnơ̆ng mkŏ klei bi hdơr kơ ƀuôn sang, mjing leh knhuah hjăn hlăm klei kuh kŭm ênŭm ênăp hlăm găp djuê. Hlăm jhưm dôk čhưn mnăm êa čê, mbĭt hŏng hlao mứt êya, boh đung, lŏ mâo asăr mắc ca, boh durian bi mthu, kphê đeh amâodah čê ana êa drao, mjing leh mbĭt hŏng knhuah hđaep lehanăn mnơ̆ng mrâo. Amai  Nguyễn Minh Anh, sa čô dôk ti ƀuôn hgŭm Buôn Ma Thuột, čar Daklak lač;

 “Grăp blư̆ Tết yan mnga hriê, gŏ sang kâo kreh mdơ̆ng dŭm mta mnơ̆ng jing tŭ dưn mơ̆ng čar Daklak hlăm hlao ƀêñ mứt. Mâo tue hriê čhưn khăp ƀơ̆ng boh durian bi mthu amâodah asăr mắc ca. Jing jăk, mrâo, lehanăn tinăn mpŭ kơ boh mnga alŭ wăl pô mâo.”

Mâo boh mnga djăp ênoh čuăn OCOP- jing leh mnơ̆ng tŭ dưn mơ̆gn ƀuôn sang pô hlăm dŭm hrue Tết, amâo mâo djŏ knŏng jing klei yăl dliê mơ̆ng phung blei yua, ƀiădah lŏ jing sa knhuang yuôm bhăn hlăm bruă mđĭ klei tŭ dưn ñu. Ti krah yan mnga hlă\m čư̆ čhiăng, mnâo mnañ kphê, mắc ca, durian mâo mbĭt hŏng êwa angĭn mjing leh sa klei muiñ siam jiă knhuah mơ̆ng čar Daklak. Dŭm mta mnơ̆ng djăp ênoh čuăn OCOP hlăk mđĭ klei myưng m’ang kơ knhuah gru dhar kreh, lehanăn klei gĭr hlăm klei mlih mrâo mơ̆ng mnuih ƀuôn sang hlăm alŭ wăl. Mnâo mnañ yan mnga mơ̆ng boh mnga car Daklak  hlăk dôk bi lar klei h’uh mđao truh hŏng grăp boh sang, hlăm klei grăp klei yăl dliê kuh kŭm ênŭm ênap akŏ thŭn mrâo./.