Hlăm sang anôk mkra mnơ̆ng mơ̆ng Êpul hgŭm bruă lŏ hma lehanăn mnia mblei mkra mjing ƀung krô Chi Lăng – Khánh Xuân, ƀuôn hgŭm Thành Nhất, čar Daklak dŭm ênoh ƀung krô dôk mkra mjing, đŭng hruh, čiăng pral mâo ba čhĭ.  Hà Văn Tuyến, Khua knơ̆ng kiă kriê Êpul hgŭm bruă brei thâo: Grăp mlan Êpul hgŭm bruă mâo ba čhĭ mơ̆ng 15-20 tôn ƀung krô djăp mta. Mơ̆ng leh mâo tŭ yap djăp ênoh čuăn OCOP 3 mtŭ, mnơ̆ng mơ̆ng Êpul hgŭm bruă mkra mjing knư̆ hrue knư̆ truh hŏng mnuih blei yua khăp čiăng. Hà Văn Tuyến brei thâo:

Akŏ thŭn anei, lehanăn knhal jih thŭn hlue hŏng mlan ƀlĕ, snăn hmei mprăp leh hlăm brô 40%  hnơ̆ng mâo mkra mjing đĭ mkă hŏng dŭm mlan êlâo. Mbĭt hŏng anăn hmei ăt mâo mnuih kăp lŏ mă bruă tui si klei čiăng hlue yan, kñăm bi djăp mâo mnơ̆ng pioh čhĭ hlăm wưng Tết”.

Ai êwa mjhĭt m’uăt ƀuh êdah klă hlăm anôk dôk mkra mjing. Ti Knơ̆ng bruă Đức Thịnh – sa hlăm dŭm anôk mkra mjing asăr kñŭl hlăm čar  – hŏng djăp kdrăp mkra mjing lehanăn kdrăp đŭng hruh, dôk mă bruă jih hnơ̆ng.

 Nguyễn Ngọc Thùy Sơn, Khua kiă kriê knơ̆ng bruă brei thâo, mbĭt hŏng bruă čhĭ kơ ala tač êngao, boh nik jing ba čhĭ kơ ala čar China, wưng hlăm knhal jih thŭn, anôk duh mkra mđing ba čhĭ lu hĭn hlăm ala čar, pioh kơ lu mnuih yua hlăm wưng Tết. Anôk duh mkra čŏng lŏ mjing lu mta mnơ̆ng mkra mjing mrâo, mđing kơ rup siam, hruh siam, kñăm êdi kơ anăn knăl klei bi mnia mblei.

“Anôk duh mkra mđing mkra mjing leh lu mta mnơ̆ng mrâo, jăk siam, ba nao klei mđĭ ai hlăm klei bi kuh kŭm. Kơ ênoh čhĭ, knơ̆ng bruă krơ̆ng hơĭt ênoh mơ̆ng sang mkra mjing, knŏng ƀiă mta mnơ̆ng lŏ bi mlih ênoh čhĭ knŏng đĭ mă hlăm brô 5% kyua kbiă hriê mơ̆ng mnơ̆ng pioh mkra mjing đĭ yuôm hĕ. Hlăm wưng Tết, ênoh mnơ̆ng mâo ba čhĭ đĭ hlăm ala čar hlăm brô 10%”.

Ti alŭ wăl nah ngŏ čar Daklak, mâo lu anôk mkra mjing mnơ̆ng OCOP ti hnơ̆ng gŏ sang ăt mâo mghaih msir leh mơh mơ̆ng klei hmăi amâo mâo jăk mơ̆ng klei êa lip, kñăm čiăng dưi mâo djăp mnơ̆ng pioh ba čhĭ hlăm wưng Tết. Ti sang čhĭ mnia dŭm mta mnơ̆ng mơ̆ng OCOP ti ƀuôn hgŭm Sông Hinh, mâo dŭm mta mnơ̆ng msĕ su mnŭ mđam hra, kđeh čĭm êmô sa mđiă, kđeh čĭm êmô ƀhu dlông pra pui, kđeh čĭm ŭn ƀhu dlông pra pui, kđeh čĭm mnŭ krô, ŭn krô mâo mkra mjing lehanăn đŭng hruh.

Nguyễn Duy Hùng, pô anôk bruă mkra mjing Hùng Miên brei thâo, gưl êa lip leh êgao hmăi amâo mâo jăk prŏng ôh kơ mnơ̆ng pioh mkra mjing, snăn bruă mkra mjing lŏ wĭt kơrŭ pral, kñăm mâo djăp mnơ̆ng pioh čhĭ:

“Hmei mkra mjing nanao amâo mâo mdei ôh pioh čhĭ mnia hlăm wưng Tết. Wưng Tết thŭn anei, klei čiăng blei mnơ̆ng đĭ, năng ai truh hlăm brô   35% mkă hŏng hrue yăng đar, siămdah ênoh čhĭ mnia amâo mâo đĭ yuôm ôh.”

Mbĭt hŏng klei gĭr mơ̆ng dŭm anôk duh mkra, lehanăn dŭm gŏ sang duh mkra, bruă kiă kriê klei čhĭ mnia, rơ̆ng bi mâo mnơ̆ng ƀơ̆ng doh, ăt mâo leh mơh dŭm anôk bruă djŏ tuôm mđing uêñ. Trung tá Nguyễn Đức Duy, K’iăng khua adŭ bruă kahan ksiêm bruă duh mkra, hlăm knơ̆ng bruă kahan ksiêm čar Daklak brei thâo, êpul bruă djŏ tuôm mâo hyuă kjăp leh klei ksiêm hlăm wưng dôk bi čhĭ mnia mjhĭt m’uăt ară anei.

“Êpul kahan ksiêm srăng ksiêm dŭm mta mnơ̆ng pioh kơ bruă mkra mjing, klei mkra mjing mnơ̆ng ƀơ̆ng kơ dŭm anôk čhĭ mnơ̆ng ƀơ̆ng, rơ̆ng amâo mâo ba yua mta kăm ôh, mơ̆ng anăn dưi gang mkhư̆ klei djŏ mta ruă, đru kơ jih jang mnuih mâo drông Tết hŏng klei êđăp ênang.”

Dưi găn leh klei dleh dlan mơ̆ng yan adiê ngă, hŏng ai tiê thâo gĭr, dŭm anôk mkra mjing lehanăn čhĭ mnia mnơ̆ng ƀơ̆ng hlăk mjhĭt m’uăt mbĭt hŏng anôk bruă djŏ tuôm, bi mă bruă čiăng kơ jih jang mnơ̆ng dhơ̆ng mâo čhĭ mnia ti Daklak mâo lu, djăp ênŭm djŏ hŏng dŭm mta klei mnuih ƀuôn sang čiăng yua hlăm yan   Tết Nguyên đán.