Gŏ sang amai Đinh Thị Phước, kkiêng thŭn 1996, ti ƀuôn Đăk Kjông, să Lơ Ku, kdriêk Kbang, čar Gia Lai tuôn jing leh gŏ sang dôk hlăm klei dleh dlan, kyua kƀah lăn pla mjing, lehanăn mrâo bi ktlah gŏ sang. Dua ung mô hŏng dua čô anak điêt, hdĭp knŏng 5 sào lăn amĭ ama brei lehanăn lŏ hiu ngă bruă mưn. Klei hdĭp kplŭt aguah kƀah tlam, lĕ nanao hlăm klei dleh dlan.

Ƀuh klei hdĭp mda gŏ sang gơ̆ snăn êpul bruă Đảng ƀuôn Đăk Kjông tiŏ nao leh  đảng viên nao ktrâo atăt, mđĭ ai amai Phước nao mŭt hlăm êpul tŭ mă lăn dliê phăn jao kriê dlăng răng mgang truh 12 héc-ta; ktrâo atăt ñu hdră dlăng kriê wiê ênăk djŏ hŏng hdră. Mơ̆ng anăn, amai mâo ênoh dưi ba wĭt hơĭt 36 êklăk prăk/thŭn mơ̆ng thŭn 2014 truh kơ ară anei. Ti gŭ êyui dliê, êjai ana kyâo dôk điêt, ñu pla hlăm lăn anăn êtak êbai čiăng mâo mnơ̆ng yua êjai. Kyua kreh kruiñ duh ƀơ̆ng, truh kơ ară anei, ung mô̆ amai  Phước lŏ blei thiăm truh 2 héc-ta lăn, năng ai hlăm jih thŭn anei, amâo lŏ lĕ hlăm klei  dleh dlan ôh:

"Gŏ sang kâo dôk hlăm ênoh dŭm gŏ sang dleh dlan, kâo lač jăk kơ phung knuă druh đru ba leh hmei. Kâo gĭr srăng duh ƀơ̆ng, thâo mkiêt mkriêm, čiăng lŏ mâo prăk pioh blei lăn mdơ̆ng sang, mđĭ kyar klei hdĭp mda. Klei hdĭp gŏ sang hmei ară anei mdul hĭn leh mkă hŏng êlâo dih”.

Ƀuôn Đăk Kjông, să Lơ Ku, kdriêk Kbang, čar Gia Lai mâo 84 gŏ sang hŏng 426 čô mnuih. Ti anei, mâo 95% mnuih ƀuôn sang djuê ana Bahnar. Êlâo dih, ƀuôn dôk hlăm wăl djŏ anôk mkra knơ̆ng kdơ̆ng êa bi êran phŭn pui An Khê – Ka Nak. Thŭn 2009, ƀuôn dưi lŏ mbĕ ti anôk kngư hĭn, kbưi hŏng anôk dôk hđăp truh 14km. Hŏng ênoh lăn mâo 8 sào lehanăn 1,7 sào lŏ dua yan mâo mbha kơ grăp gŏ sang, phŭn tal êlâo klei hdi7p mnuih ƀuôn sang bŏ hŏng klei dleh dlan. Ƀiădah mâo klei kiă kriê kjăp, sĭt suôr mơ7mng êpul bruă Đảng ƀuôn, lehanăn êpul kiă kriê ƀuôn, snăn mnuih ƀuôn sang ƀrư̆ mâo mdơ̆ng leh sang kjăp, lehanăn mâo knŭk kna ngă brei êlan betong, mâo sang bi kƀĭn ƀuôn. Mnuih ƀuôn sang čŏng mkra mnư̆, ƀăng jang ƀuôn, lehanăn mđrăm mbĭt bi răng kriê êlan mtah siam.

 Amâo mâo djŏ knŏng dŭm anăn ôh, mnuih ƀuôn sang hlăm ƀuôn Đăk Kjông lŏ mâo čan prăk, mâo mđup brei rông êmô, lehanăn tă brei êlan duh ƀơ̆ng mkăn. Leh lu thŭn gĭr ktir mă bruă, snăn hlăm mlan 11/2024 anei, ƀuôn Đăk Kjông srăng djăp ênoh čuăn krĭng ƀuôn sang mrâo, kruăk knăl sa klei bi mlih yuôm bhăn hlăm ƀuôn sang. Đinh Bới- KHua bruă Đảng ƀuôn Đăk Kjông, să Lơ Ku kdriêk Kbang, Gia Lai brei thâo:

"Kâo jing khua bruă Đảng, snăn tiŏ nao phung đảng viên đru dŭm gŏ sang ƀun, dleh dlan. Kâo ăt hâo hưn truh hŏng digơ̆ brei thâo gĭr hlăm klei duh ƀơ̆ng, čiăng dưi lŏ duah lu hĭn prăk kăk, čiăng kơ klei hdĭp hơit ênang, tlaih mơ̆ng klei dleh dlan. Gĭr ktir duah ƀơ̆ng kơ gŏ sang pô”.

Dŭm thŭn leh êgao, bruă mkŏ mkra krĭng ƀuôn sang mrâo hlăm ƀuôn mnuih djuê ƀiă tui si asăp mtrŭn mrô 12 hrue 13/02/2018 mơ̆ng Êpul khua kiă kriê bruă Đảng čar  Gia Lai, grăp thŭn bruă Đảng să Lơ Ku, kdriêk Kbang bi mkŏ mjing hdră êlan mă bruă hŏng dŭm ênoh čuăn klă mngač tui si kdriêk jao.  Anôk bruă Đảng jao kơ phung knuă druh, mnuih ngă bruă, lehanăn dŭmn êpul êya nao kiă kriê hlăm grăp boh ƀuôn, boh nik ktrâo atăt dŭm gŏ sang gĭr ktir duh ƀơ̆ng čiăng tlaih mơ̆ng klei dleh dlan. Mnuih ƀuôn sang dưi đru ktrâo atăt hdră pla mjing, lehanăn rông mnơ̆ng, hlăm anăn tal êlâo jing bi hriăm bruă dlăng kriê bi jăk bruă knuă pô.

Să Lơ Ku, kdriêk Kbang, čar Gia Lai ăt bi mguôp hŏng lu mta bruă mơ̆ng ala čar kñăm bi hrŏ ƀun hŏng klei kjăp, mkăp mjeh, hbâo pruê, lehanăn mnơ̆ng rông, lehanăn kdrăp mnơ̆ng yua pioh kơ mnuih ƀuôn sang mă bruă. Đảng viên mâo tiŏ nao truh hlăm grăp boh ƀuôn bi mguôp hŏng êpul bruă Đảng tinăn, hâo hưn, mtô mblang, đru dŭm gŏ sang dôk hlăm klei dleh dlan. Khădah dôk găn lu klei lông dlăng, bruă bi hrŏ ƀun hlăm alŭ wăl ăt mâo leh mơh dŭm klei tŭ dưn, ƀrư̆ ƀrư̆ dơ̆ng đru kơ mnuih ƀuôn sang djuê ana Bahnar mđĭ leh klei hdĭp mda hŏng klei kjăp. Hlăm dŭm thŭn giăm anei, hnơ̆ng ênoh gŏ êsei ƀun, mơ̆ng ƀuôn Đăk Kjông hrŏ mơ̆ng 38,46% thŭn 2021 trŭn adôk 5,8% hlăm thŭn 2023. Trần Xuân Nam, K’iăng khua bruă Đảng, Khua să Lơ Ku, kdriêk Kbang, čar Gia Lai brei thâo:

“Knuă druh, đảng viên mâo tiŏ nao hlăm grăp mlan, lehanăn mâo klei hâo mdah bruă ngă hŏng anôk bruă Đảng, mơ̆ng anăn ksiêm dlăng tui duah hdră êlan đru mnuih ƀuôn sang, mđrăm mbĭt hŏng khuabruă Đảng ƀuôn mâo klei mtô mblang, đru kčĕ kơ mnuih ƀuôn sang gĭr kpưn đĭ tlaih mơ̆ng ƀun hŏng klei kjăp, hlue ngă jăk klei mtrŭt mjhar, mđĭ ai mnuih ƀuôn sang bi mlih knhuah mĭn, hdră mă bruă. Sĭt yơh bruă bi hrŏ ƀun ka mâo djŏ tui si kleik čiăng ôh, ƀiădah lŏ dlăng wĭt jing mdul hĭn leh, lehanăn ênoh gŏ sang ƀun djăp leh mơh hŏng ênoh čuăn hlăm să”.

Mboĭt hŏng klei kiă kriê siă suôr mơ̆ng bruă Đảng lehanăn bruă sang čư̆ êa alŭ wăl, mnuih ƀuôn sang djuê ana Bahnar ti ƀuôn Đăk Kjông, să Lơ Ku, kdriêk Kbang, čar Gia Lai hơĭt leh klei hdĭp mda, bi hrŏ ƀun hŏng klei pral, čĭăng mkŏ mkra krĭng ƀuôn sang mrâo kjăp siam, dhar kreh hĭn. Mơ̆ng bruă anei brei ƀuh klei thâo bi mguôp hlăm mnuih ƀuôn sang djuê ana Bahnar lehanăn bruă klam mơ̆ng Đảng hlaưm klei kiă kriê gĭt gai lehanăn mđĭ kyar klei hdĭp mnuih ƀuôn sang djuê ƀiă./.