Mâo mkŏ mjing mơ̆ng klei bi mŭt mbĭt dŭm boh ƀuôn hgŭm Tân An, Tân Thiện, Bình Tân lehanăn xã Tân Bình mơ̆ng wăl krah La Gi (čar Bình Thuận hđăp), ƀuôn hgŭm La Gi jing ƀuôn prŏng mnuih lu hlăm krĭng êa ksĭ Lâm Đồng, hŏng ênoh mnuih êbeh 60.000 čô mnuih. Lu mnuih nao ngă hră mơar, ƀiădah jih jang bruă ti anôk ngă hră mơar mơ̆ng ƀuôn hgŭm La Gi bŏ hŏng klei êđăp ênang, bi leh jih bruă knuă, mjing leh klei tŭ ư hlăm mnuih ƀuôn sang. Tôn Thất Nhật, ti ƀuôn hgŭm La Gi hŏng klei mơak brei thâo:

“Mnuih ƀuôn sang čiăng hŏng djăp mta klei ăt bi pral, khuăt mngač. Čiăng bi djŏ hŏng klei mnuih ƀuôn sang čiăng snăn kâo ƀuh ƀuôn hgŭm ngă leh jăk. Mgi dih, ƀuôn hgŭm lŏ dơ̆ng ngă jăk nanao klei ngă hră mơar kơ mnuih ƀuôn sang bi pral khuăt msĕ ară anei jign mơak, leh êdi”.

Ăt msĕ hŏng dŭm anôk phŭn, bruă ngă hră mơar ti dŭm boh ƀuôn hgŭm hlăm krĭng taih kbưi, krĭng mnuih djuê ƀiă hlăm čar Lâm Đồng ăt dưi mă bruă hŏng klei jăk găl sơăi, mâo mkŏ hŏng jih jang djăp mta bruă kluôm ala. Bùi Quốc Huân, Khua knơ̆ng bruă sang čư̆ êa ƀuôn hgŭm Lạc Dương, čar Lâm Đồng, mâo leh êbeh 86% mnuih ƀuôn sang djuê ƀiă sơăi, brei thâo truh ară anei ƀuôn hgŭm ksiêm leh, ksiêl mbha, mƀlir čih hưn klă mngač 378 mta bruă ngă hră mơar hlăm mblah ngă hră mơar. Jih jang bruă ngă anei mơ̆ng sa anôk mă bruă ti ƀuôn hgŭm, mghaih msir ênŭm kơ mnuih ƀuôn sang mâo klei čiăng:

“Hrue kăm tal êlâo hmei tŭ mă mâo 51 mta hră mơar, hlăm anăn mâo 17 hră mơar tŭ mă mơ̆ng êlan online, mđing bi mgaih msir kơ bruă lăn ala, hră gŏ sang, lehanăn bi mklă hră mơar. Hlăm klei mă bruă, mnuih ƀuôn sang čiăng  dưi ngă djăp mta hră mơar, snăn hmei dưi nga jih. Ayŏng adei tŭ mă hră mơar, thâo anăn jing bruă čuăn pô mghaih msir. Jih jang kdrăp mă bruă ăt jăk”.

Mbĭt hŏng 16 anôk bruă, êpul êya, dŭm knơ̆ng dhar bruă gưl čar, jih jang  124 ƀuôn hgŭm, alŭ wăk knơ̆ng mơ̆ng čar Lâm Đồng mâo ngă leh jăk sơăi hdră mă bruă, ba yua phần mềm kiă kriê hră mơar mrâo, tiŏ nao jăk mnuih thâo mă bruă, dưi ngă jăk jih jang hră mơar kơ mnuih ƀuôn sang. Tui si knơ̆ng bruă kiă kriê knơ̆ng bruă čar Lâm Đồng, yap mơ̆ng hrue 1/7, grăp hrue mâo na nao êbeh 1.000 mta hră mơar ngă tianăn lehanăn hŏng online. Lâm Đồng mâo tŭ yap jing 1 hlăm 5 alŭ wăl ba akŏ hlăm kluôm ala kơ bruă tŭ mă hră mơar, mghaih msir jăk jih jang klei ngă hră mơar hlăm dŭm hrue tal êlâo bruă sang čư̆ êa alŭ wăl 2 gưl./.