Hruê 10 mlan 8  thŭn 1947, ti ƀuôn Ma Hinh, ară anei jing ƀuôn Đất Bằng, êpul bruă Đảng tal êlâo kdriêk Cheo Reo (hlăm čar Gia Lai hđăp) dưi mkŏ mjing hŏng 3 đảng viên: Ksor Ní, Rơchơm Thép leh anăn Rơchơm But. Ksor Ní  mâo ruah ngă Khua dlăng bruă Đảng. Hlăm dŭm thŭn mlan krŭ kdơ̆ng adôk lu klei dleh dlan, phung đảng viên mkŏ mjing leh anôk bruă kđi čar, mtrŭt mjhar, bi kƀĭn êpul êya, grăp knhuang ba hdră krŭ kdơ̆ng đĭ kyar.  Mrâo anei, anôk mkŏ mjing bruă Đảng tal êlâo mơ̆ng kdriêk Cheo Reo mâo Knơ̆ng bruă sang čư̆ êa čar Gia Lai bi liê  mkŏ mjing Wăl kriê pioh hlăm ênhă hlăm brô 1,7 ha. Tinei jing “anôk hrah” mtô bi hriăm knhuah gru krŭ kdơ̆ng kơ dŭm gưl ênuk. Ƀri gưl bi hdơr 81 thŭn krŭ kdơ̆ng mlan 8 tŭ jing leh anăn Hruê mkŏ mjing ala čar 2/9, nao čhưn ti wăl anôk bi hdơr, Trịnh Thanh Khiết – K’iăng Khua bruă Đảng să  Phú Túc bi mklă:

“Klei hriăm prŏng hĭn mơ̆ng bruă mkŏ mjing bruă Đảng tal êlâo ti Cheo Reo hlăk anăn jing klei mă bruă êlam mơ̆ng knuă druh đảng viên hŏng mnuih ƀuôn sang leh anăn krĭng wăl… brei jĕ giăm mnuih ƀuôn sang, siă suôr hŏng mnuih ƀuôn sang…”

 Giăm mnuih ƀuôn sang, siă suôr hŏng mnuih ƀuôn sang jing dŭm hruê  mphŭn mkŏ mjing Êpul bruă Đảng ti Cheo Reo (Gia Lai) truh hruê anei lŏ dơ̆ng hlue ngă bruă klam phung knuă druh, đảng viên nah gŭ. Mkŏ dăp, ară anei ƀuôn Đất Bằng mâo giăm 800 gŏ êsei, hŏng êbeh 3.180 čô mnuih, lu jing mnuih Jarai. Êpul bruă Đảng ară anei mâo 73 đảng viên, jing êpul kmeh gơ̆ng hŏng bruă mặt trận čar kwar leh anăn dŭm êpul hâo hưn, mtrŭt mjhar mnuih ƀuôn sang hlue ngă hdră êlan mơ̆ng Đảng,  hdră bhiăn knŭk kna; mđĭ kyar bruă duh mkra, mkŏ mkra klei hdĭp dhar kreh. Jing knuă druh mda asei leh ruĕ hriăm gưl prŏng, ayŏng Rơchơm Bết, (djuê ana Jarai),  Khua dlăng bruă Đảng hlŏng ngă Khua ƀuôn Đất Bằng bi mklă:

 “Kâo pô jing Khua dlăng bruă Đảng alŭ, bi mklă nanao bruă klam pô jing hâo hưn, mtrŭt mjhar mnuih ƀuôn sang mđĭ kyar bruă duh mkra, hlue ngă jăk hdră êlan Đảng leh anăn hdră bhiăn Knŭk kna… Hŏng dŭm bruă adôk gun kpăk, mâo hlăm alŭ, hmei păn kjăp boh klei čiăng  hmao msir mgaih…”

 Bruă gĭt gai mơ̆ng dŭm gưl bruă Đảng ti Đất Bằng kƀĭn hlăm dŭm bruă klă klơ̆ng hlăm klei hdĭp. Hlăm mlan 7 mrâo êgao, êpul bruă Đảng bi hgŭm hŏng mặt trận, êpul ksiêm dlăng đru giăm 200  gŏ êsei hlue ngă hră mơar yua lăn. 60 gŏ êsei dôk dưi dưn hdră đru ba ala ƀuôn dưi bi mlih mơ̆ng mă prăk hla jing mă hlăm tài khoản. Mbĭt anăn jing dŭm bruă kriê dlăng gŏ sang  knŭk kna dlăng ba, đru kơ phung dleh dlan, ksiêm mkă mdrao klei ruă kơ phung khua thŭn, gang mkhư̆ klei ruă tưp.

Mbĭt hŏng bruă hâo hưn, mtô mblang, knuă druh, đảng viên ti Đất Bằng lŏ ba anăp hlăm klei bi mlih klei mĭn, hdră ngă, boh nik hlăm bruă mkra mjing. Đất Bằng hruê anei  mkŏ mjing leh dŭm krĭng pla mjing mdiê lŏ, hbei ƀlang, kbâo; lu ktuê êlan hlăm krĭng mkra mjing dưi bi liê, mjing klei găl kơ mnuih ƀuôn sang mđĭ kyar bruă duh mkra. Đảng viên mda asei Kpă Tuyên jing sa hlăm phung ba anăp hlăm bruă yua klei kreh knhâo mrâo mrang hlăm bruă mkra mjing, bi mlih hdră ngă hđăp.

“Jing sa čô Đảng viên, kâo pô tui hriăm leh anăn hlue ngă gru mngač phung nao êlâo hlăm bruă mkra mjing. Êlâo dih, bruă ngă lŏ hma lu knang hlăm yan boh mnga kyua anăn hrui mă ka lu… Ară anei, kyua klei tă hdră leh anăn pral ba yua kreh knhâo – hdră mnêč, ba kdrăp mkra mjing leh anăn kdrăp krih êa hlăm bruă mkra mjing… bruă ba kdrăp mrâo đru mđĭ boh tŭ dưn pla mjing.”

Mơ̆ng “asăr mjeh hrah” mâo rah ti ƀuôn Ma Hinh 79 thŭn êlâo, truh kơ đảng viên hruê anei, phŭn agha krŭ kdơ̆ng ti ƀuôn Đất Bằng, să Phú Túc čar Gia Lai ăt dôk dưi lŏ čuê hŏng dŭm bruă ngă klă klơ̆ng, sĭt nik. Anăn jing giăm mnuih ƀuôn sang, thâo săng mnuih ƀuôn sang, bi ruh mgaih klei dleh dlan; jing ba anăp hlăm klei mđĭ kyar bruă duh mkram ba yua klei kreh knhâo hdră mnêč, mkŏ mjing klei hdĭp ƀrư̆ jăk siam hĭn.