Hlăm sa klei ngă livestream knhal jih mlan 4/2026 mâo knơ̆ng bruă duh mkra mnia mblei Gia Lai hgŭm hŏng anôk bruă bi mnia mblei hŏng điện tử lehanăn klei duh mkra mrô (hlăm phŭn bruă duh mkra mnia mblei) mkŏ mjing, mâo bánh ít lá gai Hoàng Đông (ƀuôn hgŭm Bình An, čar Gia Lai) mâo čhĭ leh dŭm êbâo klŏ knŏng hlăm sa wưng bhiâo riâo rit.

Hồ Thị Mỹ Phúc – khua anôk čhĭ mnia – brei thâo, mnơ̆ng anei djăp ênoh čuăn OCOP 3 mtŭ mơ̆ng thŭn 2019, ƀiădah êlâo dih ênoh čuăn kơ klei čhĭ mnia jing čhĭ mă hlăm alŭ wăl, kyua klei dưi răng kriê amâo mâo sui ôh. Ƀiădah leh ba yua hdră răng kriê mrâo dưi djă pioh sui, mbĭt hŏng klei dŭ mdiăng kbưi, snăn mnơ̆ng anei dưi ba čhĭ leh hlăm điện tử, mâo leh ênoh akâo blei amâo mâo mdei hŏng dŭm êtuh klŏ.

“Grăp blư̆ Megalive mơ̆ng knơ̆ng bruă duh mkra mnia mblei mkŏ mjing, snăn mnơ̆ng hmei mkra dưi bi lar hlăm hla pŏk yang ƀuôn, mâo lu mnuih thâo. Anei jing hdră đru kơ anôk duh mkra mđĭ kyar pral. Hlăm sa gưl mkŏ mjing Mega live mâo mtam dŭm êbâo klei akâo bi blei mnia. Hmei mkŏ mjing klei răng kriê jăk hĭn, truh 2; 3 hrue srăng truh kơ kngan mnuih blei, ăt dôk jăk.”

Msĕ snăn mơh, Êpul bruă hgŭm Mỹ An (ƀuôn hgŭm Phù Mỹ Đông, Gia Lai) êlâo dih tuôm hŏng klei dleh dlan kơ anôk čhĭ mnia, khădah mnơ̆ng pô mkra mjing djăp ênoh čuăn OCOP. Leh truh hŏng klei bi mnia mblei hŏng online êpul hgŭm bruă mâo pŏk mlar leh anôk čhĭ mnia, hŏng ênoh mâo ba wĭt đĭ nanao hlăm dua thŭn êgao.

Nguyễn Thụy Thúy Vi, K’iăng Khua êpul gơ̆ng bruă kiă kriê êpul hgŭm brei thâo: klei bi mnia mblei hŏng điện tử amâo mâo djŏ knŏng dưi mâo lu mnuih kăp blei, ƀiădah lŏ mjing anôk kơ klei bi blŭ hrăm, mơ̆ng anăn dưi lŏ mđĭ hĭn klei thâo mkra mnơ̆ng pô čhĭ bi jăk, lehanăn djŏ guôp hŏng mnuih čiăng yua.

"Êlâo dih, hmei knŏng čhĭ hlăm alŭ wăl, ƀiădah êdi anei leh mâo čhĭ hŏng  online hmei lŏ mă rup bi lar clip lehanăn pŏk dŭm gưl livestream ti anôk bi mnia mblei hŏng điện tử, amâodah hlăm hla pŏk fanpage mơ̆ng êpul hgŭm bruă pô, mơ̆ng anăn ênoh akâo bi blei mnia đĭ hĭn, hmei ƀrư̆ hrue ngă jăk hĭn mơh hlăm klei bi mnia mblei hlăm online."

Ară anei Gia Lai 400–450 mnơ̆ng OCOP, lu jing boh mnga jăk mơ̆ng alŭ wăl. Ƀiădah, dŭm mta mnơ̆ng djăp ênoh čuăn OCOP hlăm čar knŏng dưi mă bruă điêt đuič, kƀah klei thâo kơ bruă mrô, lehanăn dleh hlăm klei bi mnia mblei, amâo mâo anôk čhĭ hơĭt ôh.

Hlăm dua thŭn êgao, hlăm bruă đru kơ klei thâo čhĭ mnia hŏng online, ngă livestream, mkŏ mjing bruă mrô… dưi mkŏ mjing, đru leh kơ mnuih pla mjing, lehanăn êpul hgŭm bruă dơ̆ng bi mưng hŏng klei bi mnia mblei anei, hŏng mta kñăm čiăng mđĭ boh tŭ klei bi mnia mblei mrô. Mơ̆ng anăn dưoi lŏ pŏk mlar anôk bi mnia mblei, mkŏ mjing mâo lu anăn knăl.

Nguyễn Đình Kha, K’iăng khua knơ̆ng bruă duh mkra mnia mblei Gia Lai brei thâo, hlăm wưng tinăp, čar lŏ dơ̆ng bi klă klei mnia mblei hŏng điện tử jing sa kdrêč bruă yuôm bhăn. Wưng thŭn 2026–2030, čar anăp truh mđĭ hĭn klei bi mnia mblei hlủ lăn čar, mơ̆ng anăn amâo mâo djŏ knŏng mđĭ klei tŭ dưn boh mnga pô mâo, ƀiădah lŏ dơ̆ng ƀrư̆ ƀrư̆ ba anăn knăl klei mnia mblei alŭ wăl truh hŏng lu ala čar dlông rŏng lăn.

"Hmei mkŏ mjing leh hdră bi mlih mrô mơ̆ng bruă duh mkra mnia mblei. Hlăm anăn mđing tal êlâo bruă bi mlih mrô mơ̆ng anôk bruă pô. Lehanăn bi mlih mrô hlăm klei bi mnia mblei, mjing atur kơ klei bi mnia mblei hŏng điện tử. Boh nik klei čhĭ mnia hŏng ala tač êngao, dưi mkŏ mjing kdrăn bi mnia mblei prŏng hŏng ala tač êngao hŏng điện tử. Tĭng hlăm mlan 5 anei, hmei srăng mkŏ mjing sa klei bi kƀĭn, trông čhai kơ atur klei bi mnia mblei hŏng điện tử truh hŏng ala tač êngao."

Klei bi mlih mrô, hlăk ƀrư̆ ƀrư̆ ngă bi mlih leh boh mnga bruă lŏ hma ti Gia Lai dưi nao hlăm klei bi mnia mblei prŏng hĭn, lehanăn ba wĭt klei tŭ dưn jăk hĭn. Êjai anăn mnuih pla mjing klă sĭt thâo ba yua kdrăp mrâo, jih jang boh mnga pô pla mjing, dưi čhĭ mnia pral hĭn, lehanăn dưi lŏ mđĭ kyar pral hĭn hlăm anôk mnia mblei prŏng./.